ಸಹನಾ ಅಪ್ಡೇಟ್: ಯಡಿಯೂರಪ್ಪ ’ದೇವ ಮಾತೆ’ಯರನ್ನು ಮೀಟ್ ಮಾಡ್ತಿದ್ದಾಗ...ಸವದಿ, ಪಾಟೀಲ್, ಪಾಲೆಮಾರ್ ಗಳು ಸದನಕ್ಕೇ ’ಬ್ಲೂ’ ಕನ್ಯೆಯರನ್ನು ಕರೆಸಿಕೊಂಡಿದ್ರಂತೆ!

　
ಕರ್ನಾಟಕ ಇತ್ತೀಚೆಗೆ ದೇಶ-ವಿದೇಶದಾದ್ಯಂತ ಮಾಡ್ತಾ ಇರೋ ದಾಖಲೆಗಳನ್ನ ಬರೆದು ಸಾಕಾಗಿ ಹೋಗ್ತಿದೆ. ಯಾಕೋ ಕರ್ನಾಟಕದ ಟೈಮ್ ಸರಿಯಿಲ್ಲ, ’ಗರಿಮೆ’ ಗಳು ನಿಲ್ತಾನೇ ಇಲ್ಲ. ಮೊನ್ನೆ ಮೊನ್ನೆ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯ ಸಚಿವ ಸಿ ಸಿ ಪಾಟೀಲ್, ಸಚಿವರಾದ ಲಕ್ಷ್ಮಣ ಸನದಿ ಮತ್ತೆ ಕೃಷ್ಣ ಪಾಲೇಮಾರ್ ಸದನ ನಡೆಯುವಾಗಲೇ ತಮ್ಮ ಸೆಲ್ ಫೋನ್ ನಲ್ಲಿ ಅಶ್ಲೀಲ ವಿಡಿಯೋಗಳನ್ನು ಪೋಕರಿಗಳಿಗಿಂತ ಹೆಚ್ಚಾಗಿ ಆಸಕ್ತಿಯಿಂದ ನೋಡೋದೂ ಅಲ್ದೇ ಮಾಧ್ಯಮದ ಕ್ಯಾಮೆರಾ ಕಣ್ಣಿಗೆ ಸಿಕ್ ಹಾಕಿಕೊಂಡು ತಮ್ಮ ಮಾನ ಮರ್ಯಾದೆಗಳನ್ನು ಹರಾಜು ಹಾಕಿಕೊಳ್ಳೋ ಜೊತೆಗೆ ಕರ್ನಾಟಕದ ಮಾನವನ್ನೂ ತೆಗೆದಿದ್ದಾರೆ. ಕರ್ನಾಟಕದ ಮಟ್ಟಿಗೆ ಈ ರೀತಿಯ ಅಸಹ್ಯ ಇದೇ ಮೊದಲಿನದ್ದು.
　
ಮಾಡಿದ ಕೆಲಸಾನ ಒಪ್ಪಿಕೊಂಡು ಸುಮ್ಮನೆ ಸಚಿವ ಸ್ಥಾನ ಶಾಸಕ ಸ್ಥಾನ ಬಿಟ್ಟುಕೊಟ್ಟು ಮರ್ಯಾದೆ ಹುಡುಕೋ ಬದಲು ’ನಾವು ರೇಪ್ ಕೇಸಿಗೆ ಸಂಬಂಧ ಪಟ್ಟ ವಿಡಿಯೋ ನೋಡ್ತಿದ್ವಿ’ ಅಂತ ಸಮಜಾಯಿಷಿ ಕೊಟ್ಟಿದಾರೆ! ಇವರಿಂದ ಸಚಿವ ಸ್ಥಾನಕ್ಕೆ ರಾಜೀನಾಮೆ ತಗೊಂಡಿದ್ದೇನೋ ಆಗಿದೆ, ಈಗ ಶಾಸಕರ ಸ್ಥಾನದಿಂದಲೂ ತೆಗೆಯಬೇಕು ಎನ್ನುವ ಚರ್ಚೆ. ತಮ್ಮ ಸಚಿವರನ್ನ ಸಚಿವ ಸ್ಥಾನದಿಂದ ಕೈ ಬಿಡಬಾರದು ಅಂತ ಯಡಿಯೂರಪ್ಪನವರು ತುಂಬಾನೇ ಟ್ರೈ ಮಾಡಿದರು ಬಿಡಿ. ಇವರು ಶಾಸಕರ ಸ್ಥಾನ ಕಳೆದುಕೊಂಡ್ರೆ ಯಡ್ಡಿ ಬಣದ ಸಂಖ್ಯೆ ಕಮ್ಮಿಯಾಗಿಬಿಡುತ್ತೆ ಅನ್ನೋ ಯೋಚನೆ ಅವರದ್ದು. ಯೋಚನೆ ಮಾಡಿ, ಸದನದಲ್ಲಿ ಕೂತು ನಾಚಿಕೆಗೇಡಿನ ಕೆಲಸ ಮಾಡುವ ಇಂಥವರು ಇನ್ನೂ ನಮಗೆ ಬೇಕಾ?
