ಸಹನಾ ಅಪ್ಡೇಟ್: ಹೊಸ ಸಂವತ್ಸರದಲ್ಲಿ ಈ ಹಳಸಿದ ಗಾನಕ್ಕೆ ಅಂತ್ಯವುಂಟೇ?! 

　
ರಾಜ್ಯದಲ್ಲಿ ಭಾರತೀಯ ಜನತಾ ಪಕ್ಷದ ಸರ್ಕಾರ ಉಳಿಯುತ್ತಾ? ಯಾರಾದರೂ ಸಜ್ಜನ ಕನ್ನಡಿಗನನ್ನು ಕೇಳಿ ನೋಡಿ.

 

’ಥತ್! ಸಾಕಾಯ್ತು ಸ್ವಾಮಿ...ಅದ್ಯಾವ ಸೀಮೆ ಫೆವಿಕಾಲ್ ಹಾಕಿಕೊಂಡಿದ್ದಾರೋ ಗೊತ್ತಿಲ್ಲ...ಅಂಟಿಕೊಂಡು ನೇತಾಡ್ತಿದ್ದರೂ ಕೆಳಗೆ ಬಿದ್ದು ಪುಣ್ಯ ಕಟ್ಟಿಕೊಳ್ತಿಲ್ಲ’ ಎನ್ನುತ್ತಾರೆ.

 

ಸಂಕ್ರಾಂತಿ ಬಂತು...ಇನ್ನೇನು ಕ್ರಾಂತಿಮಾಡುತ್ತೇನೆಂದು ಸುಮ್ಮನಾದರು.

ಶಿವರಾತ್ರಿ ಬಂತು...ತಣ್ಣಗೇ ಕಳಿಸಿಬಿಟ್ರು.

ಈಗ ಯುಗಾದಿ...ಹೊಸ ಸಂವತ್ಸರದಲ್ಲೇನಾದರೂ ಈ ಹಳೇ ಗಾನಕ್ಕೆ ಅಂತ್ಯವುಂಟಾ ನೋಡಬೇಕು.

 

ಕರ್ನಾಟಕದ ರಾಜಕೀಯ ಜನಗಳಿಗೆ ಒಳಿತನ್ನು ಮಾಡುತ್ತಿರುವುದರ ಬದಲು ವೃಕ್ಷವಾಸಿಗಳ ದೊಂಬರಾಟ ಆಗಿಹೋಗಿದೆ. ಇದೇ ಮುಂದಿನ ಮೇ ತಿಂಗಳಿಗೆ ನಾಲ್ಕು ವರ್ಷ ಪೂರೈಸುವ ಈ ಸರ್ಕಾರ ಇಷ್ಟೂ ದಿನ ಮಾಡಿದ್ದೆಲ್ಲ ರಾಜ್ಯದ ಇತಿಹಾಸ ಪುಟಗಳಲ್ಲಿ ದಾಖಲೆ. ಯಡಿಯೂರಪ್ಪ ನೇತೃತ್ವದ ಸರ್ಕಾರ ಅಧಿಕಾರಕ್ಕೆ ಬಂದಾಗಿನಿಂದ ಗಲಾಟೆಯಿಲ್ಲದೆ ಅಧಿಕಾರ ನಡೆದೇ ಇಲ್ಲ. ಆರಂಭದ ದಿನಗಳಲ್ಲಿ ಅಲ್ಪಮತದ ಸರಕಾರವನ್ನ ಬಹುಮತ ಸರ್ಕಾರ ಎನ್ನಿಸಿಕೊಳ್ಳುವ ಸಲುವಾಗಿ ನಡೆಸಿದ 'ಆಪರೇಶನ್ ಕಮಲ' ಎಂಬ ಕಾರ್ಯಾಚರಣೆ ಚನಾವಣಾ ವ್ಯವಸ್ಥೆಯನ್ನೇ ಬುಡಮೇಲು ಮಾಡುವಂತದ್ದಾಗಿ ಪ್ರಜಾಪ್ರಭುತ್ವದ ಚುನಾಯಿತ ವ್ಯವಸ್ಥೆಯಲ್ಲಿ ಏನೆಲ್ಲಾ ನಡೆಯಬಹುದು ಎನ್ನುವುದಕ್ಕೆ ಕಳೆದ ಮೂರುವರ್ಷ ಹನ್ನೊಂದು ತಿಂಗಳ ರಾಜ್ಯಭಾರವನ್ನ ನೋಡಿದರೆ ಸಾಕು. ಒಂದರಹಿಂದೊಂದರಂತೆ ತನ್ನ ಗುಂಡಿಯನ್ನ ತಾನೇ ತೋಡಿಕೊಂಡು ಬಂದ ಬಿಜೆಪಿ ಈಗ ಅಂತಿಮ ಘಟ್ಟಕ್ಕೆ ಬಂದು ನಿಂತಿದೆ. ಅಧಿಕಾರಕ್ಕೆ ಬರುವಾಗ ಏನೆಲ್ಲಾ ಕನಸುಗಳನ್ನ ಬಿತ್ತಿ ಬಂದ ಸರ್ಕಾರ ಇದೇನಾ? ಪ್ರಶ್ನೆ ಈಗ ಜನಗಳದ್ದು ಮಾತ್ರ ಅಲ್ಲ, ಸ್ವತಃ ಬಿಜೆಪಿ ಕಾರ್ಯಕರ್ತರು ಬೆಂಬಲಿಗರದ್ದು.

