(ಪುಟ ೧೬)

 

ತೈಥಕ ಥಕಥಕ ಕುಣೀಸುತಲಿತ್ತಾ... ಮ್ಯಾಕ್ರೋ ಶಾಪಿಂಗ್ ಮಾಡಿಸುತಿತ್ತಾ...ಹಸಿರೂ ಕಾಂಚಾಣಾ!!

(ಪುಟ ೧)

(ಪುಟ ೨)

(ಪುಟ ೩)

(ಪುಟ ೪)

(ಪುಟ ೫)

(ಪುಟ ೬)

(ಪುಟ ೭)

(ಪುಟ ೮)

(ಪುಟ ೯)

(ಪುಟ ೧೦)

(ಪುಟ ೧೧)

(ಪುಟ ೧೨)

ನಾನು ಬಂದ ಹೊಸತರಲ್ಲಿ ಒಂದು ಸಂಜೆ ಪ್ರಶಾಂತ್ ನನ್ನನ್ನು ಕಾಸ್ಟ್ ಕೋ ಎನ್ನುವ ಬೃಹತ್ ಅಂಗಡಿಯೊಂದಕ್ಕೆ ಕರೆದುಕೊಂಡು ಹೋಗಿದ್ದರು. ಒಂದು ದೊಡ್ಡ ಫ್ಯಾಕ್ಟರಿಯಷ್ಟು ದೊಡ್ಡ ಅಂಗಡಿ! ಅಮೆರಿಕನ್ನರು ಬಳಸುವ ದಿನಸಿಗಳಾದ ಬ್ರೆಡ್, ಸೀರಿಯಲ್, ಬೆಣ್ಣೆ, ಚೀಜ಼್, ಮೊಸರು, ಮಾಂಸ, ಹಣ್ಣುಗಳು, ಬಟ್ಟೆ, ಚಾಕೊಲೇಟ್, ಮನೆಗೆ ಪೀಠೋಪಕರಣಗಳು, ಗಿಡಗಳು, ಕಾರಿಗೆ ಟೈರ್, ಪ್ಲಾಸ್ಟಿಕ್ ತಟ್ಟೆ ಲೋಟಗಳು, ಹಾಸಿಗೆ, ಬಟ್ಟೆ ಒಗೆಯುವ ಸೋಪು ಹೀಗೆ ಎಲ್ಲವೂ ಸಿಗುವ ಬೃಹತ್ ಅಂಗಡಿ. ನನಗೆ ಕಾಸ್ಟ್ ಕೋ ಹೊಕ್ಕಾಗ ಅದರ ಗಾತ್ರ, ಅಲ್ಲಿ ರಾಶಿ ರಾಶಿಯಾಗಿ ಪೇರಿಸಿಟ್ಟಿದ್ದ ಅಗಾಧ ಸಾಮಾನುಗಳನ್ನು ನೋಡುತ್ತಾ ಇದೇನು ಯುದ್ಧ ಕಾಲ ಬಂದರೆ ಬೇಕಾಗುತ್ತೆ ಅಂತ ಇಷ್ಟೋಂದನ್ನು ಒಟ್ಟಿಗೆ ಸ್ಟೋರ್ ಮಾಡಿಕೊಂಡು ಇಟ್ಟಿದ್ದಾರೇನಪ್ಪಾ!? ಅನ್ನುವಷ್ಟು ಆಶ್ಚರ್ಯ ಪಟ್ಟಿದ್ದೆ. ನಾನು ಕಳೆದು ಹೋಗುವ ಪಾರ್ಟಿ ಅಂತ ಈಗ ಚನ್ನಾಗಿ ಗೊತ್ತಾಗಿದ್ದ ಪ್ರಶಾಂತ ಇಡೀ ಅಂಗಡಿಯನ್ನು ನಿನ್ನದೇ ಪೇಸ್ ನಲ್ಲಿ ಆರಾಮಾಗಿ ಸುತ್ತಾಡು ಅಂತ ನನ್ನನ್ನು ಅಲ್ಲೊಂದು ಕಡೆ ಬಿಟ್ಟು, ಕೈಗೆ ಸೆಲ್ ಫೋನ್ ತಗುಲಿಸಿ ಶಾಪಿಂಗ್ ಲಿಸ್ಟ್ ಹಿಡಿದು ಅಂಗಡಿಯ ಒಳಗೆ ಹೊಕ್ಕಿದ್ದರು. (ಹೊರಗೆ ಹೋದಾಗ ನಾನು ಎಲ್ಲಾದರೂ ನೋಡುತ್ತಾ ಅಲ್ಲೇ ಕಣ್ಣು ಮೂಗು ಬಾಯಿ ಬಿಟ್ಟುಕೊಂಡು ನಿಂತು