ಅಂಗಳ      ಖುರಪುಟ
Print this pageAdd to Favorite

 




ಅಧ್ಯಕ್ಷೀಯ ಕಜೆ: ಡೊನಾಲ್ಡ್ ಟ್ರಂಪ್ ಎಂಬ ಸಿಂಗಳೀಕ

ಅಧ್ಯಕ್ಷೀಯ ಚುನಾವಣೆ ಬರಲು ಇನ್ನೂ ಎರಡು ವರ್ಷವಿದೆ. ಆಗಲೇ ರಿಪಬ್ಲಿಕನ್ ಪಕ್ಷದಿಂದ, ಪಕ್ಷೇತರರಾಗಿ ನಾವು ಮುಂದಿನ ಅಭ್ಯರ್ಥಿಗಳಾಗಲಿಕ್ಕೆ ತಯಾರಿದ್ದೀವಿ ಎಂದು ತಲೆಗಳು ಮೇಲೇಳುತ್ತಿವೆ. ಕೆಲವು ತಲೆಗಳಲ್ಲಿ ಸ್ವಲ್ಪವಾದರೂ ಸ್ವತ್ತು ಇರುವಂತಿದ್ದರೆ ಇನ್ನುಳಿದವು ಬರೀ ಗಂಟೆಗಳು!
 
ಡೊನಾಲ್ಡ್ ಟ್ರಂಪ್ ಎಂಬ ಒಂದು ಗಂಟೆ ಇದು. ಟ್ರಂಪ್ ಅಮೆರಿಕಾದ ಒಬ್ಬ ಯಶಸ್ವಿ ರಿಯಲ್ ಎಸ್ಟೇಟ್ ವ್ಯಾಪಾರಸ್ತ. ಲಾಸ್ ವೇಗಸ್, ನ್ಯೂಯಾರ್ಕ್ ಗಲಲ್ಲಿ ತನ್ನ ಸಾಮ್ರಾಜ್ಯ ಕಟ್ಟಿಕೊಂಡಿರುವವರು. ದುಡ್ಡಾಧಿಪತಿ. ಕೆಲವು ವಾರಗಳಿಂದ ಟ್ರಂಪ್ ನಾನು ಮುಂದಿನ ಅಧ್ಯಕ್ಷೀಯ ಚುನಾವಣೆಯಲ್ಲಿ ನಿಲ್ಲುತ್ತೇನೆಂದು ಸುದ್ದಿ ಮಾಡುತ್ತಿದ್ದಾರೆ. ಸುದ್ದಿ ಮಾಡಲು ಆತ ಹಿಡಿದಿರುವ ದಾರಿ ಮಾತ್ರ ನಿಜಕ್ಕೂ ಹೇಸಿಗೆಯದ್ದು. ಅಮೆರಿಕಾದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಸ್ಪರ್ಧಿಸ ಬಯಸುವವರು ದೇಶದ ಪ್ರಸಕ್ತ ಸಮಸ್ಯೆಗಳ ಬಗ್ಗೆ ಮಾತಾಡಬೇಕು, ಆರ್ಥಿಕ ಹಿನ್ನಡೆತದ ಬಗ್ಗೆ ಗಮನ ಕೊಡಬೇಕು...ಅದು ಬಿಟ್ಟು ಡೊನಾಲ್ಡ್ ಟ್ರಂಪ್ ಬರಾಕ್ ಒಬಾಮಾರ ಹುಟ್ಟು, ಆತ ನಿಜಕ್ಕೂ ಅಮೆರಿಕಾದ ಪ್ರಜೆ ಹೌದೇ? ಅವರಿಗೆ ಪ್ರತಿಷ್ಟಿತ ಹಾರ್ವರ್ಡ್ ಸ್ಕೂಲ್ ಆಫ್ ಲಾ ನಲ್ಲಿ ಪ್ರವೇಶ ಸಿಕ್ಕಿದ್ದು ಹೇಗೆ? ಎಂಬೆಲ್ಲ ವಿಷಯಗಳ ಬಗ್ಗೆ ಅನಗತ್ಯ ಗಲಾಟೆ ಹುಟ್ಟಿಸುತ್ತಿದ್ದಾರೆ.

