ಅಂಗಳ      ಖುರಪುಟ
Print this pageAdd to Favorite


ಚಿಲಿಯ ಗಣಿಗಾರರಿಗೆ ಹಾಡೇ ಸಂಜೀವಿನಿ!

ಚಿಲಿಯಲ್ಲಿ ಆಗಸ್ಟ್ ೫ರಂದು ರಂದು ಪರ್ವತದೊಳಗೆ ಕೊರೆದಿದ್ದ ಗಣಿಯ ಮೇಲೆ ಭೂಕುಸಿತವಾಗಿ ಮೂವತ್ಮೂರು ಜನ ಗಣಿಗಾರರು ಭೂಮಿಯಾಳದಲ್ಲಿ ೧/೨ ಮೈಲು ದೂರ, ಆ ಗಣಿಯ ಎಮರ್ಜೆನ್ಸಿ ಕೋಣೆಯೊಂದರಲ್ಲಿ ಸಿಕ್ಕಿ ಹಾಕಿಕೊಂಡಿರುವುದು ನಿಮಗೆ ಗೊತ್ತು. ಅವರನ್ನು ಅಲ್ಲಿಂದ ಹೊರ ತೆಗೆಯಲು ಇನ್ನು ನಾಲ್ಕು ತಿಂಗಳಾದರೂ ಬೇಕಾಗುತ್ತದಂತೆ! ಚಿಲಿಯ ಅಧಿಕಾರಿಗಳು ಸಿಕ್ಕಿಬಿದ್ದಿರುವ ಗಣಿಗಾರರಿಗೆ ಈ ವಿಷಯ ತಿಳಿಸಿಲ್ಲವಂತೆ. ಗಣಿಗಾರರಿಗೆ ಪತ್ರ ಬರೆಯಲು ಅವರ ಕುಟುಂಬಗಳಿಗೆ ಅನುಮತಿ ಕೊಟ್ಟಿರುವ ಅಲ್ಲಿನ ರೆಸ್ಕ್ಯೂ ಅಧಿಕಾರಿಗಳು ಅವರನ್ನು ಹೊರತೆಗೆಯುವುದು ಅಷ್ಟು ತಡವಾಗುತ್ತೆ ಎಂದು ಪತ್ರದಲ್ಲಿ ಯಾವ ರೀತಿಯಲ್ಲೂ ಸೂಚನೆ ಕೊಡದಂತೆ ಗಣಿಗಾರರ ಕುಟುಂಬಗಳಿಗೆ ಕಟ್ಟೆಚ್ಚರಿಕೆ ನೀಡಿದ್ದಾರೆ. ನಾಲ್ಕು ತಿಂಗಳು, ಪುಟ್ಟ ಎಮರ್ಜೆನ್ಸಿ ಕೋಣೆಯೊಂದರಲ್ಲಿ ಹೊರಗಿನಿಂದ ಕಳಿಸಲಾಗುತ್ತಿರುವ ಆಮ್ಲಜನಕವನ್ನು ಉಸಿರಾಡಿಕೊಂಡು ಬದುಕಿರುವುದು ದೊಡ್ಡ ಛಾಲೆಂಜ್. ಗಣಿಗಾರರು ಹತಾಶರಾಗಿ ಡಿಪ್ರೆಶನ್ ಗೆ ಜಾರದಿರಲಿ ಎಂದು ದಿನಾ ಅವರಿಗೆ ಕಡ್ಡಾಯವಾಗಿ ಹಾಡು ಹೇಳಿಕೊಳ್ಳಲು, ಕಾರ್ಡ್ಸ್ ಆಡಲು ಸೂಚನೆ ನೀಡಲಾಗಿದೆಯಂತೆ.
 