ಬಿಡುತ್ತಿದ್ದೇನಾದ್ದರಿಂದ ಪ್ರಶಾಂತನಿಂದ ಕಳೆದುಹೋಗದಿರಲಿ ಅಂತ ನನಗೊಂದು ಸೆಲ್ ಫೋನ್ ಕೊಡಿಸಲಾಗಿತ್ತು). ನೂರಾರು ಬಲ್ಬ್ ಗಳ ಬೆಳಕಿನಲ್ಲಿ ಬೆಳ್ಳಂಬೆಳಿಗ್ಗೆಯಂತೆ ಕೋರೈಸುತ್ತಿದ್ದ ಆ ಬೃಹತ್ ಸಾಮಾನು ಫ್ಯಾಕ್ಟರಿಯ ಪ್ರತಿಯೊಂದು ಐಲ್ ಗಳನ್ನೂ ಮೇಲಿಂದ ಕೆಳಕ್ಕೆ ನೋಡುತ್ತಾ ತಿರುಗಾಡಿದ್ದೆ.
　
ಮುಕ್ಕಾಲು ಗಂಟೆಯಲ್ಲಿ ಪ್ರಶಾಂತ ಕಾಲ್ ಮಾಡಿ ನಾನಿದ್ದಲ್ಲಿಗೆ ಬಂದರು. ಒಂದು ದೊಡ್ಡ ಶಾಪಿಂಗ್ ಕಾರ್ಟ್ ನ ತುಂಬಾ ಸಾಮಾನು ತಂದಿದ್ದರು. ನಮ್ಮಲ್ಲಿ ಸೀಮೆಎಣ್ಣೆ ತುಂಬಿಸಿಕೊಳ್ಳುವಂತಹ ಪ್ಲಾಸ್ಟಿಕ್ ಕ್ಯಾನ್ ಗಳನ್ನು ಹೋಲುವ ಎರಡು ಕ್ಯಾನ್ ಗಳಲ್ಲಿ ಹಾಲು ತಂದಿದ್ದರು. ದೊಡ್ಡ ಸೀರಿಯಲ್ ಡಬ್ಬ, ಇನ್ನೂ ಹಣ್ಣಾಗಲು ವಾರ ತಾಗುವ ಹಸಿರು ಬಾಳೆ ಹಣ್ಣುಗಳು, ಒಂದಷ್ಟು ದಪ್ಪಮೆಣಸಿನಕಾಯಿ, ಚಾಕೊಲೇಟ್, ಐವತ್ತು ಅರವತ್ತು ಟಿಶ್ಯೂ ಪೇಪರ್ ರೋಲ್ ಗಳ ಪ್ಯಾಕ್ ಹೀಗೇ...ಐವತ್ತು ಜನರಿಗೆ ಒಮ್ಮೆಗೇ ಅಡಿಗೆ ಮಾಡಲು ಸಾಕಾಗುವ ಸಾಮಾನುಗಳನ್ನು ತಂದಿದ್ದರು. ’ಯಾಕಪ್ಪಾ ಇಡೀ ಸ್ಯಾನ್ ಫ್ರಾನ್ಸಿಸ್ಕೋ ಜನರ ಬಮ್ ಒರೆಸುವಷ್ಟು ಟಿಶ್ಯೂ ತಂದಿದ್ದೀಯಲ್ಲಾ...ಕಮ್ಯೂನಿಟಿ ಸರ್ವಿಸ್ ಮಾಡೋಣಾ ಅಂತಲಾ ಅಥವಾ ಅಂಗಡಿ ಇಡೋಣಾ ಅಂತಲಾ?!’ ನಾನು ಗೆಳೆತನದ ಸಲುಗೆಯಿಂದ ಕಿಚಾಯಿಸಿ ಕೇಳಿದ್ದೆ. ಆಗ ಗೊತ್ತಾಗಿದ್ದು ನನಗೆ ಈ ಕಾಸ್ಟ್ ಕೋ ದ ವಿಷಯ. ಕಾಸ್ಟ್ ಕೋ ಒಂದು ಹೋಲ್ ಸೇಲ್ ಮಾರುಕಟ್ಟೆ. ಇಲ್ಲಿ ಹೆಚ್ಚು ಕೊಂಡಷ್ಟೂ ಬೆಲೆ ಕಡಿಮೆ. ಎಲ್ಲವನ್ನೂ ಬಂಡಲ್ ಬಂಡಲ್ ಗಳಲ್ಲಿಯೇ ಕೊಳ್ಳಬೇಕಿತ್ತು! ಕಾರಿನ ಟ್ರಂಕ್ ತುಂಬಿ ತುಳುಕುವಷ್ಟು ಹೋಲ್ ಸೇಲ್ ಆಗಿ ಖರೀದಿ ಮಾಡಿ ಮನೆಗೆ ಬರುವಾಗ ನಾನು ಕಾರಿನಲ್ಲಿದ್ದೆ, ಮನಸ್ಸು ಊರಿಗೆ ಬಂದಿತ್ತು.