　

ತಮ್ಮ ಅಧಿಕಾರದ ಅವಧಿಯ ತುಂಬೆಲ್ಲಾ ಸ್ವಜನ ಪಕ್ಷಪಾತ, ಭ್ರಷ್ಟಾಚಾರ, ಅಧಿಕಾರ ದುರೋಪಯೋಗದಂತಹ ಹಗರಣಗಳ ಜೊತೆಗೆ ಸರ್ಕಾರ ನಡೆಸಿಕೊಂಡು ಬಂದ ಯಡಿಯೂರಪ್ಪ ಪಕ್ಷದಲ್ಲಿ ತಮ್ಮ ಸರ್ವಾಧಿಕಾರಿ ಧೋರಣೆ ಬೆಳೆಸಿಕೊಂಡು ಬಂದರೇ ಹೊರತು ಮುಖ್ಯಮಂತ್ರಿಯಾಗಿ ರಾಜ್ಯಕ್ಕೆ ಮಾದರಿ ಆಡಳಿತ ಕೊಡುವ ಬಗ್ಗೆ ತಲೆಕೆಡಿಸಿಕೊಳ್ಳಲಿಲ್ಲ. ಅದು ಅವರಿಗೆ ಬೇಕಾಗಿರಲಿಲ್ಲ. ಎಲ್ಲಾ ಮಾತುಗಳಲ್ಲಿ ಮಾತ್ರ. ಆರಂಭ ದಿನದಿಂದಲೇ ಅವರ ಲೆಕ್ಕಾಚಾರ ಇದ್ದದ್ದು ಗಣಿಧಣಿಗಳಿಗೆ ಪರ್ಯಾಯವಾಗಿ ಹಣ ಮಾಡಬೇಕು, ಮತ್ತೊಂದು ಅವಧಿಗೆ ರೆಡ್ಡಿ ಧಣಿಗಳ ಕೃಪಾಕಟಾಕ್ಷವಿಲ್ಲದೆ ನಾನು ಚುನಾವಣೆ ಎದುರಿಸುವಂತ ತಾಕತ್ತು ಬೆಳಿಸಿಕೊಳ್ಳಬೇಕು ಎಂದು. ಹಣದ ಮೂಲ ಯಾವುದಾದರೇನು ಒಟ್ಟಾರೆ ಹಣ ಮಾಡುವುದನ್ನೇ ಯಡಿಯೂರಪ್ಪ ಮತ್ತವರ ಕುಟುಂಬ ಡಾಣಾಡಂಗುರವಾಗಿ ಶುರುಹಚ್ಚಿಕೊಂಡು ತಮ್ಮ ಅಧಿಕಾರಕ್ಕೆ ಒಂದೊಂದೇ ಮೊಳೆ ಹೊಡುಕೊಳ್ಳುತ್ತಾ ಕಟಕಟೆ ಮೆಟ್ಟಿಲೇರಬೇಕಾಗಿ ಬಂತು. ಪೂರಕವಾಗಿ ಅವರ ಸಚಿವ ಸಂಪುಟದವರೂ ಕೂಡ ಕೈಜೋಡಿಸಿ ತಾವೂ ತಿಂದು ಯಡಿಯೂರಪ್ಪನವರ ಕುಟುಂಬಕ್ಕೂ ಸವರಿದ್ದು ಈಗ ಹಳೇ ಸುದ್ದಿ. ಯಡ್ಡಿ ಸಂಪುಟದ ೩೪ ಸಂಪುಟ ಸದಸ್ಯರ ಪೈಕಿ ಬೆರಳೆಣಿಕೆ ಮಂದಿ ಮಾತ್ರ ತಮ್ಮ ಸಚಿವಸ್ಥಾನದ ಘನತೆ, ಗಾಂಭೀರ್ಯಗಳನ್ನು ಕಾಪಾಡಿಕೊಂಡವರು. ಪಾಪ! ಹಾಗೆ ನೋಡಿದರೆ ಅವರಿಗೆಲ್ಲ ಕೊಟ್ಟದ್ದು ಕೆಲಸಕ್ಕೆ ಬಾರದ ಖಾತೆಯನ್ನು! ಮೂರು ವರ್ಷ ಸವೆಸುವ ವೇಳೆಗೆ ಹಾಲಪ್ಪ ಅತ್ಯಾಚಾರ ಹಗರಣ, ರೇಣುಕಾಚಾರ್ಯ-ಜಯಲಕ್ಷ್ಮಿ ಪ್ರಕರಣ, ವೈದ್ಯಕೀಯ ಶಿಕ್ಷಣ ಸಚಿವ ರಾಮಚಂದ್ರೆಗೌಡ, ಕೃಷ್ಣಯ್ಯ, ಕಟ್ಟಾ ಸುಬ್ರಮಣ್ಯನಾಯ್ಡು, ರೆಡ್ಡಿ ಸಾಲು ಸಾಲಾಗಿ ಸರ್ಕಾರದ ಇಮೇಜನ್ನು ಹರಾಜು ಹಾಕಿ, ಅಷ್ಟೊತ್ತಿಗೆ ಯಡಿಯೂರಪ್ಪ ಅವರನ್ನು ಹಿಂಬಾಲಿಸುವ ಸ್ಥಿತಿಗೆ ಬಂದಿದ್ದರು...ಆಗ ಹೈಕಮಾಂಡ್ ಗೆ ತಿರುಗಿಬಿದ್ದಿದ್ದ ಯಡ್ಡಿ ತಮ್ಮ ಆಪ್ತರಂತಿದ್ದ ಸದಾನಂದಗೌಡರಿಗೆ ಪಟ್ಟಾಭಿಷೇಕ ಮಾಡುವ ಮೂಲಕ ನಿಟ್ಟುಸಿರು ಬಿಟ್ಟಿದ್ದರು. ಅಲ್ಲಿಗೆ ಯಡಿಯೂರಪ್ಪ ಆಡಳಿತದ ಒಂದು ಪರ್ವ ಮುಗಿದಿತ್ತು. ಆತ ಸೂತ್ರದಾರನಾಗಿ ಆಟವಾಡುವ ನಿರ್ಧಾರ ಮಾಡಿದ್ದರು. ಅಲ್ಲೇ ಅವರ ಲೆಕ್ಕಾಚಾರ ತಪ್ಪಾಗಿದ್ದು! ಇದಿಷ್ಟು ಪೂರ್ವಾರ್ಧ!

