(ಪುಟ ೧೩) ಬಾರ್ಡರ್ಸ್ ಗೆ ಬಾಗಿಲು, ಕಿಂಡಲ್ ಗೆ ಮಡಿಲು...

(ಪುಟ ೧)

(ಪುಟ ೨)

(ಪುಟ ೩)

(ಪುಟ ೪)

(ಪುಟ ೫)

(ಪುಟ ೬)

(ಪುಟ ೭)

(ಪುಟ ೮)

(ಪುಟ ೯)

(ಪುಟ ೧೦)

(ಪುಟ ೧೧)

(ಪುಟ ೧೨)

ನಾನು ಇಲ್ಲಿಗೆ ಬಂದಾಗ ಆದ ಹಲವಾರು ಸ್ನೇಹಿತರಲ್ಲಿ ’ಬಾರ್ಡರ್ಸ್’ ಕೂಡಾ ಒಂದು. ಬಾರ್ಡರ್ಸ್ ಇಲ್ಲಿನ ಒಂದು ಹೆಸರಾಂತ ಪುಸ್ತಕದಂಗಡಿ. ಇಡೀ ದೇಶದಲ್ಲೆಲ್ಲಾ ಅದರ ಬ್ರಾಂಚ್ ಇತ್ತು. ನಾವು ಮೊದಲು ಬಂದು ನೆಲೆಸಿದ್ದ ಮನೆಗೆ ಅದು ಎಷ್ಟು ಹತ್ತಿರ ಇತ್ತು ಎಂದರೆ...ವಾತಾವರಣ ಚನ್ನಾಗಿದ್ದಾಗ ನಾನು ಯಾರ ಕಾರ್ ರೈಡ್ ಗಳಿಗೂ ಕಾಯದೆ ಅಲ್ಲಿಗೆ ನಡೆದೇ ಹೋಗುತ್ತಿದ್ದೆ. ಅಲ್ಲಿನ ಬಿಸಿಬಿಸಿ ಕಾಫಿ ಕುಡಿಯುತ್ತಾ ಅಲ್ಲಿ ಮಾರಾಟಕ್ಕಿಟ್ಟಿದ್ದ ಮ್ಯಾಗಜ಼ೀನು, ಪುಸ್ತಕಗಳಲ್ಲಿ ನನಗೆ ಬೇಕಾದವನ್ನು ಹಿಡಿದುಕೊಂಡು ಓದುತ್ತಾ ಕೂರುತ್ತಿದ್ದೆ. ಕೆಲವೊಮ್ಮೆ ಅಲ್ಲಿ ನಡೆಯುತ್ತಿದ್ದ ಪುಟಾಣಿ ಮಕ್ಕಳ ಸ್ಟೋರಿ ಸೆಷನ್ ನಲ್ಲೂ ಕೂತು ನನಗೂ ಒಂದು ಕೂಸಾದಾಗ ಅದನ್ನೂ ಇಲ್ಲಿಗೆ ಕರೆದುಕೊಂಡು ಬಂದು ಅದರ ಜೊತೆ ಕಥೆ ಕೇಳಬೇಕು ಅಂತ ಕನಸು ಕಟ್ಟುತ್ತಿದ್ದೆ, ಅಂಗಡಿ ಏರ್ಪಡಿಸುತ್ತಿದ್ದ ಸ್ಥಳೀಯ ಕಲಾವಿದರ ಸಂಗೀತ ಕೇಳುತ್ತಾ, ಥರಾವರಿ ಶೋಗಳನ್ನು ನೋಡುತ್ತಾ ಕಾಲಕಳೆಯುತ್ತಿದ್ದೆ. 

ಗಂಡನನ್ನು ಬಿಟ್ಟರೆ ಬೇರೆ ಹಿಂದಿಲ್ಲ ಮುಂದಿಲ್ಲದೆ ಅಮೆರಿಕಾದಲ್ಲಿ ಅಬ್ಬೆಪಾರಿಯಂತಿದ್ದ ನನಗೆ ಬಾರ್ಡರ್ಸ್ ತುಂಬಾ ಆತ್ಮೀಯ ಗೆಳೆಯನಾಗಿಬಿಟ್ಟಿದ್ದ. ಗೆಳತಿ ಎನ್ನುವ ಅಂತಿದ್ದೆ...ಆದರೆ ಗೆಳತಿಯ ಜೊತೆ ಬಾರ್ಡರ್ಸ್ ನ ಜೊತೆಯಲ್ಲಿದ್ದಷ್ಟು ಗಂಭೀರಕ್ಕೆ ಇರಲು ಸಾಧ್ಯವಾ? ಗೆಳತಿಯ ಹತ್ತಿರ ಅದು ಇದು ಕಣಿ ಹೊಡೆದು, ಕಚಪಚ ಮಾತಾಡದೇ, ಕಥೆ ಕಟ್ಟಿಕೊಳ್ಳದೇ ಇರಲು ಸಾಧ್ಯವೇ ಇಲ್ಲ. ಆದರೆ ಬಾರ್ಡರ್ಸ್ ನಲ್ಲಿದ್ದಾಗ ಅದರ ಬಗ್ಗೆ ಎಷ್ಟೇ ಆತ್ಮೀಯತೆ ಇದ್ದರೂ ಗಂಭೀರವಾಗಿರಬೇಕಾಗುತ್ತಿತ್ತಲ್ಲ. ಹಾಗಾಗಿ ಬಾರ್ಡರ್ಸ್ ನನ್ನ ಒಬ್ಬ ಗೆಳೆಯನಾಗಿದ್ದ. ಪ್ರಶಾಂತನ ಜೊತೆ ಚಿಕ್ಕ ಪುಟ್ಟ ಜಗಳ ಮಾಡಿಕೊಂಡಾಗ, ಬರೀ ಸೋಷಿಯಲೈಜ಼್ ಮಾಡುವುದು ಬೋರೆನಿಸಿದಾಗ ಈ ಗೆಳೆಯನ ಸಮೀಪ ಬಂದು ಬಿಡುತ್ತಿದ್ದೆ. ಅಮೆರಿಕಾದ ಎಕಾನಮಿ, ಇಟಾಲಿಯನ್ ಅಡುಗೆ, ಪ್ರತೀ ತಿಂಗಳೂ ಬಜೆಟ್ ಮಾಡಿ ಮನೆ ನಿಭಾಯಿಸಿವುದು ಹೇಗೆ, ಪೋಕರ್ ಆಡುವುದು ಹೇಗೆ ಎಂಬೆಲ್ಲಾ ಪುಸ್ತಕಗಳಿಗೂ ಕೈ ಹಾಕಿ ಕಣ್ಣಾಡಿಸುತ್ತಾ ಪ್ರಶಾಂತ ಒಬ್ಬನೇ ಅಲ್ಲ ಜೀವನದಲ್ಲಿ ಅಂತ ಸಮಾಧಾನ ಪಟ್ಟುಕೊಳ್ಳುತ್ತಿದ್ದೆ.

ಅಲ್ಲಿದ್ದ ಪ್ರವಾಸದ ಪುಸ್ತಕಗಳನ್ನೆಲ್ಲಾ ಹರವಿಕೊಂಡು ಒಂದು ಸ್ವಲ್ಪ ದುಡ್ಡು ಕೂಡಿಟ್ಟುಕೊಂಡು ಮುಂದೆ ಯಾವ ಯಾವ ಜಾಗಗಳಿಗೆ, ದೇಶಕ್ಕೆ ಹೋಗಬೇಕೆನ್ನುವ ಪ್ಲಾನುಗಳನ್ನೂ ಅಲ್ಲೇ ಮಾಡುತ್ತಿದ್ದೆವು. ಇಷ್ಟೆಲ್ಲಾ ಸಮಯವನ್ನು ಬಾರ್ಡರ್ಸ್ ನಲ್ಲಿ ಕಳೆಯುತ್ತಿದ್ದುದರಿಂದಲೋ ಏನೋ ನಮಗೆ ಸಮಾಧಾನವಾಗುವಂತೆ ಪ್ರತೀ ತಿಂಗಳೂ ನೂರು ಡಾಲರಿಗೆ ಪುಸ್ತಕಗಳನ್ನು ಕೊಂಡುಕೊಳ್ಳುತ್ತಿದ್ದೆವು. ಮುಂದೊಮ್ಮೆ ನಾವು ನಮ್ಮೂರಿಗೆ ವಾಪಸ್ ಹೋದಾಗ ನೆನಪಿಸಿಕೊಳ್ಳಲು ಈ ಪುಸ್ತಕವನ್ನು ಯಾವ ತಾರೀಕು ಓದಿದ್ವಿ? ಏನೆಲ್ಲಾ ಚರ್ಚೆ ಮಾಡಿದ್ವಿ ಅನ್ನುವುದನ್ನೆಲ್ಲಾ ಬರೆದು ಆಯಾ ಪುಸ್ತಕಗಳಲ್ಲಿ ಚೀಟಿ ಅಂಟಿಸಿಕೊಳ್ಳುತ್ತಿದ್ದೆವು.