　
ರಾಜ್ಯ ರಾಜಕಾರಣದ ಕೇಂದ್ರ ಬಿಂದು ಯಡಿಯೂರಪ್ಪ ಹತಾಶರಾಗಿದ್ದಾರೆ. ಏಟಿನ ಮೇಲೆ ಏಟು ಅವರಿಗೆ. ಅವರಿಗೀಗ ದೇವರಾಜ್ ಅರಸು, ಬಂಗಾರಪ್ಪ ಅವರ ಸಾಹಸಗಳು ನೆನೆಪಿಗೆ ಬರುತ್ತಿವೆ, ಕಾಡುತ್ತಿವೆ. ಈಗವರಿಗೆ ಅಧಿಕಾರ ಬಿಟ್ಟು ಇರಲಾಗುತ್ತಿಲ್ಲ. ಮಾಜಿ ಮುಖ್ಯಮಂತ್ರಿ ಅನ್ನಿಸಿಕೊಳ್ಳಲು ಅವರ ಮನಸ್ಸು ಒಪ್ಪುತ್ತಿಲ್ಲ. ಶತಾಯ, ಗತಾಯ ಮತ್ತೆ ಅಧಿಕಾರ ಹಿಡಿಯಲೇ ಬೇಕು ಎಂಬ ಹಟಕ್ಕೆ ಬಿದ್ದಿದ್ದಾರೆ.
　
ಮುಖ್ಯಮಂತ್ರಿ ಸದಾನಂದಗೌಡರು ಈಗ ಸ್ವಲ್ಪ ಸ್ಟ್ರಾಂಗ್ ಆಗುತ್ತಿರುವುದರಿಂದ ತಮ್ಮ ಕೆಲಸಗಳನ್ನು ಮಾಡಿಸಲು ಸದಾನಂದಗೌಡರ ಮುಂದೆ ಅಂಗಲಾಚುವ ಮನಸ್ತಿತಿ ಅವರಿಗಿಲ್ಲ. ತಾವಂದುಕೊಂಡಂತೆ ಎಲ್ಲವೂ ನಡೆಯುತ್ತಿಲ್ಲ ಅನ್ನೋ ನಿರ್ಧಾರಕ್ಕೆ ಬಂದುಬಿಟ್ಟಿದ್ದಾರೆ. ಹಾಗಾಗಿ ಅವರಿಗೀಗ ಸದಾನಂದ ಗೌಡರ ಮೇಲೆ ಪ್ರೀತಿಯಾಗಲಿ, ನಂಬಿಕೆಯಾಗಲಿ, ನನ್ನ ಗುಂಪಿನವನು ಎಂಬ ವ್ಯಾಮೋಹವಾಗಲಿ ಖಂಡಿತ ಉಳಿದುಕೊಂಡಿಲ್ಲ. ಜೊತೆಯಲ್ಲಿರುವ ಬೆಂಬಲಿಗರು ಎಷ್ಟು ದಿನ ಹೀಗೇ ಇರುತ್ತಾರೆ ಅನ್ನೋದನ್ನ ಹೆಚ್ಚು ದಿನ ನಂಬಲಿಕ್ಕೆ ಸಾದ್ಯವಿಲ್ಲ.ಆದರೂ ರಾಜ್ಯ ಬಿಜೆಪಿಯಲ್ಲಿ ನನ್ನದು ನಡೆಯುತ್ತೆ ಅನ್ನೋದನ್ನು ತೊರಿಸಲಿಕ್ಕಾದರು ಅನಿವಾರ್ಯವಾಗಿ ಗುಟುರು ಹಾಕಲೇಬೇಕಾಗಿದೆ. ಅದಕ್ಕೆಂದೇ ತಮ್ಮ ಶಿಷ್ಯ ಪಡೆಯನ್ನು ಜೊತೆಗಿಟ್ಟುಕೊಳ್ಳಬೇಕಿದೆ. ಆಗಾಗ ರೇಣುಕಾಚಾರ್ಯ ಸಿಎಂ ವಿರುದ್ದ ಗುಟುರು ಹಾಕುವುದೇ ಆಕಾರಣಕ್ಕೆ.