　
ನಾವು ತುಂಬಾ ಚಿಕ್ಕವರಿರುವಾಗ ನಮ್ಮ ಮನೆಗೆ ಪಕ್ಕದ ಬೀದಿಯ ನಾಯರ್ ಅಂಗಡಿಯಿಂದ ಸಾಮಾನು ತರುತ್ತಿದ್ದೆವು. ಅಕ್ಕಿ, ರಾಗಿ, ಕೆಲವು ಕಾಳುಗಳು ಊರಿಂದ ಬಂದರೂ ಧನಿಯಾ, ಮೆಣಸಿನಕಾಯಿ, ಇತ್ಯಾದಿ ಮಸಾಲೆ, ತರಕಾರಿ, ಎಣ್ಣೆಗಳೆಲ್ಲಾ ನಾಯರ್ ಅಂಗಡಿಯಿಂದಲೇ ಸಪ್ಲೈ ಆಗುತ್ತಿತ್ತು. ತಿಂಗಳಿಗೊಮ್ಮೆ ಸಾಮಾನು ತರುವ ಅಭ್ಯಾಸ ಆಗ ಇರಲಿಲ್ಲ. ಅವತ್ತು ಬೆಳಿಗ್ಗೆ ಅಮ್ಮ ಉಪ್ಪಿಟ್ಟು ಮಾಡಲು ಡಿಸೈಡ್ ಮಾಡಿದರೆ ನಾಲ್ಕಾಣಿ ಕೊತ್ತಂಬರಿ ಸೊಪ್ಪು, ಒಂದು ನಿಂಬೆ ಹಣ್ಣು, ಒಂದು ರುಪಾಯಿಗೆ ಹಸಿಮೆಣಸಿನಕಾಯಿ, ಒಂದು ಪಾವು ಉಪ್ಪಿಟ್ಟು ರವೆ-ಅಮ್ಮ ಗಟ್ಟು ಹಾಕಿಸಿ ಕೈಗೆ ಮೂರೋ ನಾಲ್ಕೋ ರುಪಾಯಿ ಕೊಟ್ಟು ’ಚಿಲ್ಲರೆ ಜೋಪಾನ ಕಣ್ರೋ...ಸರಿಯಾಗಿ ಲೆಕ್ಕ ಹಾಕಿಕೊಂಡು ಬನ್ನಿ. ಸಾಮಾನು ಹುಷಾರು...ದಾರೀಲಿ ತೂಕಡಿಸಿ ತಪ್ ಅನ್ನಬೇಡಿ’!’ ಅಂತೆಲ್ಲಾ ಎಚ್ಚರಿಕೆ ಕೊಟ್ಟು ಕಳಿಸುತ್ತಿದರು. ನಾನು ನನ್ನ ತಮ್ಮ ನಾಯರ್ ಮುಂದೆ ನಮ್ಮ ಲಿಸ್ಟ್ ಒದರಿಬಿಟ್ಟರೆ ಸಾಕು, ಆತನೇ ರವೆಯನ್ನು ಕೋನಾಕಾರದ ಪೇಪರ್ ಚೀಲ ಕಟ್ಟಿ, ಉಳಿದ ಸಾಮಾನುಗಳನ್ನು ನಮ್ಮ ಕೈ, ಜೇಬುಗಳಲ್ಲಿ ತುಂಬಿಸಿ ಕಳಿಸುತ್ತಿದ್ದರು. ಬೆಳಿಗ್ಗೆ ಅಮ್ಮ-ಅಪ್ಪ ಸಾಮಾನು ತರಲು ಕಳಿಸಿದ ಮೂಡ್ ನೆನಪಿನಲ್ಲಿಟ್ಟುಕೊಂಡು ಅದು ಸ್ವಲ್ಪವಾದರೂ ಪ್ರಸನ್ನವಾಗಿತ್ತು ಅಂತ ನಮ್ಮ ಮನಸ್ಸಿಗೆ ಅನ್ನಿಸಿದ್ದರೆ (ಇದೊಂದು ವಿಷಯದಲ್ಲಿ, ಅವರ ಮೂಡ್ ಹೆಂಗಿದ್ದರೂ ನಾವು ಚನ್ನಾಗಿದೆ ಅಂದುಕೊಂಡುಬಿಡುತ್ತಿದ್ದೆವು) ಮುಲಾಜಿಲ್ಲದೆ ಮೂರು ಬೋಟಿಯನ್ನೋ, ಮೂರು ಹಾಲುಕೋವಾವನ್ನೋ ತೆಗೆದುಕೊಂಡು ಮನೆಗೆ ಬರುತ್ತಿದ್ದೆವು.

