ಅಂಗಳ      ಬಗೆ ಬಗೆ
Print this pageAdd to Favorite

 


 ಬೇಕಾಗುವ ಪದಾರ್ಥಗಳು:
ಹಿಟ್ಟು ಮಾಡಿಕೊಳ್ಳಲು

ಮೈದಾ ಹಿಟ್ಟು: ಒಂದು ಸಣ್ಣ ಬಟ್ಟಲು

ಗೋಧಿಹಿಟ್ಟು: ಒಂದು ಸಣ್ಣ ಬಟ್ಟಲು

ಸಣ್ಣ ರವೆ: ಕಾಲು ಬಟ್ಟಲು (ಒಂದೇ ಅಳತೆ ಬಟ್ಟಲು ಬಳಸಿ)

ತುಪ್ಪ: ೨-೩ ಟೇಬಲ್ ಚಮಚ

ಉಪ್ಪು-ಕಾಲು ಚಿಟಿಕೆ

ನೀರು: ಬೇಕಾಗುವಷ್ಟು
 
ಕಣಕ ಮಾಡಿಕೊಳ್ಳಲು

ಕೊಬರಿ ತುರಿ: ಅರ್ಧ ಬಟ್ಟಲು

ಹುರಿಗಡಲೆ: (ಹುರಿದು ಪುಡಿ ಮಾಡಿಕೊಳ್ಳಿ) ಅರ್ಧ ಬಟ್ಟಲು

ಬಾದಾಮಿ: ೨ ಟೇಬಲ್ ಚಮಚ (ಸಣ್ಣಗೆ ಹೆಚ್ಚಿಕೊಳ್ಳಿ)

ಪಿಸ್ತಾ: ೨ ಟೇಬಲ್ ಚಮಚ (ಸಣ್ಣಗೆ ಹೆಚ್ಚಿಕೊಳ್ಳಿ)

ಏಲಕ್ಕಿ ಪುಡಿ: ೧ ಟೀ ಚಮಚ

ಖರ್ಜೂರ: ೧ ಟೀ ಚಮಚ (ಸಣ್ಣಗೆ ಹೆಚ್ಚಿಟ್ಟುಕೊಳ್ಳಿ)

ಒಣದ್ರಾಕ್ಷಿ : ೧ ಟೇಬಲ್ ಚಮಚ

ಸಕ್ಕರೆ: ಅರ್ಧ ಬಟ್ಟಲು (ಪುಡಿ ಮಾಡಿಕೊಳ್ಳಿ)

ಎಣ್ಣೆ: ಅರ್ಧ ಲೀಟರ್ (ಕರಿಯಲು)

 
 

 