　
ಮುಂದಿನ ಚುನಾವಣೆವರೆಗೂ ಯಡಿಯೂರಪ್ಪ ತಮ್ಮ ಐಡೆಂಟಿಟಿಯನ್ನ ಉಳಿಸಿಕೊಳ್ಳಬೇಕು. ಇಲ್ಲದ್ದಿದ್ದರೆ ಜನ ನನ್ನ ಮರೆತು ಬಿಡ್ತಾರೆ ಅನ್ನೋ ಭಯ ಯಡಿಯೂರಪ್ಪ ಅವರಿಗಿದೆ. ಆದ್ದರಿಂದಲೇ ಅವರು ಸುಮ್ಮನೆ ಕೂರ್ಲಿಕ್ಕೆ ಆಗ್ತಿಲ್ಲ! ಮಾರ್ಚ್ ತಿಂಗಳಲ್ಲಿ ನಾನೇ ಬಜೆಟ್ ಮಂಡಿಸುತ್ತೇನೆ ಎಂಬ ಕಳೆದ ಆರು ತಿಂಗಳ ಮಹತ್ವಾಕಾಂಕ್ಷೆಯ ಆಸೆ ಮಕಾಡೆ ಮಲಗಿದೆ. ಆದರೂ ಬಿಜೆಪಿಯನ್ನು ಬಿಡಲು ಸದ್ಯ ಯಡಿಯೂರಪ್ಪ ರೆಡಿ ಇಲ್ಲ ಅನ್ನೋದು ಕೆಲವರ ಉಹೆ. ನಂಬಿದ ಜಾತಿ ಜನ ನನ್ನ ಕೈ ಬಿಡಲ್ಲ ಅನ್ನೋ ಖಾತರಿ ಮೇಲೆ ಅವರು ಮುಗುಂ ಆಗಿ ತಮ್ಮ ಕಾರ್ಯಾಚರಣೆ ನಡೆಸತೊಡಗಿರುವುದನ್ನು ಅಲ್ಲಗಳೆಯಲು ಸಾಧ್ಯವೇ ಇಲ್ಲ. ಅವರಿಗೀಗ ನಾನಿಲ್ಲದಿದ್ದರೆ ಬಿಜೆಪಿ ಇಲ್ಲ ಎಂಬ ಭ್ರಮೆ ಆವರಿಸಿಕೊಂಡಿದೆ. ಹಾಗಾಗಿ ಅದನ್ನು ತೋರಿಸಲಿಕ್ಕೆ ಸರಿಯಾದ ಮುಹೂರ್ತ ಫಿಕ್ಸ್ ಮಾಡಲು ಕಾಯುತ್ತಿರುವುದಂತು ನಿಜ. ಮಾರ್ಚ್-ಏಪ್ರಿಲ್ ಮೊದಲ ವಾರದ ವೇಳೆಗೆ ಪಂಜಾಬ್, ಯುಪಿ, ಮಣಿಪುರ, ಉತ್ತರಖಂಡ್, ಗೋವಾ ರಾಜ್ಯಗಳ ಚುನಾವಣೆ ಮುಗಿಯಲಿದ್ದು ಆನಂತರವಷ್ಟೇ ಬಿಜೆಪಿ ಹೈಕಮಾಂಡ್ ಯಡಿಯೂರಪ್ಪನವರ ಕಷ್ಟ ಕೇಳಬಹುದು. ಇಲ್ಲದ್ದಿದ್ದರೆ ಕೋರ್ಟು-ಕಚೇರಿ ವ್ಯವಹಾರ ಮುಗಿಸಿಕೊಳ್ಳುವವರೆಗೂ ತೆಪ್ಪಗಿರಿ ಎನ್ನಬಹುದು. ಈಗಿನ ಸ್ಥಿತಿಯಲ್ಲಿ ಯಡಿಯೂರಪ್ಪನವರಿಗೆ ಮಣೆ ಹಾಕುವ ಮನಸ್ತಿತಿ ಹೈಕಮಾಂಡ್ ನಲ್ಲೂ ಕಂಡು ಬರುತ್ತಿಲ್ಲ.