ಯಾಕೆ ಗೊತ್ತಾ...
ಅಮೆರಿಕಾದ್ದು ಗ್ರಾಹಕರ ಮಾರುಕಟ್ಟೆ. ಕೊಳ್ಳುಗರಿಂದಲೇ ಚಲಿಸುವ, ಓಡುವ, ಮುಗ್ಗರಿಸುವ ಮಾರುಕಟ್ಟೆ. ಅದಕ್ಕೇ ಅಮೆರಿಕನ್ ಗ್ರಾಹಕನನ್ನು ಸದಾ ಗ್ರಾಹಕನನ್ನಾಗಿಯೇ ಉಳಿಸಿಕೊಂಡು, ಅವನ ಕೊಳ್ಳುವ ಹಸಿವನ್ನು ಹೆಚ್ಚಿಸಿಕೊಳ್ಳುವಂತೆ ಬೆಳೆಸಿಕೊಂಡು ಹೋದರೇ ಅಮೆರಿಕಾದ ಎಕಾನಮಿ ಎಂಬ ಚಕ್ರ ಮುಂದೆ ಸಾಗುವುದು. ಅಪ್ಪನ ದಿನ, ಅಮ್ಮನ ದಿನ, ಅಜ್ಜ ಅಜ್ಜಿಯಂದಿರ ದಿನ, ಕೆಲಸಗಾರರ ದಿನ, ಇಂಡಿಪೆಂಡೆನ್ಸ್ ಡೇ, ಕೊಲಂಬಸ್ ಡೇ, ಈಸ್ಟರ್, ವಸಂತ ಋತು ಶುರುವಾಗುವ ದಿನ, ಹೀಗೆ ತಿಂಗಳಲ್ಲಿ ೫-೬ ದಿನ ಜನರಿಗೆ ಅಂಗಡಿಗಳಿಗೆ ಹೋಗಿ ಸಾಮಾನು ಕೊಳ್ಳಲಿಕ್ಕೆ ಎಂತಲೇ ಇಲ್ಲದ ಶಾಪಿಂಗ್ ಹಬ್ಬಗಳನ್ನು ನಾನು ನೋಡಿದ್ದು ಅಮೆರಿಕಾದಲ್ಲೇ. "ವಸಂತ ಋತು ಬರುತ್ತಿದೆ ಅದಕ್ಕೆ ಈ ವರ್ಷದ ಫ್ಯಾಷನ್ ಬಣ್ಣ ಪಿಂಕ್...ಬನ್ನಿ ಒಳ್ಳೊಳ್ಳೆ ಬಟ್ಟೆಗಳನ್ನು ರಿಯಾಯಿತಿ ದರದಲ್ಲಿ ಕೊಂಡಿಟ್ಟುಕೊಳ್ಳಿ..ಈ ವರ್ಷದಲ್ಲಿ ಇಷ್ಟು ಕಮ್ಮಿ ಬೆಲೆಯಲ್ಲಿ ನಾವು ಇದೊಂದು ಬಾರಿ ಮಾತ್ರ ಮಾರುವುದು.." ಅಂತ ಫೆಬ್ರವರಿಯಲ್ಲಿ ಜಾಹೀರಾತು ಶುರು ಆಗುತ್ತದೆ. ಏಪ್ರಿಲ್ ನಲ್ಲಿ "ಬಿರು ಬೇಸಿಗೆ ಬರುತ್ತಿದೆ...ಬನ್ನಿ ಈಜುಡುಗೆಗಳನ್ನು, ಈ ಬಾರಿಯ ಬೇಸಿಗೆಯ ಹಾಟ್ ಕಲೆಕ್ಷನ್ ಗಳನ್ನು ಖರೀದಿಸಿಟ್ಟುಕೊಳ್ಳಿ...