ಬಗೆ-೧
ಕರ್ಜಿಕಾಯಿ
 
ವಿಧಾನ:
  • ಒಂದು ಬಟ್ಟಲಿನಲ್ಲಿ ಮೈದಾ ಹಿಟ್ಟು, ಗೋಧಿಹಿಟ್ಟು, ಸಣ್ಣ ರವೆ, ತುಪ್ಪ, ಉಪ್ಪು ಮತ್ತು ಸ್ವಲ್ಪ ನೀರನ್ನು ಹಾಕಿಕೊಂಡು ಇದೆಲ್ಲವನ್ನೂ ಚಪಾತಿ ಹಿಟ್ಟಿನ ಹದಕ್ಕೆ ಕಲೆಸಿಕೊಳ್ಳಿ. ಕಲೆಸಿದ ಹಿಟ್ಟನ್ನು ಅದೇ ಪಾತ್ರೆಯಲ್ಲಿಟ್ಟು ೫-೧೦ ನಿಮಿಷ ಮುಚ್ಚಿಡಿ.
  • ಕೊಬರಿ ತುರಿ, ಹುರಿಗಡಲೆ ಪುಡಿ, ಬಾದಾಮಿ, ಪಿಸ್ತಾ, ಏಲಕ್ಕಿ ಪುಡಿ, ಖರ್ಜೂರ, ಒಣದ್ರಾಕ್ಷಿ, ಸಕ್ಕರೆಪುಡಿ (ಸಕ್ಕರೆಯನ್ನು ನಿಮಗೆ ಬೇಕೆನಿದಷ್ಟು ಹೆಚ್ಚು ಅಥವಾ ಕಡಿಮೆ ಮಾಡಿಕೊಳ್ಳಿ) ಇವೆಲ್ಲವನ್ನೂ ಒಂದು ಬಟ್ಟಲಿನಲ್ಲಿ ಹಾಕಿ ಸರಿಯಾಗಿ ಮಿಶ್ರ ಮಾಡಿಟ್ಟುಕೊಳ್ಳಿ.
  • ಹಿಟ್ಟನ್ನು ನಿಂಬೆ ಗಾತ್ರದ ಉಂಡೆಗಳನ್ನಾಗಿ ಮಾಡಿ ಪ್ರತಿಯೊಂದು ಉಂಡೆಯನ್ನೂ ವೃತ್ತಾಕಾರಕ್ಕೆ ಲಟ್ಟಿಸಿ, ಅದರ ಮಧ್ಯಕ್ಕೆ ಮಾಡಿಟ್ಟಿರುವ ಹುಡಿ ಕಣಕವನ್ನು ತುಂಬಿಸಿ. ಒಂದು ಲಟ್ಟಿಸಿದ ವೃತ್ತಕ್ಕೆ ೧/೧೨ ಚಮಚ ಕಣಕ ತುಂಬಿಸಿದರೆ ಸಾಕು (ಕಣಕ ಹೆಚ್ಚಾದರೆ ಕರ್ಜಿಕಾಯನ್ನು ಕರಿಯುವಾಗ ಒಳಗಿನಿಂದ ಸಕ್ಕರೆ ಸೋರುವಂತಾಗುತ್ತದೆ).
  • ವೃತ್ತಗಳನ್ನು ಅರ್ಧ ಚಂದ್ರಾಕಾರಕ್ಕೆ ಮಡಿಸಿ, ಕೈ ಬೆರಳುಗಳನ್ನು ಹಾಲಿನಿಂದ ಅದ್ದಿಕೊಂಡು ಅದರ ತುದಿಯನ್ನು ಅಂಟಿಸಿ. ಅಂಟಿಸುವಾಗ ಕೈಬೆರಳುಗಳನ್ನು ಬಳಸುವಂತೆಯೇ ಪ್ಲಾಸ್ಟಿಕ್ ಕರ್ಜಿಕಾಯಿ ಮಾಡುವ ಮೌಲ್ಡ್ ಅನ್ನೂ ಬಳಸಬಹುದು.
  • ಒಂದು ಗಟ್ಟಿ ತಳದ ಬಾಣಲೆಯಲ್ಲಿ ಎಣ್ಣೆಯನ್ನು ಮಧ್ಯಮ ಉರಿಯಲ್ಲಿ ಕಾಯಲು ಬಿಡಿ.
  • ಕಾದ ಎಣ್ಣೆಯನ್ನು ಮಧ್ಯಮ ಉರಿಯಲ್ಲಿ ಇಟ್ಟುಕೊಂಡೇ ಒಂದು ಅಥವಾ ಎರಡು ಕರ್ಜಿಕಾಯಿಗಳನ್ನು ಹಾಕಿ ಕರಿಯುತ್ತಾ ಬನ್ನಿ. ಕರ್ಜಿಕಾಯಿಗಳು ತಿಳಿಕಂದು ಬಣ್ಣ ಬರುತ್ತಿದ್ದಂತೆಯೇ ಅವನ್ನು ಎಣ್ಣೆಯಿಂದ ತೆಗೆದು ಬಿಡಿ.
  • ಕರ್ಜಿಕಾಯಿ ತಯಾರು!
  •  
    (ವಿ.ಸೂ: ಮೈದಾ ಹಿಟ್ಟಿನಲ್ಲಿ ಮಾಡುವ ಕರ್ಜಿಕಾಯಿಗಿಂತ ಸ್ವಲ್ಪ ಗೋಧಿ ಹಿಟ್ಟು ಬೆರೆಸಿ ಮಾಡುವ ಕರ್ಜಿಕಾಯಿ ಹೆಚ್ಚು ರುಚಿಯಾಗಿರುತ್ತದೆ ಮತ್ತು ಆರೋಗ್ಯಕ್ಕೂ ಒಳ್ಳೆಯದು)
     
