ಬೇಕಾಗುವ ಪದಾರ್ಥಗಳು:

ಪುಡಿ ಮಾಡಿಕೊಳ್ಳಲು-

ಕಡಲೆಬೇಳೆ-೧ ಟೇಬಲ್ ಸ್ಪೂನ್
ಉದ್ದಿನಬೇಳೆ-೧ ಟೇಬಲ್ ಸ್ಪೂನ್
ಧನಿಯಾ-೧ ಟೇಬಲ್ ಸ್ಪೂನ್
ಒಣಮೆಣಸಿನಕಾಯಿ-೬-೮
ಒಣಕೊಬರಿ-೧ ಟೇಬಲ್ ಸ್ಪೂನ್
ಬಿಳಿಎಳ್ಳು- ೧ ಟೀ ಸ್ಪೂನ್
ಲವಂಗ-೨
ಚಕ್ಕೆ- ಅರ್ಧ ಇಂಚು
ಜೀರಿಗೆ-೧ ಟೀ ಸ್ಪೂನ್
ಕಾಳು ಮೆಣಸು-೬-೮
ಕರಿಬೇವಿನ ಎಲೆ-೧ ಕಡ್ಡಿ
ಪೈನಾಪಲ್ ಹೂ-೧-೨ (ಬೇಕಿದ್ದರೆ)
ಗಸಗಸೆ-೧ ಟೀ ಸ್ಪೂನ್

(ಮೇಲೆ ತಿಳಿಸಿರುವ ಎಲ್ಲ ಪದಾರ್ಥಗಳನ್ನೂ ದಪ್ಪತಳದ ಬಾಣಲಿಯಲ್ಲಿ ಬೆಚ್ಚಗೆ ಹುರಿದುಕೊಂಡು ತಣಿಸಿ, ಮಿಕ್ಸಿಯಲ್ಲಿ ಅಥವಾ ಡ್ರೈ ಗ್ರೈಂಡರ್ ನಲ್ಲಿ ಪುಡಿಮಾಡಿಟ್ಟುಕೊಳ್ಳಿ.)

ಉಳಿದ ಪದಾರ್ಥಗಳು:

ತೊಗರಿಬೇಳೆ ೧ ಕಪ್
ಅಕ್ಕಿ ೧೧/೨ ಕಪ್
ತುಪ್ಪ - ೧ ಬಟ್ಟಲು
ಕ್ಯಾರೆಟ್ (ಹೆಚ್ಚಿದ್ದು)-ಕಾಲು ಕಪ್
ದೊಡ್ಡಮೆಣಸಿನಕಾಯಿ (ಹೆಚ್ಚಿದ್ದು)-ಕಾಲು ಕಪ್
ಹುರುಳಿಕಾಯಿ (ಕತ್ತರಿಸಿದ್ದು)-ಕಾಲು ಕಪ್
ಸೀಮೆಬದನೆಕಾಯಿ-ಕಾಲು ಕಪ್
ಹಸಿಬಟಾಣಿ-ಕಾಲು ಕಪ್
ಲೀಮಾ ಬೀನ್ಸ್-ಕಾಲು ಕಪ್ (ಇಷ್ಟವಿದ್ದರೆ)
ಉಪ್ಪು-ರುಚಿಗೆ
ಬೆಲ್ಲದ ತುರಿ-೧ ಟೀ ಚಮಚ
ಹುಣಸೆಹುಳಿ (ತೆಳುವಾದ್ದು)-೧ ಟೇಬಲ್ ಚಮಚ
ಎಣ್ಣೆ-ಅರ್ಧ ಕಪ್
ಹಿಂಗು-ಅರ್ಧ ಟೀ ಸ್ಪೂನ್
ಅರಿಶಿನ-೧ ಚಿಟಿಕೆ

ಬಿಸಿಬೇಳೆ ಬಾತ್

ವಿಧಾನ:

ಪುಡಿಯನ್ನು ಮೇಲೆ ತಿಳಿಸಿದ ವಿಧಾನದಲ್ಲಿ ಮಾಡಿಟ್ಟುಕೊಳ್ಳಿ.
ತೊಗರಿಬೇಳೆಯನ್ನು ಅದರ ಎರಡರಷ್ಟು ನೀರು ಹಾಕಿ, ಒಂದು ಚಿಟಿಕೆ ಅರಿಶಿನ ಸೇರಿಸಿ ಪ್ರೆಶರ್ ಕುಕ್ಕರ್ ನಲ್ಲಿ ಬೇಯಿಸಿಕೊಳ್ಳಿ. ತರಕಾರಿಯನ್ನು ಅತಿಯಾಗಿ-ಕಲಸಿದಂತೆ ಬೇಯದಂತೆ ಪ್ರತ್ಯೇಕವಾಗಿ ಮೈಕ್ರೋ ವೇವ್ ಮಾಡಿಕೊಳ್ಳಿ.
ಅಕ್ಕಿಯನ್ನು ಹೆಚ್ಚು ನೀರುಹಾಕದೆ ಅನ್ನ ಮಾಡಿಟ್ಟುಕೊಳ್ಳಿ. ಅದರಲ್ಲಿ ಗಂಟಿಲ್ಲದಂತೆ ಉದುರಾಗಿಸಿಟ್ಟುಕೊಳ್ಳಿ.
ಅಗಲ ಬಾಯಿಯ ದಪ್ಪ ತಳದ ಪಾತ್ರೆಯೊಂದರಲ್ಲಿ ೩-೪ ಚಮಚ ಎಣ್ಣೆ ಹಾಕಿ ಬೇಯಿಸಿದ ತರಕಾರಿಗಳನ್ನು ಹುರಿದುಕೊಳ್ಳಿ. ನಂತರ ಅದಕ್ಕೆ ೧ ಕಪ್ ನೀರು ಸೇರಿಸಿ.
ಬೇಯಿಸಿದ ಬೇಳೆ ಸೇರಿಸಿ, ಕೈಯ್ಯಾಡಿಸಿ.
ಒಂದು ಬಟ್ಟಲು ನೀರಿನಲ್ಲಿ ೪ ಟೀ ಚಮಚ ಬಿಸಿಬೇಳೆ ಬಾತ್ ಪುಡಿಯನ್ನು ಕಲೆಸಿಕೊಳ್ಳಿ (ಇದರಿಂದ ಪುಡಿ ಗಂಟಾಗುವುದಿಲ್ಲ). ಆ ನೀರನ್ನು ಬೇಳೆಗೆ ಸೇರಿಸಿ ಕೆಲವು ನಿಮಿಷ ಬೇಯಲು ಬಿಡಿ. (ನಿಮಗೆ ಪುಡಿಯ ಹೆಚ್ಚು ಬೇಕೆನಿಸಿದರೆ ಮತ್ತೆ ಹಿಂದಿನಂತೆಯೇ ಪುಡಿ ಸೇರಿಸಿ).
ಆಗಾಗ ಸೌಟಿನಲ್ಲಿ ತಿರುವುತ್ತಿರಿ.
ಬೇಳೆ ಮಸಾಲೆಯೊಂದಿಗೆ ಸ್ವಲ್ಪ ಬೆರೆತಿದೆ ಎನ್ನುವಾಗ ಅನ್ನವನ್ನು ಸೇರಿಸಿ. ಅನ್ನ-ಬೇಳೆ-ತರಕಾರಿ ಯ ಮಿಶ್ರಣ ಗಟ್ಟಿ
ಎನಿಸಿದರೆ ಮತ್ತೆ ಸ್ವಲ್ಪ ನೀರು ಸೇರಿಸಿ, ಮಿಕ್ಸ್ ಮಾಡಿ.
ನಂತರ ಹುಣಸೆ ಹುಳಿ ಸೇರಿಸಿ ೨-೩ ನಿಮಿಷ ಬೇಯಲು ಬಿಡಿ.
ರುಚಿಗೆ ಬೇಕಾಗುವಷ್ಟು ಉಪ್ಪು ಸೇರಿಸಿ. ಸರಿಯಾಗಿ ಮಿಕ್ಸ್ ಮಾಡಿ. ನಂತರ ಬೆಲ್ಲದ ತುರಿ ಸೇರಿಸಿ.
ಪುಟ್ಟ ಬಾಣಲೆಯೊಂದರಲ್ಲಿ ಅರ್ಧ ಚಮಚ ಎಣ್ಣೆ ಬಿಸಿಮಾಡಿ ಹಿಂಗನ್ನು ಅದಕ್ಕೆ ಹಾಕಿ ಅದನ್ನು ಬಿಸಿಬೇಳೆ ಬಾತ್ ಗೆ ಸೇರಿಸಿ.
ಚನ್ನಾಗಿ ಮಿಕ್ಸ್ ಮಾಡಿ, ೧ ಬಟ್ಟಲು ತುಪ್ಪ ಸೇರಿಸಿ, ಬಡಿಸಿ.