ನೀವು ೫೦ ಡಾಲರ್ ಖರ್ಚು ಮಾಡಿದರೆ ನಾವು ೧೦ ಡಾಲರ್ ವಾಪಸ್ ಕೊಡುತ್ತೇವೆ..." ಎನ್ನುತ್ತಾರೆ. ಆಗಸ್ಟ್ ನಲ್ಲಿ ಫಾಲ್ ಸೀಸನ್ ಗೆ ಹೊಸ ಬಣ್ಣ ನಿರ್ಧಾರವಾಗಿರುತ್ತದೆ. ಆಗ ಅದರ ಭರಾಟೆ. ಅದಾದ ನಂತರ ಚಳಿಗಾಲಕ್ಕೆ ಸಿದ್ಧತೆ! ಒಟ್ಟಿನಲ್ಲಿ ಅಮೆರಿಕನ್ ಗ್ರಾಹಕರಿಗೆ ಕನಸು ಕಾಣಲೂ ಪುರುಸೊತ್ತು ಅಥವಾ ಸೃಜನಶೀಲತೆಗೆ ಜಾಗ ಕೊಡದಂತೆ ಕಂಡೂ ಕೇಳಿರದ ಬಣ್ಣ ಡಿಸೈನುಗಳ ಸಾಮಾನುಗಳು ಹೊಸ ಹೊಸ ಋತು-ಹಬ್ಬಗಳಿಗೆ ಅನುಗುಣವಾಗಿ ಅಂಗಡಿಗಳಲ್ಲಿ ಕೂತಿರುತ್ತವೆ. ಅವನ್ನು ನೋಡುವುದೇ ಒಂದು ಚಂದ. ಬರೀ ನೋಡಿ, ಕೊಳ್ಳುವ ಆಸೆಯನ್ನು ನಿಗ್ರಹಿಸುವುದು ಸ್ವಲ್ಪ ಸಂತರಿಗೆ, ಪಕ್ಕಾ ಜಿಪುಣರಿಗೆ ಅಥವಾ ಏಷಿಯಾದಲ್ಲಿ ಹುಟ್ಟಿ ಬೆಳೆದ ನಮ್ಮಂತವರಿಗೆ ಮಾತ್ರ ಸಾಧ್ಯ! ನಮಗೆ ಒಂದು ಸಣ್ಣ ಬಟ್ಟೆಗೆ ಸಾವಿರಾರು ರುಪಾಯಿಗಳನ್ನು ಕೊಡಲು ಹೊಟ್ಟೆ ಉರಿಯುತ್ತದೆ ನೋಡಿ! ಅದೇ ಬಣ್ಣದ, ಆದರೆ ಆ ಡಿಸೈನರ್ ಅಥವಾ ಬ್ರಾಂಡ್ ನ ಟ್ಯಾಗ್ ಇಲ್ಲದ ಅದೇ ರೀತಿಯ ಬಟ್ಟೆ ಬೆಂಗಳೂರಿನ ಚಿಕ್ಕಪೇಟೆಗೋ ಸಫೀನಾ ಪ್ಲಾಜ಼ಾಗೋ ಹೋದರೆ ೩೦೦ ರುಪಾಯಿಗೆ ಸಿಗುತ್ತದೆ ಅಂತ ನಮಗೆ ಗೊತ್ತಿರುತ್ತದೆ. ಅದೇ ಬಟ್ಟೆಗಳನ್ನು ಹಾಕಿಕೊಂಡೇ ನಾವು ಕಾಲು ಶತಮಾನ ಸಾಕಷ್ಟು ಖುಷಿಯಾಗಿಯೇ ಕಾಲಕಳೆದಿರುತ್ತೇವೆ!! ಬ್ರಾಂಡ್ ಎಂಬ ಜೇಬು ಕಡಿಯುವ ಮತ್ತು ಸುಳ್ಳು ಅಂತಸ್ತು ತೋರಿಸಿಕೊಳ್ಳುವ ಗೀಳನ್ನು ಹಚ್ಚಿಸಿಕೊಳ್ಳದಿದ್ದರೆ ಅಮೆರಿಕಾದಲ್ಲಿ ಅಂಥ ಗ್ರಾಹಕರು ನಿಜಕ್ಕೂ ಸಂತರೇ!