ಈಗ ಓದುಗ ಪೂರಾ ಬೆಲೆ ಕೊಟ್ಟು ಪೇಪರನ್ನೋ, ಹಾರ್ಡ್ ಬೈಂಡ್ ನ ಪುಸ್ತಕವೊಂದನ್ನೋ ಖರೀದಿಸುವ ಗೋಜಿಗೆ ಹೋಗದೇ ಅದರ ಅರ್ಧಕ್ಕಿಂತ ಕಡಿಮೆ ಬೆಲೆಯಲ್ಲಿ ಸಿಗುವ ಎಲೆಕ್ಟ್ರಾನಿಕ್ ವರ್ಷನ್ ಗಳಿಗೆ ಮಾರುಹೋಗುತ್ತಿದ್ದಾನೆ. ಪತ್ರಿಕೆಗಳೂ, ಮ್ಯಾಗಜ಼ೀನುಗಳೂ ಎಲ್ಲವೂ ಎಲೆಕ್ಟ್ರಾನಿಕ್ ವರ್ಷನ್ ನಲ್ಲಿ ಲಭ್ಯ. ಪೇಪರಿಗೆ ಖರ್ಚು ಮಾಡುವ ಅಗತ್ಯವಿಲ್ಲ. ಬ್ಯಾಟರಿ-ಇಂಟರ್ ನೆಟ್ ಸಂಪರ್ಕ ಇದ್ದರೆ ಸಾಕು! ಇತ್ತೀಚೆಗೆ ಮಾರುಕಟ್ಟೆಯಲ್ಲಿ ಅಲ್ಲೋಲ ಕಲ್ಲೋಲ ಎಬ್ಬಿಸಿರುವ ಕಿಂಡಲ್, ನೂಕ್, ಸೋನಿಯ ಇ ರೀಡರ್, ಐ ಪ್ಯಾಡ್ ನಂತಹ ಉಪಕರಣಗಳು ಓದುವುದನ್ನು ಇನ್ನೂ ಹೊಸ ಗೀಳನ್ನಾಗಿ ಮಾಡುತ್ತಿವೆ. ಹತ್ತು ಪುಸ್ತಕಗಳನ್ನು ಹೊತ್ತು ತಿರುಗುವ ಅಗತ್ಯವಿಲ್ಲದೆ ಒಂದು ಸಣ್ಣ ಸ್ಟೈಲಿಶ್ ಉಪಕರಣವನ್ನು ಜೊತೆಯಲ್ಲಿಟ್ಟುಕೊಂಡರೆ ಸಾಕು. ಇಡೀ ದಿನ ಅದರಲ್ಲೇ ಹುಡುಕಾಡಿ ಐದಾರು ಪುಸ್ತಕಗಳನ್ನು ಓದಿಬಿಡಬಹುದು! ಬಾರ್ಡರ್ಸ್ ನಲ್ಲಿ ಸಿಗುತ್ತಿದ್ದ ೩೦ ಡಾಲರಿನ ಪುಸ್ತಕ ಅಮೆಜ಼ಾನ್ ನಲ್ಲಿ ೨೦ ಡಾಲರಿಗೆ ಸಿಕ್ಕರೆ ಅಥವಾ ಅದೇ ಪುಸ್ತಕ ಎಲೆಕ್ಟ್ರಾನಿಕ್ ವರ್ಷನ್ ನಲ್ಲಿ, ’ಕಿಂಡಲ್’ ನಲ್ಲಿ ೫ ಡಾಲರಿಗೆ ಓದಲು ಸಿಕ್ಕರೆ ಯಾರು ಬಾರ್ಡರ್ಸ್ ನಂತಹ ಪುಸ್ತಕದ ಅಂಗಡಿಗಳಲ್ಲಿ ಖರೀದಿಸಲು ಹೋಗುತ್ತಾರೆ? ಎಲ್ಲರೂ ಅಲ್ಲಿ ಬರೀ ಕಾಫಿ ಹೀರುತ್ತಾ ಕುಳಿತು ಓದುವ ಖುಷಿಗೆ ಮಾತ್ರ ಹೋಗುತ್ತಾರೆ!