ಹಾಗೇ ಅವರಿಗೆ ಹೈ ಪ್ರೋಟೀನ್ ಪಾನೀಯವನ್ನು, ಆಮ್ಲಜನಕದ ಸಣ್ಣ ಪೈಪ್, ಬ್ಯಾಟರಿ, ನೀರು, ಖಿನ್ನತೆಯ ಮಾತ್ರೆಗಳು (ಆಂಟಿಡಿಪ್ರೆಸೆಂಟ್ಸ್) ಪೆನ್-ಹಾಳೆಗಳು-ಪತ್ರ, ಪುಟ್ಟ ಕ್ಯಾಮೆರಾ ಲೈನ್ ಇತ್ಯಾದಿಗಳನ್ನು ಈಗ ಕೊರೆದಿರುವ ೬ ಇಂಚು ಅಗಲದ ರಂಧ್ರದ ಮೂಲಕ ಕಳಿಸಲಾಗುತ್ತಿದೆ. ಪ್ರತಿದಿನವೂ ಇದ್ದ ಜಾಗದಲ್ಲೇ ಓಡಾದಿ ವ್ಯಾಯಾಮ ಮಾಡಿಕೊಂಡು ದೈಹಿಕವಾಗಿ ’ಫಿಟ್’ ಆಗಿರಬೇಕೆಂದೂ ಆದರೆ ಅಪ್ಪಿತಪ್ಪಿಯೂ ಅವರ ಸೊಂಟದ ಸುತ್ತಳತೆ ೩೦ ಸೆಂಟಿಮೀಟರ್ಗಿಂತ ಹೆಚ್ಚಾಗದಂತೆ ನೋಡಿಕೊಳ್ಳಬೇಕೆಂದೂ ತಿಳಿಸಲಾಗಿದೆ. ಗಣಿಗಾರರು ಸಣ್ಣಗಾದಷ್ಟೂ ಅವರನ್ನು ಈಗ ಕೊರೆಯಬೇಕೆಂದಿರುವ ರೆಸ್ಕ್ಯೂ ಸುರಂಗದಿಂದ ನಿಧಾನಕ್ಕೆ ಮೇಲಕ್ಕೆಳೆದು ಎಳೆದು ಹೊರತರಲು ಸಾಧ್ಯವಾಗುತ್ತದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಈಗಾಗಲೇ ತಾವು ಉಳಿದು ಮತ್ತೆ ಹೊರಬರುವ ಬಗ್ಗೆ ಅನುಮಾನದಿಂದಿರುವ ಗಣಿಗಾರರು ತಲಾ ೧೦ ಕೆಜಿಯಷ್ಟು ತೂಕ ಕಳೆದುಕೊಂಡಿದ್ದಾರೆ ಎಂದೂ ಅಂದಾಜಿಸಲಾಗಿದೆ. ’ಇದು ಸುಲಭದ ಕೆಲಸವಲ್ಲ. ನಮ್ಮ ಮೇಲೆ ಬಹಳ ಜವಾಬ್ದಾರಿ ಇದೆ, ಗಣಿಗಾರರು ಖಿನ್ನತೆಗೊಳಗಾಗದಂತೆ ಅವರಿಗೆ ಮನೋವೈದ್ಯರ ಸಹಾಯವನ್ನು ಕೊಡಬೇಕಾಗುತ್ತದೆ’ ಎನ್ನುತ್ತಾರೆ ರಕ್ಷಣೆಯ ಉಸ್ತುವಾರಿ ಹೊತ್ತಿರುವ ಅಧಿಕಾರಿಗಳು. ಈ ಗಣಿಗಾರರನ್ನು ಸುರಕ್ಷಿತವಾಗಿ ಹೊರತೆಗೆಯಲು ೬೮೮ ಮೀಟರ್ ಆಳದ ಹೆಬ್ಬಂಡೆಯೊಂದನ್ನು ಕೊರೆದು ಸುರಂಗ ಮಾಡಬೇಕಿರುವ ಸವಾಲು ಈಗಿದೆ!
 
ಇದೆಲ್ಲದರ ಮಧ್ಯೆ ಭೂಮಿಯೊಳಗೆ ಸಿಕ್ಕಿಬಿದ್ದಿರುವ ೪೪ ವರ್ಷದ ರೋಜಸ್ ಎಂಬ ಗಣಿಗಾರ ತನ್ನ ೨೫ ವರ್ಷಗಳ ಹೆಂಡತಿ ಜೆಸ್ಸಿಕಾಗೆ (೪೩ ವರ್ಷ) ಪ್ರೇಮ ಸಂದೇಶವನ್ನು ಕಳಿಸಿ, ನಾನು ಕ್ಷೇಮವಾಗಿ ಹಿಂದಿರುಗಿ ಬಂದರೆ ನನ್ನನ್ನು ಚರ್ಚ್ ನಲ್ಲಿ ಮದುವೆಯಾಗುತ್ತೀಯಾ? ಎಂದು ಸುದೀರ್ಘ ಪ್ರೇಮ ಪತ್ರವೊಂದರಲ್ಲಿ ಪ್ರೊಪೋಸ್ ಮಾಡಿದ್ದಾರೆ. ರೋಜಸ್ ಸೇಫಾಗಿ ಬಂದು ಅವರ ಹೆಂದತಿಯನ್ನು ಮದುವೆಯಾಗುವಂತಾಗಲಿ.
 


ಹೊರಟಳಾ ತಾಯಿ!

ಥಾಯಿಲ್ಯಾಂಡ್ ನ ೬೦೩ ಪೌಂಡ್ (೨೭೪ ಕೆ ಜಿ) ನ ಭಾರೀ ಮಹಿಳೆ ತೋಂಗ್ ಪ್ರಪೈ ಮೂರು ವರ್ಷಗಳಲ್ಲಿ ಮೊದಲ ಬಾರಿಗೆ ತಮ್ಮ ಮನೆಯಿಂದ ಹೊರಬಂದಿದ್ದಾರೆ. ೪೦ ವರ್ಷದ ಈಕೆ ಥಾಯಿಲ್ಯಾಂಡ್ ನ ಅತ್ಯಂತ ಗಾತ್ರದ ಮಹಿಳೆ! ಈಕೆಯ ಬಲಗಾಲಿನಲ್ಲಿ ದೊಡ್ಡ ಗಡ್ಡೆಯೊಂದು ಕಾಣಿಸಿಕೊಂಡಿದ್ದು ಅದಕ್ಕೆ ಚಿಕಿತ್ಸೆ ದೊರಕದಿದ್ದರೆ ಈಕೆ ಸಾಯಬಹುದೆಂಬ ಭಯದಿಂದ ನೆರೆಹೊರೆಯವರು ಥಾಯಿ ಸರ್ಕಾರಕ್ಕೆ ಸುದ್ದಿ ಮುಟ್ಟಿಸಿದ್ದರು. ತಕ್ಷಣವೇ ಇಂಜಿನಿಯರ್ ಗಳು, ಬುಲ್ಡೋಜ಼ರ್, ರಕ್ಷಣಾ ಪಡೆಯವರು, ಡಾಕ್ಟರ್ ಗಳು, ನರ್ಸ್ ಗಳ ಪುಟ್ಟ ಪಡೆಯೊಂದು ಮನೆಗೆ ಬಂದು ಕಿಟಕಿ-ಬಾಗಿಲು, ಗೋಡೆಗಳನ್ನೊಡೆದು ತೋಂಗ್ ಪ್ರಪೈ ರನ್ನು ಮನೆಯಿಂದ ಹೊರಕರೆತಂದರು. ಈಕೆ ಬ್ಯಾಂಕಾಕ್ ನ ಅಪಾರ್ಟ್ಮೆಂಟ್ ಒಂದರ ಮೂರನೆ ಮಹಡಿಯಲ್ಲಿ ವಾಸಿಸುತ್ತಿದ್ದರು. ಮನೆಯಿಂದ ಹೊರ ಬರುವಾಗ ತನ್ನ ನೆರೆಹೊರೆಯವರಿಗೆ ವಂದಿಸಿ, ಆನಂದಬಾಷ್ಪ ಸುರಿಸಿದ ತೋಂಗ್ ಪ್ರಪೈ ಕಾಲಿನ ಚಿಕಿತ್ಸೆ ಆದ ಕೂಡಲೇ ತಾನು ಸಮುದ್ರಕ್ಕೆ ಹೋಗಿ ನೀರಾಟ ಆಡುವುದಾಗಿ ಸಂತೋಷಪಟ್ಟಿದ್ದಾರೆ.




