ಏಡ್ಸ್ ಅನ್ನು ಯಾರು ಹರಡಿದರು? ಹೇಗೆ ಹರಡಿತು? ಎಂದು ತಿಳಿಯುವುದು ನಮ್ಮ ಅರಿವನ್ನು ಹರಿತ ಮಾಡಿಕೊಳ್ಳಲು, ಮಂಪರು ಹರಿಸಿಕೊಳ್ಳಲು. ಅದು ಈಗ ನೆನ್ನೆಯ ಸುದ್ದಿ. ಆದರೆ ಇವತ್ತಿಗೂ ಆಫ್ರಿಕಾದ ಬಡ ದೇಶಗಳಲ್ಲಿ, ಭಾರತ-ಥಾಯಿಲ್ಯಾಂಡ್ ಇತ್ಯಾದಿ ಹಲವಾರು ದೇಶಗಳ ಬಡಜನರಲ್ಲಿ ಕಾಡ್ಗಿಚ್ಚಿನಂತೆ ಹಬ್ಬುತ್ತಲೇ ಇರುವ ಏಡ್ಸ್ ಅನ್ನು ತಡೆಗಟ್ಟುವುದು ಹೇಗೆ? ತಡೆಗಟ್ಟುವಿಕೆಗೆ ನಾವು-ಜನಸಾಮಾನ್ಯರು ಯಾವ ರೀತಿಯಲ್ಲಿ ಕಾರಣರಾಗಬಹುದು? ಇದು ನಮ್ಮೆಲ್ಲರ ಮುಂದಿರುವ ಪ್ರಶ್ನೆ. ಪ್ರತಿ ವರ್ಷವೂ ಡಿಸೆಂಬರ್ ೧-ವಿಶ್ವ ಏಡ್ಸ್ ದಿನ ಬಂದು ಹೋಗುತ್ತಿದೆ. ಹೋದ ವರ್ಷದ ಏಡ್ಸ್ ದಿನವನ್ನು ಕಂಡಿದ್ದ ಹಲವಾರು ಸೋಂಕು ತಗುಲಿರುವ ಮಂದಿ ಈ ವರ್ಷದ ಡಿಸೆಂಬರ್ ನ ಮುಖವನ್ನೂ ಕಾಣುವುದಿಲ್ಲ. ಆಫ್ರಿಕಾ-ಇಂಡಿಯಾದ ಪುಟ್ಟ ಮಕ್ಕಳಲ್ಲಿ, ಕಾರ್ಮಿಕ ಹೆಂಗಸರಲ್ಲಿ, ಗರ್ಭಸ್ತ ಶಿಶುಗಳಲ್ಲಿ ಆಗಲೇ ತನ್ನ ಬೀಜ ಹಾಕಿ ಅವರನ್ನು ಕಣ ಕಣವಾಗಿ ಕಬಳಿಸಲು ತಯಾರಿರುವ ಏಡ್ಸ್ ಗೆ ಕಡಿವಾಣ ಹಾಕಲು ಅರಿವಿನಿಂದ ಮಾತ್ರ ಸಾಧ್ಯ. ಅವರಿಗೆ ಬಂದಿದೆ...ನಮಗಲ್ಲವಲ್ಲಾ...ಅಂತ ಮುಸುಕು ಹೊದ್ದು ಕೂತ ಅರಿವುಗೇಡಿಗಳನ್ನು ಗೋಳಾಡಿಸಲು ಇಂತಹ ಸೋಂಕುಗಳಿಗೆ ಹೆಚ್ಚು ಸಮಯ ಬೇಕಾಗುವುದಿಲ್ಲ...