 

　

ಯಡಿಯೂರಪ್ಪನವರ ಅಣತಿಯಂತೆ ಸದಾನಂದಗೌಡ ನಡೆದುಕೊಂಡಿದ್ದರೆ ಬಹುಃಶ ಯಡಿಯೂರಪ್ಪ ಗುಂಪು ತಿರುಗಿ ಬೀಳುವ ಪ್ರಮೇಯವೇ ಬರುತ್ತಿರಲಿಲ್ಲ. ಆದರೆ ಮುಖ್ಯಮಂತ್ರಿ ಆದ ತಕ್ಷಣ ಯಡಿಯೂರಪ್ಪ ಅವರ ಹೆಬ್ಬೆಟ್ಟಿನಂತೆ ನಡೆದುಕೊಳ್ಳಲು ಸದಾನಂದಗೌಡ ಒಪ್ಪದಿದ್ದುದು ಯಡಿಯೂರಪ್ಪ ಸೇರಿದಂತೆ ಅವರ ಬೆಂಬಲಿಗರಲ್ಲಿ ಅತೃಪ್ತಿ ಅಸಮಾಧಾನ ಹೆಚ್ಚಿತ್ತು. ಅವರ ಗುಂಪಿನ ವಿಶೇಷ ವ್ಯವಹಾರಿಕ ಫೈಲುಗಳಿಗೆ ಸದಾನಂದಗೌಡ ಆಸಕ್ತಿ ತೋರದೆ ಪ್ರತಿಯೊಂದಕ್ಕೂ ಕಾನೂನು ಇಲಾಖೆ ಒಪ್ಪಿಗೆ ಪಡೆಯಲು ಮುಂದಾಗಿದ್ದು ಯಡಿಯೂರಪ್ಪ ಬಣಕ್ಕೆ ನುಂಗಲಾರದ ತುತ್ತಾಗಿಬಿಟ್ಟಿತು. ಅಲ್ಲದೆ ಯಡಿಯೂರಪ್ಪನವರ ಪರಮವೈರಿ ಈಶ್ವರಪ್ಪ ಜೊತೆ ಸದಾನಂದಗೌಡರ ಸಖ್ಯ ಹೆಚ್ಚಿದ್ದು, ಐಎಎಸ್, ಐಪಿಎಸ್ ಸೇರಿದಂತೆ ಹಿರಿಯ ಅಧಿಕಾರಿಗಳ ವರ್ಗಾವಣೆ ಯಡಿಯೂರಪ್ಪನವರ ಒಪ್ಪಿಗೆ ಪಡೆಯದೇ ನಡೆದದ್ದು ಪರಿಸ್ತಿತಿಯನ್ನು ಮತ್ತಷ್ಟು ಬಿಗಡಾಯಿಸಿತು. ಹೀಗೆ ಪ್ರತಿಯೊಂದರಲ್ಲೂ ಹಿನ್ನೆಡೆ ಅನುಭವಿಸುತ್ತಿದ್ದೇನೆ ಎಂಬ ಸಂಕಟ ಹೆಚ್ಚಿದಂತೆ ಯಡಿಯೂರಪ್ಪ ಸದಾನಂದಗೌಡರ ವಿರುದ್ಧ ಬಹಿರಂಗವಾಗೇ ಗುಟುರು ಹಾಕತೊಡಗಿದ್ದರು. 

　

 