　
ಈಗಾಗಲೇ ಯುಪಿ ಯಲ್ಲಿ ಕಲ್ಯಾಣ್ ಸಿಂಗ್, ಮಧ್ಯಪ್ರದೇಶ್ ನಲ್ಲಿ ಉಮಾ ಭಾರತಿ, ದೆಹಲಿಯ ಮದನ್ ಲಾಲ್ ಖುರಾನ ಹಾಗೂ ರಾಜಸ್ತಾನದ ವಸುಂದರ ರಾಜೆ ಸಿಂಧ್ಯ ಸೇರಿದಂತೆ ಉತ್ತರ ಭಾರತದ ಘಟಾನುಘಟಿ ನಾಯಕರಿಗೆ ಪಾಠ ಕಲಿಸಿದ, ಅವರ ಆಟಕ್ಕೆ ಕೇರ್ ಮಾಡದ ಬಿಜೆಪಿ ಹೈಕಮಾಂಡ್ ದಕ್ಷಿಣದಲ್ಲಿ ಯಡಿಯೂರಪ್ಪನವರ ಆಟಕ್ಕೆ ಕೇರ್ ಮಾಡುತ್ತೆ ಅನ್ನೋದು ಸಧ್ಯದ ಪರಿಸ್ಥಿತಿಯಲ್ಲಿ ಕನಸಿನ ಮಾತು. ಇದೆಲ್ಲ ಯಡಿಯೂರಪ್ಪ ಅವರಿಗೆ ಗೊತ್ತಿಲ್ಲದ ವಿಚಾರ ಏನಲ್ಲ. ಉತ್ತರ ಭಾರತದ ಕತೆ ಕಟ್ಟಿಕೊಂಡು ನನಗೇನು ಅನ್ನೋದು ಅವರ ಲೆಕ್ಕಾಚಾರ. ಕರ್ನಾಟಕದ ಲಿಂಗಾಯಿತ ವರ್ಗ ಸಂಪೂರ್ಣವಾಗಿ ನನಗೆ ಬೆಂಬಲಿಸುತ್ತದೆ ಅನ್ನೋದು ಯಡಿಯೂರಪ್ಪನವರ ವಾದ. ಆದ್ದರಿಂದಲೇ ಬಿಜೆಪಿ ನಾಯಕರು ನನ್ನ ಮಾತು ಕೇಳದಿದ್ದರೆ ಸರ್ಕಾರ ಉಳಿಯುವುದಿಲ್ಲ ಎಂದು ಅವರು ಗುಟುರು ಹಾಕುತ್ತಿರುವುದು.
 
ಮನುಷ್ಯನ ಬಗ್ಗೆ ನಂಬಿಕೆ ಕಳೆದುಕೊಂಡಾಗ ದೇವರೇ ಗತಿ. ಅದರಲ್ಲಿ ಎರಡು ಮಾತಿಲ್ಲ. ಆದ್ದರಿಂದಲೇ ಯಡ್ಡಿ ರಾಜ್ಯದ ಮೂಲೆ ಮೂಲೆ ಸುತ್ತಿ ಯಾಗ ಯಜ್ಞ ಗಳನ್ನೆಲ್ಲ ಪೂರೈಸಿ ಬಿಟ್ಟಿದ್ದಾರೆ! ಅದೇನಿದ್ದರು ಮುಂದೆ ವರ್ಕೌಟ್ ಆಗಬೇಕು. ಅದ್ಯಾವ ಕಾಲಕ್ಕೆ ಆಗುತ್ತೆ ಅಂತ ಬಹುಶ ಜ್ಯೋತಿಷಿಗಳು ಈಗಾಗಲೇ ಪಿಸುಮಾತು ನುಡಿದಿದ್ದಾರೆ. ಈಗ ಜ್ಯೋತಿಷಿಗಳೇ ಅತ್ಯಂತ ಆಪ್ತರು, ನಂಬಿಕಸ್ತರು ಮಾಜಿ ಮುಖ್ಯಮಂತ್ರಿ ಯಡಿಯೂರಪ್ಪ ಅವರಿಗೆ! ಸಧ್ಯಕ್ಕೆ ಯಡಿಯೂರಪ್ಪ ಇನ್ನೇನಿದ್ದರೂ ಮೌನವಾಗಿದ್ದರೆ ಮಾತ್ರ ಬಿಜೆಪಿಯಲ್ಲಿ ಅವರಿಗೆ ಭವಿಷ್ಯ ಅನ್ನೋದು ಅವರ ವಿರೋಧಿ ಪಾಳೆಯದ ಮಾತು. ಇದನ್ನೆಲ್ಲಾ ಕೇಳಿಕೊಂಡು