ವಿವಾದಕ್ಕೆ ಸಿಕ್ಕಿರುವ ಇಸ್ಲಾಮ್ ಸಾಂಸ್ಕೃತಿಕ ಕೇಂದ್ರ

ನ್ಯೂಯಾರ್ಕಿನ ವರ್ಲ್ಡ್ ಟ್ರೇಡ್ ಸೆಂಟರ್ ನೆಲಸಮವಾಗಿ ಸೆಪ್ಟೆಂಬರ್ ೧೧ ರ್ಕ್ಕೆ ೯ ವರ್ಷಗಳಾಗುತ್ತವೆ. ಆ ಜಾಗದಲ್ಲಿ ಅಂದು ಸತ್ತ ಅಮಾಯಕ ಜನರ ನೆನಪಿಗಾಗಿ ಈಗ ಗ್ರೌಂಡ್ ಜೀರೊ ಎಂಬ ಸ್ಮಾರಕವೊಂದು ನಿರ್ಮಾಣವಾಗಿದೆ. ಮುಂದೊಂದು ದಿನ ಅದೇ ಜಾಗದಲ್ಲಿ ವಿಶಿಷ್ಟವಾದ ಹಾಗೂ ಎತ್ತರವಾದ ಸ್ಮಾರಕವೊಂದನ್ನು ಕಟ್ಟುವ ಗಂಭೀರ ಯೋಚನೆಗಳಿವೆ. ಆದರೆ ಅದೆಲ್ಲದರ ಮಧ್ಯದಲ್ಲಿ ಈಗ ಹೊಸದೊಂದು ಗುಲ್ಲು! ಈ ಗುಲ್ಲು ಈ ಬಾರಿ ಅಮೆರಿಕಾದ ಜನರನ್ನು, ಅವರ ಅಭಿಪ್ರಾಯಗಳನ್ನು ಭಾಗ ಭಾಗಗಳಲ್ಲಿ ಕತ್ತರಿಸುತ್ತಿದೆ.

Courtesy: www.washingtontimes.comವರ್ಲ್ಡ್ ಟ್ರೇಡ್ ಸೆಂಟರ್ ನೆಲಸಮವಾದ ಜಾಗಕ್ಕೆ ಪಕ್ಕದಲ್ಲೇ ಮಸೀದಿಯೊಂದನ್ನು ಕಟ್ಟುವ ಯೋಜನೆ ನಡೆಯುತ್ತಿದೆಯೆಂದು ಧಾರ್ಮಿಕ ನಾಯಕರು ಒಬಾಮ ಸರ್ಕಾರವನ್ನು ತಾರಾಮಾರಿ ತರಾಟೆಗೆ ತೆಗೆದುಕೊಳ್ಳುತ್ತಿದ್ದಾರೆ. ರೇಡಿಯೋ ಟಾಕ್ ಶೋಗಳಲ್ಲಿ, ಟಿವಿ ಚಾನೆಲ್ಗಳಲ್ಲಿ, ಕಟ್ಟಾ ಕ್ರೈಸ್ತ ಅಮೆರಿಕರು ಒಬಾಮ ಸ್ವತಃ ಮುಸಲ್ಮಾನನಾದ್ದರಿಂದ ಈ ಯೋಜನೆಯನ್ನು ತಡೆಯದೆ ಅಮೆರಿಕಾದ ಜನತೆಗೆ ದ್ರೋಹ ಮಾಡುತ್ತಿದ್ದಾರೆಂಬ ಮಟ್ಟದಲ್ಲೂ ಮಾತನಾಡುತ್ತಿದ್ದಾರೆ. ಗ್ರೌಂಡ್ ಜೀರೊನ ಹತ್ತಿರ ಮುಸಲ್ಮಾನರ ಯಾವುದೇ ಚಟುವಟಿಕೆ ನಡೆದರೂ ಜನ ಸಾಮಾನ್ಯ ಅಮೆರಿಕನ್ನರಿಗೆ ಕಪಾಳದ ಮೇಲೆ ಹೊಡೆದಂತೆ...ಪ್ರತಿ ಕ್ಷಣವೂ ಸೆಪ್ಟೆಂಬರ್ ೧೧ ರ ಭಯೋತ್ಪಾದನೆಯನ್ನು ನೆನೆಸಿದಂತೆ ಎಂದು ಬೊಬ್ಬೆ ಇಡುತ್ತಿದ್ದಾರೆ. ಕೆಲವು ಕ್ರೈಸ್ತ ಧಾರ್ಮಿಕ ಗುರುಗಳು ಇದನ್ನು ಅವಕಾಶವನ್ನಾಗಿ ಪರಿವರ್ತಿಸಿಕೊಂಡು ತಮ್ಮ ಬೆಂಬಲಿಗರಿಗೆ ವಿಷಯವನ್ನು ಸರಿಯಾಗಿ ಸ್ಪಷ್ಟವಾಗಿ ತಿಳಿಸುವುದರ ಬದಲು, ಭಾವನೆಗಳನ್ನು ಅನವಶ್ಯಕ ಕದಡುತ್ತಿದ್ದಾರೆ.
 