ಸದಾನಂದಗೌಡರ ಪದಚುತಿಗೆ ಬಲೆ ಹೆಣೆಯತೊಡಗಿ ಜಗದೀಶ್ ಶೆಟ್ಟರ್ ಸೇರಿದಂತೆ ಎಲ್ಲರನ್ನು ಕೂಡಿಹಾಕುವಲ್ಲಿ ಯಶಸ್ವಿಯಾಗುವ ವೇಳೆಗೆ, ಹೈಕೋರ್ಟ್ ಲೋಕಾಯುಕ್ತರನ್ನ ವಜಾಗೊಳಿಸಿದ್ದು ಯಡಿಯೂರಪ್ಪ ಮತ್ತೆ ಮುಖ್ಯಮಂತ್ರಿ ಗಾದಿಗೇರುವ ಹೋರಾಟಕ್ಕೆ ನಾಂದಿ ಹಾಡಿ ಬಿಜೆಪಿ ವರಿಷ್ಟರಿಗೆ ನುಂಗಲಾರದ ತುತ್ತಾಗಿದ್ದರೆ. ೨೦೧೨-೧೩ರ ಬಜೆಟ್ ಅಧಿವೇಶನದ ಮೊದಲ ದಿನವೇ ಸದನಕ್ಕೆ ಬಹಿಷ್ಕಾರ ಹಾಕುವ ಮೂಲಕ ಸೆಡ್ಡು ಹೊಡೆದ ಯಡಿಯೂರಪ್ಪ, ಆಡಳಿತ ಪಕ್ಷದ ಸಾಕಷ್ಟು ಸದಸ್ಯರೆ ಸದನಕ್ಕೆ ಗೈರು ಹಾಜರಾಗುವಂತೆ ಮಾಡಿ ಕರ್ನಾಟಕ ವಿಧಾನಸಭಾ ಅಧಿವೇಶನದಲ್ಲಿ ಮತ್ತೊಂದು ಹೊಸ ಇತಿಹಾಸ ಸೃಷ್ಟಿದ್ದಾರೆ. ಇದು ರಾಷ್ಟ್ರೀಯ ಪಕ್ಷವೊಂದರ ತಾತ್ವಿಕ ದಿವಾಳಿತನವಲ್ಲದೆ ಬೇರೇನೂ ಅಲ್ಲ. ಶಿಸ್ತುಬದ್ಧ ಪಕ್ಷ ಎಂದು ಹೇಳಿಕೊಳ್ಳುವ ಬಿಜೆಪಿ ರಾಷ್ಟ್ರೀಯ ನಾಯಕರು ಯಡಿಯೂರಪ್ಪನವರ ಅಡ್ಡಾದಿಡ್ಡಿ ಆಟದ ಮುಂದೆ ಮಾಸಿದಂತೆ ಕಾಣುತ್ತಿದ್ದಾರೆ. ಆರೆಸೆಸ್ ಘಟಾನುಘಟಿಗಳೆಲ್ಲ ಯಡಿಯೂರಪ್ಪನವರ ಭ್ರಷ್ಟಾಚಾರದಲ್ಲಿ ರುಚಿ ನೋಡಿರುವುದರಿಂದಲೋ ಏನೋ ಬಹಳ ಸಂಕಟ ಅನುಭವಿಸುತ್ತಿರುವುದು ಕಾಣಬರುತ್ತಿದೆ.

　