ಸುಮ್ಮನಿರಲು ಯಡಿಯೂರಪ್ಪ ಅವರೇನು ಮಗುವಲ್ಲ. ಅವರಿಗ ಬಿಜೆಪಿ ರಾಷ್ಟ್ರೀಯ ನಾಯಕರ ವಿರುದ್ದ ತಿರುಗಿಬಿಳುವ ನಿರ್ಧಾರದಲ್ಲಂತೂ ಇದ್ದಾರೆ. ಮಾಜಿ ಮುಖ್ಯಮಂತ್ರಿಗಳಾದ ದೇವರಾಜ್ ಅರಸು, ಬಂಗಾರಪ್ಪ ಅವರಂತೆ ಸ್ವತಂತ್ರ ಪಕ್ಷ ಕಟ್ಟುವ ಮನಸ್ಥಿತಿಯಲ್ಲಿ ಚಿಂತನೆ ಆರಂಭ ಗೊಂಡಿದೆ. ಮೈನಾರಿಟಿಯವರಾದ ಅರಸು, ಬಂಗಾರಪ್ಪ ಹೊಸ ಪಕ್ಷ ಮಾಡುವುದಾದರೆ ನಾನ್ಯಾಕೆ ಮಾಡಬಾರದು? ರಾಜ್ಯದ ಬಹುಸಂಖ್ಯಾತ ಲಿಂಗಾಯಿತ ಸಮುದಾಯ ನನ್ನ ಜೊತೆ ಇರುವಾಗ ಹಾಗೂ ಹಿಂದುಳಿದವರಿಗೆ ನನ್ನ ಸರ್ಕಾರ ಸಾಕಷ್ಟು ಸ್ಪಂದಿಸಿರುವುದರಿಂದ ಕನಿಷ್ಟ ನನ್ನ ನಾಯಕತ್ವದಲ್ಲಿ ೨೨೪ ವಿಧಾನ ಸಭಾ ಕ್ಷೇತ್ರ ಗಳ ಪೈಕಿ ಕನಿಷ್ಠ ೫೦ ಗೆದ್ದು ಬಂದರೂ ನಾನೇ ಮುಂದಿನ ಮುಖ್ಯಮಂತ್ರಿ ಆಗಬಹುದು ಅನ್ನೋ ಸರಳ ಲೆಕ್ಕಾಚಾರದಲ್ಲಿ ಯಡಿಯೂರಪ್ಪ ಮಗ್ನರಾಗಿ ಬಿಟ್ಟಿದ್ದಾರೆ!
　
ಹಾಗಾಗಿ ಇಷ್ಟು ವರ್ಷಗಳ ಬಿಜೆಪಿ ಒಡನಾಟಕ್ಕೆ ತಿಲಾಂಜಲಿ ಇಟ್ಟು, ಗಣವೇಷದಾರಿ ಸಂಸ್ಕೃತಿಯಿಂದ ಹೊರಬರುವ ಉತ್ಕಟ ಭಾವನೆಗಳಿಗೆ ಅವರ ಸುತ್ತಲಿನ ಕೆಲವು ಆಪ್ತರು ನೀರೆರೆಯುತ್ತಿದ್ದಾರೆ. ಹಾಗಾಗಿ ಯಡಿಯೂರಪ್ಪ ಮಾರ್ಚ್ ನಂತರ ಬಿಜೆಪಿ ಸಖ್ಯ ತೊರೆದು ಚುನಾವಣ ಸಿದ್ದತೆಗಳನ್ನು ಕೈಗೊಳ್ಳಲು ಮುಂದಾದರು ಅಚ್ಚರಿ ಪಡಬೇಕಿಲ್ಲ. ಅದರಲ್ಲೂ ಉತ್ತರ ಕರ್ನಾಟಕವನ್ನು ತಮ್ಮ ಕಾರ್ಯಕ್ಷೇತ್ರ ಮಾಡಿಕೊಳ್ಳುವ ಉದ್ದೇಶ ಕೊಡ ಅವರಿಗಿದ್ದಂತಿದೆ. ವಿಶೇಷವೆಂದರೆ, ಪ್ರತಿ ವಿಧಾನ ಸಭಾ ಕ್ಷೇತ್ರಗಳಲ್ಲೂ ಕನಿಷ್ಠ ಅಂದಾಜಿನ ಪ್ರಕಾರ ಶೇ ೧೮ ರಷ್ಟು ಲಿಂಗಾಯಿತ ಮತದಾರರು ಇರುವುದು ಯಡಿಯೂರಪ್ಪ ಅವರ ಆಸೆಗೆ ಮತ್ತಷ್ಟು ನೀರೆರೆದಿದೆ.