ಬರಾಕ್ ಒಬಾಮಾ ಅಮೆರಿಕಾದ ಅಧ್ಯಕ್ಷ ಗಾದಿಗೆ ಸ್ಪರ್ಧಿಸಿದಾಗಿನಿಂದಲೂ ಕೆಲವು ರಿಪಬ್ಲಿಕನ್ನರು ಮತ್ತು ಇವತ್ತಿಗೂ ಜನಾಂಗೀಯ ಶ್ರೇಷ್ಟತೆಯನ್ನು ನಂಬಿ ಕೂತಿರುವ ಕೆಲವರು ಅವರು ಅಮೆರಿಕಾದಲ್ಲಿ ಹುಟ್ಟಿದ್ದೇ ನಿಜವಲ್ಲ ಎಂಬಂತೆ ವಾದಿಸುತ್ತಾ ಬಂದಿದ್ದಾರೆ. ಅವರು ಓದಿದ್ದೂ ಕೂಡಾ ಸೌದಿ ದೊರೆಗಳ ಆರ್ಥಿಕ ಸಹಾಯದಿಂದ, ಅವರು ಅಮೆರಿಕಾದ ಅಧ್ಯಕ್ಷರಾಗಿರುವುದೂ ಒಂದು ಪಿತೂರಿಯೇ ಎಂಬಂತೆ ಒದರಾಡುತ್ತಾರೆ. ಆದರೆ ಟ್ರಂಪ್ ತಾನು ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸುತ್ತೇನೆ ಎಂದು ಹೇಳಿಕೊಂಡು, ಮಾಧ್ಯಮಗಳ ಗಮನ ಸೆಳೆದು ಒಬಾಮಾರ ವಿರುದ್ಧ ಈ ರೀತಿಯ ಕೆಳದರ್ಜೆಯ ಯುದ್ಧ ಸಾರಿರುವುದು ಅಮೆರಿಕಾದ ಅಧ್ಯಕ್ಷೀಯ ಚುನಾವಣೆ ಇನ್ನು ಕೆಲವೇ ತಿಂಗಳುಗಳಲ್ಲಿ ಯಾವ ರೂಪ ಪಡೆಯಬಲ್ಲದು ಎಂದು ತೋರಿಸುತ್ತಿದೆ.
 
ಟ್ರಂಪ್ ಅವರ ಕೆಟ್ಟ ವಾಗ್ದಾಳಿಗೆ ’ನನ್ನಲ್ಲಿ ಈ ಸಿಲ್ಲಿತನಕ್ಕೆಲ್ಲಾ ಸಮಯವಿಲ್ಲ’ ಎಂದಿರುವ ಒಬಾಮಾ ಆದರೂ ತಮ್ಮ ಜನ್ಮ ಪ್ರಮಾಣ ಪತ್ರವನ್ನು ಮಾಧ್ಯಮಗಳಿಗೆ ಬಿಡುವು ಮಾಡಿದ್ದಾರೆ. ಈ ಪ್ರಬಲ ದೇಶದ ಅಧ್ಯಕ್ಷನಾದರೂ ಒಬ್ಬ ಆಫ್ರಿಕನ್-ಮುಸಲ್ಮಾನ ಮೂಲದವನಾಗಿರುವ ಏಕೈಕ ಕಾರಣಕ್ಕೆ ಡೊನಾಲ್ಡ್ ಟ್ರಂಪ್ ನಂತ ಸಿಂಗಳೀಕರ ಜನಾಂಗೀಯ ನೀಚತನಗಳಿಗೆ ಉತ್ತರ ಹೇಳಲೇ ಬೇಕೆಂಬುದು ವಿಪರ್ಯಾಸ.
 


 




ಅಮೆರಿಕಾಗ್ಯಾಕೆ ರಾಜಮನೆತನದ ಒಬ್ಸೆಷನ್?!