ನ್ಯೂಯಾರ್ಕಿನಲ್ಲಿ ಆಗುತ್ತಿರುವುದು ಇಷ್ಟೇ. ವರ್ಲ್ಡ್ ಟ್ರೇಡ್ ಸೆಂಟರ್ ಇದ್ದ ಜಾಗಕ್ಕಿಂತ ಎರಡು ರಸ್ತೆಗಳ ದೂರದಲ್ಲಿ ಹಲವಾರು ಮಿಲಿಯನ್ ಡಾಲರ್ಗಳ ವೆಚ್ಚದಲ್ಲಿ, ಇಸ್ಲಾಮ್ ಸಾಂಸ್ಕೃತಿಕ ಕೇಂದ್ರವೊಂದನ್ನು ಕಟ್ಟಬೇಕು ಎಂದು ಅಮೆರಿಕನ್ ಸೊಸೈಟಿ ಫಾರ್ ಮುಸ್ಲಿಮ್ ಅಡ್ವಾನ್ಸ್ಮೆಂಟ್ ಮುಂದೆ ಬಂದಿದೆ. ಈ ಯೋಜನೆಯ ರೂವಾರಿ ಇಮಾಮ್ ಫೈಸಲ್ ಅಬ್ದುಲ್ ರೌ. ಈ ಕೇಂದ್ರ ಭಯೋತ್ಪಾದನೆಗೆ ಸವಾಲಾಗುವ ಕೇಂದ್ರವಾಗಬೇಕು, ಅಮೆರಿಕಾ ಮುಸಲ್ಮಾನರನ್ನು ಭಯೋತ್ಪಾದಕರು ಎನ್ನುವಂತೆ ನೋಡುವಂತಾಗಬಾರದು, ಮುಂದಿನ ತಲೆಮಾರುಗಳೂ ಸೆಪ್ಟೆಂಬರ್ ೧೧ ರ ಘಟನೆಯನ್ನು ಮರೆತು ಸೌಹಾರ್ದದಿಂದ ಇರಬೇಕೆನ್ನುವುದು ಇದರ ಉದ್ದೇಶ. ೩ ವರ್ಷಗಳ ಹಿಂದೆ ೨೦,೦೦೦ ಡಾಲರ್ ಗಳ ಆಸ್ತಿಯನ್ನು ತೋರಿಸಿದ್ದ ಅಮೆರಿಕನ್ ಸೊಸೈಟಿ ಫಾರ್ ಮುಸ್ಲಿಮ್ ಅಡ್ವಾನ್ಸ್ಮೆಂಟ್ ಈಗ ಇಂತಹ ಭಾರೀ ಯೋಜನೆಯನ್ನು ಯಾರ ಹಣಕಾಸಿನ ಸಹಾಯದಿಂದ ನಿರ್ವಹಿಸುತ್ತದೆ? ಈ ಕೇಂದ್ರದ ಉಸ್ತುವಾರಿ ಯಾರಿಂದ? ಎಂಬ ಪ್ರಶ್ನೆ ಜನರದ್ದು. ಈಗಾಗಲೇ ತಾವೂ ಹಣ ಸಹಾಯ ಮಾಡುವುದಾಗಿ ಹೊರ ರಾಷ್ಟ್ರದ ಮುಸಲ್ಮಾನರೂ ಮುಂದೆ ಬಂದಿರುವುದರಿಂದ ಪರಿಸ್ಥಿತಿ ಇನ್ನೂ ಬಿಸಿಯಾಗುತ್ತಿದೆ. ಇದು ಸಧ್ಯಕ್ಕೆ ನಿಲ್ಲುವ ವಿವಾದವಲ್ಲ. ಈ ಸುದ್ದಿ ಎತ್ತ ಸಾಗುತ್ತದೆಂದು ನೊಡೋಣ.