 
ಯಡಿಯೂರಪ್ಪ ಅವರ ನಡೆಯನ್ನ ಸೂಕ್ಷ್ಮವಾಗಿ ಗಮನಿಸಿದಾಗ ಒಂದು ಸ್ಪಷ್ಟವಾಗುತ್ತದೆ. ಮಾಜಿ ಪ್ರಧಾನಿ ದೇವೇಗೌಡರ ರಾಜಕೀಯ ದಾಳಗಳನ್ನೇ ಯಡಿಯೂರಪ್ಪ ಆಡ ತೊಡಗಿದ್ದಾರೆ! ರಾಜ್ಯದಲ್ಲಿ ದೇವೇಗೌಡರಿಗೆ ಹೊರತಾಗಿ ಫುಲ್ ಟೈಮ್ ರಾಜಕಾರಣ ಮಾಡುವ ವ್ಯಕ್ತಿ ಎಂದರೆ ಯಡಿಯೂರಪ್ಪ! ಇವ್ರಿಬ್ಬರಷ್ಟು ರಾಜ್ಯವನ್ನ ಸುತ್ತಿರುವ ಮತ್ತೊಬ್ಬ ರಾಜಕಾರಣಿ ಇಲ್ಲ. ಅದರಲ್ಲೂ ಹಳೇ ಮೈಸೂರು ಭಾಗದಲ್ಲಿ ದೇವೇಗೌಡರ ಹಿಡಿತ ಹಾಗೂ ಜಾತಿ ಬೆಂಬಲ ಜೋರಾಗಿರುವಾಗ ನಾನು ಯಾಕೆ ನನ್ನ ಸಮುದಾಯವನ್ನೇ ಬಂಡವಾಳ ಮಾಡಿಕೊಳ್ಳಬಾರದು ಎಂಬ ಯೋಚನೆ ಯಡಿಯೂರಪ್ಪನವರನ್ನು ಹೆಚ್ಚುಹೆಚ್ಚು ಕಾಡಲು ದೇವೇಗೌಡರ ರಾಜಕೀಯ ಲೆಕ್ಕಾಚಾರಗಳೇ ಕಾರಣ ಎನ್ನಲಾಗುತ್ತಿದೆ. ಆದ್ದರಿಂದಲೇ ಉತ್ತರ ಕರ್ನಾಟಕದಲ್ಲಿ ತಮ್ಮ ಸಾಮ್ರಾಜ್ಯವನ್ನು ಗಟ್ಟಿ ಮಾಡಿಕೊಳ್ಳುವ ಲೆಕ್ಕಾಚಾರ ಯಡಿಯೂರಪ್ಪ ಅವರಲ್ಲಿ ಸುಳಿದಾಡ ತೊಡಗಿದೆ.
　
ಹಿಂದೆ ಜನತಾ ಪಕ್ಷ ಕೈಕೊಟ್ಟಾಗ, ದೇವೇಗೌಡರು ಸಮಾಜವಾದಿ ಜನತಾ ಪಾರ್ಟಿ ಮಾಡಿ ತಮ್ಮ ವರ್ಚಸ್ಸು ಉಳಿಸಿಕೊಂಡಂತೆ ಹಾಗೂ ಆನಂತರ ಅವರ ರಾಜಕೀಯ ಬದಲಾವಣೆಯಿಂದ ಸಿಎಂ ಆದದ್ದು , ಪ್ರಧಾನಿ ಆದದ್ದು ಯಡಿಯೂರಪ್ಪ ಅವರ ತಲೆ ಹೊಕ್ಕಿದೆ. ಅರಸು, ಬಂಗಾರಪ್ಪ ಹಿಂದುಳಿದ ವರ್ಗಕ್ಕೆ ಸೇರಿದ್ದರಿಂದ ಅವರು ಪ್ರಬಲವಾಗಲಿಲ್ಲ, ಇದ್ದುದ್ದರಲ್ಲಿ ಬಂಗಾರಪ್ಪ ಕಾಂಗ್ರೆಸ್ ಗೆ ಸಾಕಷ್ಟು ಡ್ಯಾಮೇಜ್ ಮಾಡಿದ್ದು ಈಗ ಇತಿಹಾಸ. ಅದೇ ರೀತಿ ಕೆಲೆವೆಡೆ ಯಡಿಯೂರಪ್ಪ ಅವರಿಂದ ಬಿಜೆಪಿಗೆ ತೊಂದರೆ ಆದರೂ ನಾವು ಕನಿಷ್ಠ ೪೦ ರಿಂದ ೫೦ ಸ್ಥಾನ ಗೆದ್ದು ಬಂದರೆ ಯಾವುದೇ ಪಕ್ಷದ ಜೊತೆ ಹೊಂದಾಣಿಕೆ ಮಾಡಿಕೊಂಡು ಅಧಿಕಾರ ಹಿಡಿಯಬಹುದು ಎಂಬ ದೂರಾಲೋಚನೆ ಯಡಿಯೂರಪ್ಪ ಅವರನ್ನು ಈಗ ಆವರಿಸಿಕೊಂಡು ಬಿಟ್ಟಿದೆ. ಈಗ ಅವರ ಬಳಿ ಹಣಕ್ಕೇನೂ ಕೊರತೆ ಇಲ್ಲ. ಹಾಗೆ ಲಿಂಗಾಯಿತ ಸಮುದಾಯ ಅವರ ಜೊತೆಗಿರುವಂತೆ ನೋಡಿಕೊಳ್ಳುವುದೊಂದೆ ಅವರಿಗಿರುವ ಮುಖ್ಯ ಅಜೆಂಡಾ. ಅದಕ್ಕಾಗಿ ಯಡಿಯೂರಪ್ಪನವರು ಏನೆಲ್ಲಾ ಮಾಡಬಹುದು ಎಂಬ ಹಗ್ಗ ಹೊಸೆಯುವ ಕೆಲಸ ಇನ್ನು ಕೆಲವು ತಿಂಗಳಲ್ಲಿ ಒಂದು ರೂಪ ಪಡೆದರೆ ಅಚ್ಚರಿ ಪಡಬೇಕಿಲ್ಲ. ಕಾಂಗ್ರೆಸ್ ಕೂಡ ಯಡಿಯೂರಪ್ಪ ಅವರ ಸ್ವತಂತ್ರ ನಡೆಯನ್ನೇ ಹೆಚ್ಚು ಬೆಂಬಲಿಸತೊಡಗಿದೆ. ಇದರಿಂದ ಪಕ್ಷಕ್ಕೆ ಲಾಭ ಅನ್ನುವ ಲೆಕ್ಕಾಚಾರ ಕಾಂಗ್ರೆಸ್ ಪಾಳೆಯದಲ್ಲಿ ಕೇಳಿ ಬರ್ತಿದೆ.
　
ರಾಜ್ಯದಲ್ಲಿ ಚುನಾವಣೆಗೆ ಇನ್ನೂ ಹದಿನಾಲ್ಕು ತಿಂಗಳಿದೆ. ಈಗ ಸದಾನಂದಗೌಡರು ಆರು ತಿಂಗಳು ಪೂರೈಸಿದ್ದಾರೆ. ಅವರ ಸರ್ಕಾರ ಎಷ್ಟು ದಿನ ಉಳಿಯಬಹುದು ಎನ್ನುವುದು ಒಂದು ರೀತಿಯಲ್ಲಿ ಯಡಿಯೂರಪ್ಪನವರನ್ನೇ ಅವಲಂಬಿಸಿದೆ ಎನ್ನಬಹುದು. ಇನ್ನು ಉಳಿದ ದಿನಗಳ ಬಗ್ಗೆ ಯಡಿಯೂರಪ್ಪ ಅವರ ತಿರ್ಮಾನದ ಮೇಲೆ ಅವರ ಸರ್ಕಾರ ಅವಲಂಬಿಸಿರುತ್ತದೆ ಅಂತಾನೆ ಹೇಳ್ಬೇಕು. ಯಡಿಯೂರಪ್ಪ ಬಿಜೆಪಿಯಿಮ್ದ ಹೊರ ಬಂದರೆ ಕನಿಷ್ಟ ೧೦ ರಿಂದ ೧೫ ಮಂದಿಯಾದರು ಯಡಿಯೂರಪ್ಪನವರ ಜೊತೆ ನಿಲ್ಲಬಹುದು ಅನ್ನೋದು ಒಂದು ಲೆಕ್ಕಾಚಾರ. ಹಾಗಾದಾಗ ಸರ್ಕಾರ ಉಳಿಯುತ್ತಾ? ಇಲ್ವಾ? ಕಾಲಾನೇ ಹೇಳ್ಬೇಕು.