 
 




ಬಗೆ ೨
ವಿಶ್ವದೆಲ್ಲೆಡೆಯ ಅಡುಗೆ-ತಿನಿಸುಗಳ ಹಾಗೂ ನಮ್ಮ ನಿಮ್ಮ ಪಾಕ ಪ್ರಯೋಗ ಶಾಲೆಗಳಲ್ಲಿ ಹುಟ್ಟುವ ಹೊಸ ರುಚಿಗಳ ವಿನಿಮಯ.
 
 ಬೇಕಾಗುವ ಪದಾರ್ಥಗಳು:
 

ಪೀಜ಼್ಜಾದ ಬೇಸ್ ಅಥವಾ ರೊಟ್ಟಿ ಮಾಡಿಕೊಳ್ಳಲು
 
ಗೋಧಿ ಹಿಟ್ಟು: ೩ ಟೇಬಲ್ ಸ್ಪೂನ್
 
ಉಪ್ಪು: ೧ ಸಣ್ಣ ಚಿಟಿಕೆ
 
ಎಣ್ಣೆ: ೨ ಟೀ ಚಮಚ
 
ಹಾಲು: ೨ ಟೇಬಲ್ ಚಮಚ
 
ಬಿಸಿ ನೀರು: ಬೇಕಾಗುವಷ್ಟು
 
ಸಾಸ್ ಮಾಡಿಕೊಳ್ಳಲು
 
ಟೊಮ್ಯಾಟೊ: ೨ ಸಣ್ಣವು
 
ಹಸಿಮೆಣಸಿನಕಾಯಿ: ೨ (ಖಾರ ಬೇಕಾದಲ್ಲಿ ಇನ್ನೆರಡು)
 
ಗರಂ ಮಸಾಲೆ: ೧/೨ ಟೀ ಚಮಚ
 
ಶುಂಠಿ: ಕಾಲು ಇಂಚು
 
ಬೆಳ್ಳುಳ್ಳಿ: ೨ ಹಿಕಳು
 
ಉಪ್ಪು: ರುಚಿಗೆ ತಕ್ಕಷ್ಟು
 
ಎಣ್ಣೆ: ೧ ಟೇಬಲ್ ಚಮಚ
 
ಅರಿಸಿನ: ಒಂದು ಚಿಟಿಕೆ
 
ಪೀಜ಼್ಜಾ ಮೇಲೆ ಹಾಕಲು
 
ಚೀಸ್: ಪೆಪ್ಪರ್ ಜ್ಯಾಕ್, ಚೆಡ್ಡರ್ ಮತ್ತು ಅಮೆರಿಕನ್ ಚೀಸ್ ಗಳು (ತುರಿದದ್ದು. ಎಲ್ಲ ಸೇರಿ ಒಂದು ದೊಡ್ಡ ಬಟ್ಟಲು, ಚೀಸ್ ಇಷ್ಟ ಪಡುವವರು ಹೆಚ್ಚು ಬಳಸಬಹುದು. ಮೂರು ಚೀಸ್ಗಳ ರುಚಿಯನ್ನು ಒಟ್ಟಿಗೆ ಇಷ್ಟ ಪಡದವರು ಒಂದೇ ಚೀಸ್ ಅನ್ನು ಬಳಸಬಹುದು)
 
ದಪ್ಪ ಮೆಣಸಿನ ಕಾಯಿ: ೧ ಹೆಚ್ಚಿದ್ದು
 
ಅಣಬೆ: ೫-೬ ಹೆಚ್ಚಿದ್ದು (ಬೇಕಾದಲ್ಲಿ)
 