ಈ ಬಾರಿಯ ಬಜೆಟ್ ಅನ್ನು ಸದಾನಂದಗೌಡರು ಮಂಡಿಸಿಯಾಗಿದೆ. ಹಾಗಾಗಿ ಯಡಿಯೂರಪ್ಪ ಬಣ ನಡೆಸಿದ ರೆಸಾರ್ಟ್ ರಾಜಕಾರಣ ಸಕ್ಸಸ್ ಆಗಿಲ್ಲ. ಏನೋ ಆಶ್ವಾಸನೆ ಮೇಲೆ ಯಡಿಯೂರಪ್ಪ ಬಣ ಮತ್ತೆ ಸದನಕ್ಕೆ ಬಂದು ಕುಳಿತುಕೊಳ್ಳುವ ನಿರ್ಧಾರ ಮಾಡಿದ್ದರೂ...ಅದು ಕೇವಲ ತಾತ್ಕಾಲಿಕ! ಯಡಿಯೂರಪ್ಪನವರೀಗ ಅಧಿಕಾರ ಬಿಟ್ಟು ಕೈಕಟ್ಟಿಕೊಳ್ಳಲು ಯಾವ ಕಾರಣಕ್ಕೂ ಸಿದ್ಧರಿಲ್ಲ. ಅವರು ನರಮಾಂಸದ ರುಚಿ ಕಂಡ ಹುಲಿಯ ತರ ಅಧಿಕಾರದ ರುಚಿ ಹಿಡಿದು ಕೂತಿದ್ದಾರೆ. ತಾವು ನಿರಪರಾಧಿ ಎಂದು ಕೋರ್ಟ್ ಆತನ ಮೇಲಿನ ದೂರನ್ನು ವಜಾ ಮಾಡಿದ ಮೇಲೆ ಸುಮ್ಮನೆ ಕೂರಲು ಸಾಧ್ಯವೇ ಇಲ್ಲ. ಅವರ ಬೆಂಬಲಿಗರೂ ಅವರನ್ನು ಯಾವುದೇ ಕಾರಣಕ್ಕೂ ಸುಮ್ಮನೆ ಕೂರಲು ಬಿಡುವುದಿಲ್ಲ! ಆದ್ದರಿಂದ ಉಳಿದಿರುವ ಇನ್ನು ಹದಿಮೂರು ತಿಂಗಳು ಬಿಜೆಪಿ ಸರ್ಕಾರ ಅಧಿಕಾರದಲ್ಲಿ ಇರುತ್ತದೆಯಾ ಎನ್ನುವುದು ಈಗ ಬಿಜೆಪಿ ಶಾಸಕರಿಗೇ ಗೊತ್ತಿಲ್ಲ. ಹಾಗೊಂದು ಪಕ್ಷ ಸರ್ಕಾರ ಉಳಿದರೆ, ಸದಾನಂದಗೌಡರೆ ಮುಖ್ಯಮಂತ್ರಿಯಾಗಿ ಮುಂದುವರೆಯುತ್ತಾರ ಅಥವಾ ಮೂರನೇ ಮುಖ್ಯಮಂತ್ರಿಯ ಆಯ್ಕೆ ನಡೆಯುತ್ತದಾ ಅಥವಾ ಮತ್ತೊಮ್ಮೆ ಯಡಿಯೂರಪ್ಪನೇ ಮತ್ತೆ ಮುಖ್ಯಮಂತ್ರಿ ಆಗುತ್ತಾರಾ ಎನ್ನುವುದೇ ಈಗ ಚರ್ಚೆ. ಸಚಿವರಾದ ಬಸವರಾಜ ಬೊಮ್ಮಾಯಿ, ಉದಾಸಿ, ಶೋಭಾ ಕರಂದ್ಲಾಜೆ, ಜಗದೀಶ್ ಶೆಟ್ಟರ್, ರೇಣುಕಾಚಾರ್ಯ, ಸೋಮಣ್ಣ, ನಿರಾಣಿ, ರಾಜುಗೌಡ, ಉಮೇಶ್ ಕತ್ತಿ ಸೇರಿದಂತೆ ಯಡಿಯೂರಪ್ಪ ಬೆಂಬಲಿಗರು ಶತಾಯಗತಾಯ ಯಡಿಯೂರಪ್ಪ ಅವರನ್ನೇ ಸಿಎಂ ಗಾದಿಗೆ ಕೂರಿಸಲು ಪಣ ತೊಟ್ಟಿದ್ದಾರೆ. ಅದರಲ್ಲಿ ಜಗದೀಶ್ ಶೆಟ್ಟರ್ ಮಾತ್ರ ಸ್ವತಃ ಸಿಎಂ ಕನಸು ಕಾಣುತ್ತಲೇ ಯಡಿಯೂರಪ್ಪ ಜೊತೆ ಕೈಜೋಡಿಸಿದ್ದಾರೆ! 

　