 
ಪಾಪ ಮತ್ತೊಬ್ಬ ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರಂತೂ ಬಿಜೆಪಿ ಸರ್ಕಾರ ಕೆಡುವುವ ಎಲ್ಲಾ ಪ್ರಯತ್ನ ಮಾಡಿ ಸೋತು ಸುಣ್ಣಾಗಿ ಸ್ವಲ್ಪ ವಿಶ್ರಾಂತಿ ಪಡೆದು ಈಗ ಮೈ ಕೊಡವಿಕೊಂಡು ಎದ್ದಿದ್ದಾರೆ. ಅಲ್ಲದೆ ಮುಂದಿನ ಚುನಾವಣೆಯಲ್ಲಿ ವಿಧಾನಸಭೆಗೆ ಸ್ಪರ್ದಿಸುವುದಾಗಿ ಈಗಾಗಲೇ ಸ್ಪಷ್ಟಪಡಿಸಿ ಮುಂದಿನ ಚುನಾವಣೆಯಲ್ಲಿ ಮುಖ್ಯಮಂತ್ರಿಯಾಗುವ ಕನಸು ಕಾಣುವವರ ಸಾಲಿನಲ್ಲಿದ್ದಾರೆ. ಯಡಿಯೂರಪ್ಪ ಅವರ ಆಟಗಳು ಜೆಡಿಎಸ್ ನಲ್ಲಿ ಒಂಚೂರು ಗಲಿಬಿಲಿಗೂ ಕಾರಣವಾಗಿದೆ. ಏನೇ ಆಗ್ಲಿ ಕುಮಾರಸ್ವಾಮಿ ಕೊನೆಗಳಿಗೆಯಲ್ಲಿ ಯಾರೊಂದಿಗೆ ಕೈ ಜೋಡಿಸುತ್ತಾರೆ ಅನ್ನೋದು ನಿಗೂಢ. ಇದೆಲ್ಲದರ ನಡುವೆ ಮಾಜಿಪ್ರಧಾನಿ ದೇವೇಗೌಡರು ಮಾತ್ರ ತಮ್ಮ ಮತ್ತೊಬ್ಬ ಪುತ್ರ ರೇವಣ್ಣನನ್ನು ಮುಖ್ಯಮಂತ್ರಿಯಾಗಿ ನೋಡಬೇಕು ಅನ್ನೋ ಆಸೆಯನ್ನ ಇಟ್ಟುಕೊಂಡಿದ್ದಾರೆ. ಇನ್ನು ಕಾಂಗ್ರೆಸ್ ನಲ್ಲಿ ಸಿದ್ದರಾಮಯ್ಯ, ಪರಮೇಶ್, ಖರ್ಗೆ ಮುಖ್ಯಮಂತ್ರಿಗಾದಿಗೆ ಮೊದಲ ಸಾಲಿನಲ್ಲಿದ್ದಾರೆ.
 
ಇಷ್ಟೆಲ್ಲಾ ಪ್ರಸ್ತಾಪಕ್ಕೆ ಮುಖ್ಯ ಕಾರಣ ಯಡಿಯೂರಪ್ಪ ಅವರ ನಿರ್ಧಾರ...ರಾಜಕೀಯ ಚದುರಂಗದಲ್ಲಿ ಏನೆಲ್ಲಾ ಅನಿರೀಕ್ಷಿತ ನಡೆಗಳು ಆಗಬಹುದು ಎಂಬುದನ್ನ ಕಳೆದ ಎರಡು ಚುನಾವಣೆಗಳಿಂದ ನೋಡಿರುವ ರಾಜ್ಯದ ಜನತೆಗೆ ಮುಂದಿನ ಚುನಾವಣೆ ಮತ್ತಷ್ಟು ಗೊಂದಲ ಮೂಡಿಸಿದರೂ ಅಚ್ಚರಿ ಪಡಬೇಕಿಲ್ಲ. ಎಲ್ಲಕ್ಕಿಂತ ಮುಖ್ಯವಾಗಿ ಬಿಜೆಪಿಗೆ ಇದು ಮರ್ಯಾದೆಯ ಸವಾಲಿನ ಪ್ರಶ್ನೆ ಆಗೋದಂತೂ ಸ್ಪಷ್ಟ!