ಹಾಗಂತ ಎಲ್ಲಾ ಅಮೆರಿಕನ್ನರೂ ದುಂಬಾಲು ಬಿದ್ದು ಎಲ್ಲಾ ಹೊಸ ವಸ್ತುಗಳನ್ನು ಧಿಡೀರ್ ಅಂತ ಖರೀದಿ ಮಾಡುಬಿಡುತ್ತಾರಾ? ಇಲ್ಲ. ಅವರಲ್ಲೂ ಕೆಲವರು ಒಂದು ಋತು ಮುಗಿದು ಮತ್ತೊಂದು ಋತು ಬದಲಾಗುವವರೆಗೂ ಕಾಯುತ್ತಾರೆ. ಆಗ ಹಿಂದಿನ ಋತುಗೆ/ಹಬ್ಬಕ್ಕೆ ’ಹಾಟ್’ ಆಗಿದ್ದ ವಸ್ತು ಸ್ವಲ್ಪ ತಂಗಳಾಗಿರುತ್ತದೆ. ಅದರ ಬೆಲೆ ಬಿದ್ದಿರುತ್ತದೆ. ಆ ಸರಕನ್ನು ಖಾಲಿ ಮಾಡಿಕೊಂಡು ಮುಂದಿನ ಹೊಸ ಸರಕು ತಂದು ಜೋಡಿಸಿಕೊಳ್ಳಲು ಅಂಗಡಿಗಳೂ ತಯಾರಾಗಿರುತ್ತವೆ. ಆಗ ಎರಡನೇ ಸುತ್ತಿನ ವ್ಯಾಪಾರ ನಡೆಯುತ್ತದೆ. ಆಗ ಅಷ್ಟು ಭರಾಟೆಯಿರುವುದಿಲ್ಲ. ಈಗ ಅಮೆರಿಕಾದ ಗ್ರಾಹಕರಲ್ಲೂ ಬಹಳಷ್ಟು ಬದಲಾವಣೆ ಕಾಣತೊಡಗಿದೆ!
ವರ್ಷದಿಂದೀಚೆಗೆ ನಾನಿರುವ ಜಾಗದ ಸುತ್ತಮತ್ತಲಲ್ಲೇ ಇದ್ದ ಹಲವಾರು ಅಂಗಡಿಗಳು ಜಾಗ ಖಾಲಿಮಾಡಿಕೊಂಡು ಹೋಗುತ್ತಿವೆ. ಬಟ್ಟೆಗಳ ಅಂಗಡಿ ಗ್ಯಾಪ್, ಎಲೆಕ್ಟ್ರಾನಿಕ್ ಸಾಮಾನುಗಳ ಅಂಗಡಿ ಸರ್ಕ್ಯುಟ್ ಸಿಟಿ, ಮನೆ ಸಾಮಾನುಗಳ ಪಿಯರ್ ವನ್ ಇಂಪೋರ್ಟ್ಸ್, ಮಕ್ಕಳ ಆಟಿಕೆಗಳ ಕೆ ಬಿ ಟಾಯ್ಸ್, ಪ್ರಾಯೋಗಿಕ ಎಲೆಕ್ಟ್ರಾನಿಕ್ ಸಾಮಾನುಗಳ ಶಾರ್ಪರ್ ಇಮೇಜ್, ಶೂ ಅಂಗಡಿ ಫುಟ್ ಲಾಕರ್, ಪುಸ್ತಕಗಳ ಬಾರ್ಡರ್ಸ್ ಒಂದರ ಹಿಂದೊಂದು ನಿರ್ಗಮಿಸುತ್ತಿವೆ. ಇದೆಲ್ಲವೂ ಎರಡು ಮೂರು ವರ್ಷದಿಂದ ಸೊರಗಿ ಕೂತಿರುವ ಎಕಾನಮಿಯ ಕೃಪೆ. ದುಡ್ಡು ಬಂದರೆ ಧುತ್ತೆಂದು ಅಂಗಡಿ ಕಡೆ ಹೊರಡುವ ಅಮೆರಿಕನ್ ಗ್ರಾಹಕರು ದುಡ್ಡಿಲ್ಲದೆ, ಕೆಲಸಗಳಿಲ್ಲದೆ ಕಷ್ಟದಲ್ಲಿದ್ದಾರೆ. ಖರ್ಚು ಮಾಡಲಾಗದೆ ಕೈ ಕೈ ಹಿಸುಕಿಕೊಳ್ಳುತ್ತಿದ್ದಾರೆ.