ಬಿಜೆಪಿ ಹೈಕಮಾಂಡ್ ತಮಗೆ ಒಪ್ಪುವ ನಿರ್ಧಾರ ಕೈಗೊಳ್ಳದಿದ್ದರೆ ಯಡಿಯೂರಪ್ಪ ತಮ್ಮ ದಾರಿ ತಾವು ನೋಡಿಕೊಳ್ಳುವುದು ನಿಜ. ಅದನ್ನು ಬಿಜೆಪಿ ಹಾಗೂ ಅರೆಸೆಸ್ ಹೇಗೆ ನಿಭಾಯಿಸುತ್ತಾರೆ ಎನ್ನುವುದು ಮುಂದಿನ ಚಾಲೆಂಜ್. ಉತ್ತರ ಪ್ರದೇಶದಲ್ಲಿ ಕಲ್ಯಾಣ್ ಸಿಂಗ್, ಮಧ್ಯಪ್ರದೇಶದಲ್ಲಿ ಉಮಾಭಾರತಿ, ದೆಹಲಿಯಲ್ಲಿ ಖುರಾನ ಹಾಗೂ ರಾಜಸ್ತಾನದಲ್ಲಿ ವಸುಂಧರ ರಾಜೆ ಅವರಿಗೆ ಪಾಠ ಕಲಿಸಿದಷ್ಟು ಸುಲಭ ಪರಿಸ್ಥಿತಿ ಕರ್ನಾಟಕದಲ್ಲಿ ಇಲ್ಲ. ಯಡಿಯೂರಪ್ಪನವರ ಬಳಿ ಈಗ ಹಣದ ಜೊತೆಗೆ ಜಾತಿ ಎಂಬ ಭಯಂಕರ ಶಕ್ತಿ ಹೆಗಲು ಕೊಟ್ಟು ನಿಂತಂತೆ ವೈಭವೀಕರಿಸಲಾಗುತ್ತಿದೆ. ಸ್ವಲ್ಪ ಎಡವಟ್ಟು ಮಾಡಿಕೊಂಡರು ಕರ್ನಾಟಕದಲ್ಲಿ ಬಿಜೆಪಿ ೨೦ ವರ್ಷಗಳ ಹಿಂದಕ್ಕೆ ಹೋಗುತ್ತದೆಂಬ ಭಯ ಬಿಜೆಪಿಯನ್ನು ಆವರಿಸಿಕೊಂಡಿದೆ. ಇವತ್ತು ಬಿಜೆಪಿ ವರಿಷ್ಟರಿಗೆ ಯಡಿಯೂರಪ್ಪ ನುಂಗಲಾರದ ತುತ್ತು. ಒಂದು ಪಕ್ಷ ಹೈಕಮಾಂಡ್ ಯಡಿಯೂರಪ್ಪನವರನ್ನು ಪರಿಗಣಿಸದೇ ಇದ್ದರೆ ರಾಜ್ಯದಲ್ಲಿ ಬಿಜೆಪಿ ಚಿಂದಿಯಾಗುವುದು ಖಚಿತ.

　

ಈ ಎಲ್ಲಾ ಸಾಧಕ-ಬಾಧಕಗಳನ್ನು ಅಳೆದು ಹೈಕಮಾಂಡ್ ಒಂದುಪಕ್ಷ ಯಡಿಯೂರಪ್ಪನವರನ್ನೇ ಕರ್ನಾಟಕ ಬಿಜೆಪಿಯ ಅಧ್ಯಕ್ಷಗಾದಿಯಲ್ಲಿ ಕೂರಿಸಿದರೂ ಎಲ್ಲವೂ ಸುಸೂತ್ರವಾಗಿ ನಡೆಯುತ್ತದೆಂಬ ಗ್ಯಾರಂಟಿ ಇಲ್ಲ. ಆಗ ಯಡಿಯೂರಪ್ಪ ಮುಖ್ಯಮಂತ್ರಿ ಆದಿಯಾಗಿ ಎಲ್ಲಾ ಸಚಿವರನ್ನು ತಮ್ಮ ಮನೆ ಬಾಗಿಲಿಗೆ ಪೆರೇಡ್ ಮಾಡಿಸಿ ತಮ್ಮ ವಿರೋಧಿಗಳಿಗೆ ಮುಂದಿನ ಚುನಾವಣೆಯಲ್ಲಿ ಟಿಕೆಟ್ ನೀಡುವಾಗ ಪ್ರೇತದಾಟ ಆಡಿಸುವುದು ನಿಜ. 

 