ಮೊನ್ನೆ ಬ್ರಿಟನ್ನಿನ ರಾಜಕುಮಾರ ’ಸಾಮಾನ್ಯ’ಳೊಬ್ಬಳನ್ನು ಮದುವೆಯಾದ. ತಮ್ಮದೇ ಮನೆಯಲ್ಲಿ ಮದುವೆಯಾಯಿತೆನ್ನುವಷ್ಟು ಬ್ರಿಟನ್ ತುಂಬಾ ಅದೇ ಸಂಭ್ರಮ. ಜನ ಈ ವಧು ವರನನನ್ನು ನೋಡಲು ಟೆಂಟು ಹಾಕಿ ಕಾಯುತ್ತಿದ್ದರಂತೆ! ಹೋಗಲಿ ಬಿಡಿ. ಅವರ ದೇಶ, ಅವರ ಸಡಗರ, ಅವರ ರಾಜಕುಮಾರ, ಅವನ ಹೊಸ ಹೆಂಡತಿ...
ಆದರೆ ಬ್ರಿಟನ್ನಿನ ಪಾಲಿಸಿಗಳನ್ನು, ಅಲ್ಲಿನ ಜೀವನ ಶೈಲಿಯನ್ನು ತಿರಸ್ಕರಿಸಿ, ಬಂಡಾಯವೆದ್ದು, ಎಲ್ಲವನ್ನೂ ಅದರ ವಿರುದ್ಧವಾಗೇ ಮಾಡಿ ನಾಡು ಕಟ್ಟಿದ ಅಮೆರಿಕನ್ನರಿಗೆ ಅದರಲ್ಲೂ ಅಮೆರಿಕಾದ ಶ್ರೀಮಂತರಿಗೆ ಮತ್ತು ಮಾಧ್ಯಮದವರಿಗೆ ಬ್ರಿಟನ್ನಿನ ರಾಜ ಮನೆತನದವನನ್ನು ಕಂಡರೆ ಇಲ್ಲದ ಒಬ್ಸೆಷನ್. ನಿಮಗೆ ಗೊತ್ತಿರಬಹುದು, ಬ್ರಿಟನ್ನಿನಲ್ಲಿ ಬೀಗ ತೆಗೆಯಲು ಕೀಯನ್ನು ಬೀಗದೊಳಗೆ ತುರುಕಿಸಿ ಬಲಗಡೆಗೆ ತಿರುಗಿಸಿದರೆ ಅಮೆರಿಕಾದಲ್ಲಿ ಎಡಗಡೆಗೆ ತಿರುಗಿಸಬೇಕು, ಬ್ರಿಟನ್ನಿನಲ್ಲಿ ವಾಹನಗಳು ರಸ್ತೆಯ ಎಡಬದಿಯಲ್ಲಿ ಚಲಿಸಿದರೆ ಅಮೆರಿಕಾದಲ್ಲಿ ವಾಹನಗಳು ಬಲಬದಿಯಲ್ಲಿ ಚಲಿಸಬೇಕು, ಅದಿರಲಿ ಬ್ರಿಟನ್ನಿನ ಕಕ್ಕಸ್ಸುಗಳಲ್ಲಿ ಫ್ಲಶ್ ಮಾಡಿದರೆ ನೀರು ಯಾವ ದಿಕ್ಕಿನಲ್ಲಿ ತಿರುಗಿ ಚರಂಡಿಗೆ ಹೋಗುತ್ತದೋ ಅಮೆರಿಕಾದಲ್ಲಿ ಅದರ ವಿರುಧ್ಧ ದಿಕ್ಕಿಗೆ ತಿರುಗುತ್ತದೆ! ಇಂಥಾ ಉದಾಹರಣೆಗಳು ಅನೇಕ. ಅಂಥದ್ದರಲ್ಲಿ...
 
