ಯಡಿಯೂರಪ್ಪ ಹಾಗು ಕುಮಾರಸ್ವಾಮಿ ನಡುವೆ ಈಗ ಕುಟುಂಬ ರಾಜಕಾರಣದ ಸಮರ ನಡೆಯುತ್ತಿದೆ. ಯಾರು ಕರ್ನಾಟಕವನ್ನು ಎಷ್ಟು ಲೂಟಿ ಮಾಡಿದ್ದಾರೆ ಎನ್ನುವುದು ಮುಂದಿನ ದಿನಗಳಲ್ಲಿ ಬಹಿರಂಗ ಆಗುವುದು ನಿಜ. ಆರೂವರೆ ಕೋಟಿ ಕರ್ನಾಟಕದ ಜನ ಈಗ ಇವರಿಬ್ಬರ ಜುಗಲ್ ಜಗ್ಗಾಟಕ್ಕೆ ಸಾಕ್ಷಿಯಾಗಲಿದ್ದಾರೆ. ಸರ್ಕಾರವನ್ನ ತಮ್ಮ ವೈಯಕ್ತಿಕ ಸೇಡಿನ ರಾಜಕಾರಣಕ್ಕೆ ಬಳಸಿಕೊಳ್ಳುವ ಮಾರ್ಗ ಹಿಡಿದಿರುವ ಯಡಿಯೂರಪ್ಪನವರ ಈ ಗೇಮ್ ಮುಂದೊಂದು ದಿನ ಅವರ ಕೈಗಳನ್ನೇ ಕಟ್ಟಿ ಹಾಕಿದರೂ ಅಚ್ಚರಿ ಪಡಬೇಕಿಲ್ಲ. ಈಗ ತಮ್ಮ ಜಾತಿಯ ರಕ್ಷಣೆಯಲ್ಲಿ ಮಿಂದು ಮುಳುಗಿರುವ ಯಡಿಯೂರಪ್ಪ ಅವರನ್ನ ಜಾತಿ ಮುಂದಿನ ದಿನಗಳಲ್ಲೂ ರಕ್ಷಿಸುತ್ತದೆ ಅನ್ನೋ ನಂಬಿಕೆ ಇದ್ದರೆ ಅದು ಅವರ ಭ್ರಮೆ! ಭಾರತದ ರಾಜಕೀಯ ಇತಿಹಾಸದಲ್ಲಿ ಜಾತಿ ರಾಜಕಾರಣವನ್ನ ಕಡೆಗಣಿಸಲು ಸಾದ್ಯವಿಲ್ಲ ಅನ್ನೋದು ನಿಜವೇ ಆದರೂ ಅದೇ ಸಂಪೂರ್ಣ ಮಾನದಂಡವಲ್ಲ. ಜಾತಿಯ ಸಂಕೋಲೆಯಿಂದ ಹೊರಬಂದು ನವ ರಾಜಕಾರಣವನ್ನು ಸೃಷ್ಟಿಸಬೇಕಾಗಿರುವ ಸಮಯದಲ್ಲಿ ಮತ್ತೆ ಜಾತಿಯ ಕೋಟೆ ಕಟ್ಟಿಕೊಂಡು ಅದರಲ್ಲಿ ಅಡಗಿಕೊಳ್ಳಲು ಸನ್ನದ್ದಾಗಿರುವ ಯಡಿಯೂರಪ್ಪ ಅವರ ಮನಸ್ಥಿತಿ ಭವಿಷ್ಯದ ದೃಷ್ಟಿಯಿಂದ ಅಪಾಯಕಾರಿಯಾದದ್ದು. ಬಿಹಾರದಲ್ಲಿ ರಾಜಕೀಯ ಸ್ಥಿರತೆ ಹಾಗು ಅಭಿವೃದ್ದಿಯ ಹರಿಕಾರನಾಗಿ ಎರಡನೇ ಬಾರಿಗೆ ಮುಖ್ಯಮಂತ್ರಿ ಗಾದಿ ಹಿಡಿದಿರುವ ನಿತೀಶ್ ಕುಮಾರ್ ಅವರ ಆಡಳಿತದ ಶೈಲಿ ಯಡಿಯೂರಪ್ಪ ಅವರ ಗಮನಕ್ಕೆ ಬಂದಿದ್ದರೆ ಕರ್ನಾಟಕಕ್ಕೆ ಈ ಪಾಟಿ ರಂಪ ನೋಡುವ ಅಗತ್ಯ ಬರುತ್ತಿರಲಿಲ್ಲ.

 
ಮಾಧ್ಯಮಗಳಿಗೆ ಈಗ ಸುದ್ದಿಯ ಸುಗ್ಗಿ. ಕ್ರೈಮ್ ರಿಪೋರ್ಟ್ ಬೇಡ. ಚಲನ ಚಿತ್ರ ಬೇಡ, ಸಾವು-ನೋವಿನ ಸುದ್ದಿ ಬೇಡ. ಹೀಗೆ ರಾಜಕೀಯ ಘಟಗಳು ಒಬ್ಬರ ಚಡ್ಡಿಯ ದಾರವನ್ನು ಇನ್ನೊಬ್ಬರು ಹಿಡಿದು ಜಗ್ಗಾಡುತ್ತಿರುವುದು ಅವರಿಗೆ ಲಾಟರಿ ಟಿಕೆಟ್ ಹೊಡೆದಂತೆ ಆಗಿದೆ.