ಸದಾನಂದಗೌಡ ಅವರು ಬಹುಪಾಲು ಚುನಾವಣೆ ಬಜೆಟ್ ಅನ್ನೇ ಮಂಡಿಸಿರುವುದರಿಂದ ಈ ವರ್ಷವೇ ಚುನಾವಣೆ ಎದುರಾದರು ಅಚ್ಚರಿ ಪಡಬೇಕಿಲ್ಲ. ಅದಕ್ಕೆ ಕಾಂಗ್ರೆಸ್ ಕೂಡ ಹುಮ್ಮಸ್ಸಿನಲ್ಲಿದೆ. ಉಡುಪಿ-ಚಿಕ್ಕಮಗಳೂರು ಲೋಕಸಭಾ ಉಪಚುನಾವಣೆ ಫಲಿತಾಂಶ ಬಿಜೆಪಿಗೆ ಮುಖಭಂಗವಾದರೆ ಕಾಂಗ್ರೆಸ್ ಗೆ ಟಾನಿಕ್  ಸಿಕ್ಕಂತಾಗಿದೆ. ಅದರಲ್ಲೂ ಎಂಟು ವಿಧಾನಸಭಾ ಕ್ಷೇತ್ರಗಳ ಪೈಕಿ ಏಳರಲ್ಲಿ ಬಿಜೆಪಿ ಶಾಸಕರಿದ್ದರು. ಬಿಜೆಪಿ ಭದ್ರ ಕೋಟೆ ಎಂದು ಗುರುತಿಸಿಕೊಂಡಿದ್ದ ಕ್ಷೇತ್ರಗಳಲ್ಲಿ ಕಾಂಗ್ರೆಸ್ ಗೆದ್ದಿರುವುದು ಜನ ಬಿಜೆಪಿ ಕಡೆ ಒಲವು ಕಳೆದು ಕೊಂಡಿದ್ದಾರೆ ಎನ್ನಲು ಪೂರಕವಾಗಿದೆ. ಇದರಿಂದ ಸ್ವತಃ ಮುಖ್ಯಮಂತ್ರಿ ಸದಾನಂದಗೌಡರಿಗೂ ಹಿನ್ನೆಡೆ ಆಗಿದೆ. ಯಡಿಯೂರಪ್ಪನವರನ್ನು ಬಿಟ್ಟು ಚುನಾವಣೆ ಎದುರಿಸಲು ಕಷ್ಟ ಎನ್ನುವ ವಾತಾವರಣವನ್ನು ಯಡಿಯೂರಪ್ಪ ಬೆಂಬಲಿಗರು ಈಗಾಗಲೇ ಸೃಷ್ಟಿಸಿದ್ದಾರೆ. ಜೊತೆಗೆ ಯಡ್ಡಿವರ ಬಣ ಬಿಜೆಪಿಯ ಅಭ್ಯರ್ತಿ ವಿರುದ್ದ ಕೆಲಸ ಮಾಡಿದ್ದಾರೆಂಬ ದೂರು ಕೂಡ ಕೇಳಿ ಬರುತ್ತಿದೆ. ಇದು ಹೀಗೇ ನಡೆದಲ್ಲಿ ಬಿಜೆಪಿ ಅನಿವಾರ್ಯವಾಗಿ ಚುನಾವಣೆಗೆ ದಾರಿಮಾಡಿಕೊಡಬೇಕು. ಆದಳಿತಾರೂಢ ಪಕ್ಷ ಒಂದೇ ಸಮನೆ ರಾಜಕೀಯ ದೊಂಬರಾಟ ನಡೆಸುತ್ತಿರಲು ಸಾಧ್ಯವಿಲ್ಲ. ಅದಕೊಂದು ಕೊನೆಯಿರಲೇ ಬೇಕು. ಅದಕ್ಕೀಗ ಕಾಲ ಕೂಡಿ ಬಂದಿದೇಯೋ ನೋಡಬೇಕು.

 

ಕರ್ನಾಟಕಕ್ಕೀಗ ಬದಲಾವಣೆ ಬೇಕೇ ಬೇಕು. ರಾಜಕೀಯದಾಟಗಳು ನೂರಾರು ನಡೆದರೂ ಕಡೆಯಲ್ಲಿ ಓಟು ಕೇಳಿ ಜನರ ಮನೆಬಾಗಿಲಿಗೇ ಬರುವ ಈ ಮಹಾಪುರುಷರ ದೊಂಬರಾಟಗಳನ್ನು ಜನ ನೆನಪಿನಲ್ಲಿಟ್ಟುಕೊಂಡು ಅವರಿಗೆ ಸರಿಯಾದ ಮರ್ಯಾದೆ ಮಾಡುವಂತೆ ಆದರೆ ಮಾತ್ರ ಕರ್ನಾಟಕ ಸೇಫ್!