ಇದು ಮಾಯಾನಗರಿ ಬೆಂಗಳೂರಿನಲ್ಲಿರುವ ಇನ್ನೊಂದು ಮಾಯಾ ಬಜಾರು. ಇಲ್ಲಿ ಏನುಂಟು ಏನಿಲ್ಲ?! ಹೊಸದಾಗಿ ಮದುವೆಯಾದಂತ ನವದಂಪತಿಗಳು ಒಂದು ಮನೆ ಮಾಡಿದಾಗ ಈ ಸಂಡೇ ಬಜಾರಿಗೆ ಬಂದು ಒಂದೆರಡು ಗಂಟೆ ಸುತ್ತಾಡಿದರೆ ಸಾಕು. ಆ ಮನೆಗೆ ಬೇಕಾಗುವಂತಹ ಸಕಲ ಸಾಮಾನುಗಳೂ ಇಲ್ಲಿ ಸಿಕ್ಕಿಬಿಡುತ್ತವೆ. ಅದೂ ಮಾರುಕಟ್ಟೆ ಬೆಲೆಗಿಂತಲೂ ಅರ್ಧಕ್ಕಿಂತ ಕಡಿಮೆ ಬೆಲೆಗೆ! ಆದರೆ ಕೊಳ್ಳುವಾಗ ಮಾತ್ರ ಅತ್ಯಂತ ಜಾಗರೂಕತೆಯಿಂದಿರಬೇಕು. ಸ್ವಲ್ಪ ಯಾಮಾರಿದರೂ ಕೊಳ್ಳುವವರಿಗೆ ಮೇಲುಕೋಟೆ ನಾಮವೇ ಗಟ್ಟಿ. ಎಷ್ಟೇ ಹುಷಾರಿನಿಂದಿದ್ದರೂ ಸ್ವಲ್ಪ ಎಚ್ಚರ ತಪ್ಪಿದರೂ ತಲೆಗೆ ಮಕ್ಮಲ್ ಟೋಪಿ ಖಾತರಿ. ಆದರೆ ಈ ಬಜಾರು ಖಾಯಂ ಅಂಗಡಿಗಳಂತಲ್ಲ. ಇದು ತೆರೆದುಕೊಳ್ಳುವುದು ಭಾನುವಾರಗಳಂದು ಮಾತ್ರವೇ. ಬೆಳಿಗ್ಗೆ ೮ ಗಂಟೆಗೆ ಶುರುವಾಗುವ ಈ ಬಜಾರು ಸಂಜೆ ೫ ಗಂಟೆಗೆಲ್ಲಾ ಖಾಲಿಯಾಗಿಬಿಡುತ್ತೆ. ಈ ಸಂಡೇ ಬಜಾರು ತೆರೆದುಕೊಳ್ಳುವುದು ಬೆಂಗಳೂರಿನ ಹೃದಯ ಭಾಗದಲ್ಲಿರುವ ಬಿ ವಿ ಕೆ ಅಯ್ಯಂಗಾರ್ ರಸ್ತೆಯಲ್ಲಿ.