ರಾಜಕುಮಾರ ಮತ್ತು ವಿಲಿಯಮ್ಸ್ ಮತ್ತು ಕೇಟ್ ರ ಮದುವೆಯ ಸಂದರ್ಭದ ನೆನಪಿಗಾಗಿ ಅಮೆರಿಕಾದ ಅಂಚೆ ಇಲಾಖೆ ಹೊಸದೊಂದು ಸ್ಟಾಂಪ್ ಅನ್ನು ತರಲಿದೆ! ಅಮೆರಿಕಾದ ಮಾಧ್ಯಮಗಳೂ ವಿಶ್ವದ ಇತರೆ ಹಲವು ದೇಶಗಳಂತೆ ಅವರ ಮದುವೆಯನ್ನು ನೇರ ಪ್ರಸಾರ ಮಾಡಲಿದ್ದಾರೆ...ಈ ಇಡೀ ವಾರಾಂತ್ಯ ಅಮೆರಿಕಾದ ಜನ ’ರಾಯಲ್’ ಮದುವೆಯ ಟಿವಿ ಪ್ರಸಾರವನ್ನು ಸ್ನೇಹಿತರು, ಬಂಧುಗಳ ಜೊತೆ ಕಲೆತು ’ರಾಯಲ್ ವೆಡ್ಡಿಂಗ್ ಪಾರ್ಟಿ’ ಮಾಡಿಕೊಂಡು, ಊಟ, ಡ್ಯಾನ್ಸ್ ಮಾಡಿಕೊಂಡು ಜೊತೆಯಾಗಿ ಹೇಗೆ ನೋಡಬಹುದು ಅಂತ ಮಾಧ್ಯಮಗಳು ಸಲಹೆ ಕೊಡುತ್ತಿವೆ. ’ಹೌ ಟು ಥ್ರೋ ರಾಯಲ್ ವೆಡ್ಡಿಂಗ್ ಪಾರ್ಟಿ’ ಅಂತ ಹಣೆಬರಹದಲ್ಲಿ ಮ್ಯಾಗಜೀನುಗಳೂ ಮಾರಾಟವಾಗುತ್ತಿವೆ!
 
ರಾಯಲ್ ವೆಡ್ಡಿಂಗ್ ನ ನೇರ ಪ್ರಸಾರ ಆದಮೇಲೆ ಹತ್ತು ಹಲವು ಟಿವಿ ಚಾನೆಲ್ ಗಳು ಮದುವೆಯ ’ಆಫ್ಟರ್ ಪಾರ್ಟಿ’ ಮಾಡಿಕೊಂಡು ಯಾರು ಯಾವ ಬಟ್ಟೆ ಹಾಕಿಕೊಂಡಿದ್ದರು? ಹೇಗೆ ಹಾಕಿಕೊಂಡಿದ್ದರು? ಯಾವ ಡಿಸೈನರ್ ಬಟ್ಟೆ ಚನ್ನಾಗಿತ್ತು? ಯಾರ ಡ್ರೆಸ್ ಸೆನ್ಸ್ ಹೇಗಿತ್ತು? ಕೇಟ್ ಹೇಗೆ ಕಾಣುತ್ತಿದ್ದಳು ಅವರಮ್ಮ ಹೇಗೆ ಕಾಣುತ್ತಿದ್ದರು? ರಾಣಿಯ ಮುಖಭಾವ ಹೇಗಿತ್ತು? ವಧು ವರರ ಕಿಸ್ ಹೇಗಿತ್ತು ಅಂತ ಕಾಮೆಂಟ್ ಮಾಡಿಕೊಂಡು ಕೂತಿದ್ದಾರೆ!!!
ಪಾಪ! ಯಾವತ್ತೂ ಯಾವ ರಾಜ ರಾಣಿಯರಿಂದಲೂ ಆಳಿಸಿಕೊಳ್ಳದ ಅಮೆರಿಕಾಗೆ ಒಂಥರಾ ಅನಾಥ ಪ್ರಜ್ನೆ ಕಾಡುತ್ತದೋ ಏನೋ? ನಮ್ಮ ದೇಶದಲ್ಲಿ ಕೆಲಸಕ್ಕೆ ಬಾರದೆ ಕೂತಿರುವ ಒಂದಷ್ಟು ’ರಾಯಲ್’ ಜನರನ್ನು ಅಮೆರಿಕಾಗೆ ಶಿಪ್ ಮಾಡಿದರೆ ಹೇಗೆ?
 

 










 
 
 
 
 
Copyright © 2011 Neemgrove Media
All Rights Reserved