ಈರುಳ್ಳಿ: ೧ ಹೆಚ್ಚಿದ್ದು
 
ಆಲಿವ್: ೬-೭ ಬಳೆಗಳಾಗಿ ಹೆಚ್ಚಿದ್ದು (ಕಪ್ಪು ಅಥವಾ ಹಸಿರು ಆಲಿವ್ಗಳು-ಬೇಕಾದಲ್ಲಿ) 
 
 

 

ಮೈದಾ ರಹಿತ ಮನೆ ಪಿಜ಼್ಜಾ  
 
ವಿಧಾನ:
  • ಪೀಜ಼್ಜಾ ಬೇಸ್: ಗೋಧಿ ಹಿಟ್ಟು, ಉಪ್ಪು, ಎಣ್ಣೆ, ಹಾಲು, ಇವನ್ನು ಒಂದು ಬಟ್ಟಲಿನಲ್ಲಿ ಹಾಕಿಕೊಂಡು ಕಲೆಸಿಕೊಳ್ಳಿ. ಇದಕ್ಕೆ ಸಾಕಾಗುವಷ್ಟು ಬಿಸಿನೀರು ಸೇರಿಸಿ ಚಪಾತಿ ಹಿಟ್ಟಿಗಿಂತ ಸ್ವಲ್ಪ ಗಟ್ಟಿ ಹದಕ್ಕೆ ಬರುವಂತೆ ಕಲೆಸಿ, ಹಿಟ್ಟನ್ನು ಚನ್ನಾಗಿ ನಾದಿಟ್ಟುಕೊಳ್ಳಿ. ಇದನ್ನು ಸ್ವಲ್ಪ ಹೊತ್ತು ಮುಚ್ಚಿಟ್ಟು ನೆನೆಯಲು ಬಿಡಿ.
  • ಕುಕ್ಕರಿನಲ್ಲಿ ಟೊಮ್ಯಾಟೋ, ಹಸಿಮೆಣಸಿನಕಾಯಿಗಳನ್ನು ೧೦ ನಿಮಿಷ ಬೇಯಿಸಿಕೊಳ್ಳಿ. ಅಥವಾ ೭-೮ ನಿಮಿಷ ಮೈಕ್ರೋವೇವ್ ಮಾಡಿಕೊಳ್ಳಿ.
  • ಇವನ್ನು ಬ್ಲೆಂಡರ್ ನಲ್ಲಿ ೧ ನಿಮಿಷ ಸಣ್ಣ ಮಾಡಿಕೊಳ್ಳಿ.
  • ಒಂದು ಪಾತ್ರೆಯನ್ನು ಒಲೆಯ ಮೇಲಿಟ್ಟು ಅದಕ್ಕೆ ೧ ಚಮಚ ಎಣ್ಣೆ ಹಾಕಿ.
  • ಎಣ್ಣೆ ಕಾದಮೇಲೆ ರುಬ್ಬಿಕೊಂಡ ಟೊಮ್ಯಾಟೋ-ಹಸಿಮೆಣಸಿನ ಮಿಶ್ರಣ ಹಾಕಿ ಸ್ವಲ್ಪ ಫ಼್ರೈ ಮಾಡಿ.
  • ಅದಕ್ಕೆ ಗರಂ ಮಸಾಲೆ, ಶುಂಠಿ ಬೆಳ್ಳುಳ್ಳಿಯ ಪೇಸ್ಟ್, ಅರಿಸಿನ ಮತ್ತು ಸ್ವಲ್ಪ ಉಪ್ಪು (ಉಪ್ಪನ್ನು ಪೀಜ಼್ಜಾ ಬೇಸ್ ಗೂ ಹಾಕಿರುವುದರಿಂದ ನೋಡಿಕೊಂಡು ಹಾಕಿ). ಹಾಕಿ.
  • ಈ ಮಸಾಲೆಯ ಹಸಿ ವಾಸನೆ ಹೋಗುವವರೆಗೂ ಅಂದರೆ ೭-೮ ನಿಮಿಷ ಪಾತ್ರೆಯ ಮುಚ್ಚಳ ಹಾಕದೆ ಫ್ರೈ ಮಾಡಿಕೊಳ್ಳಿ.
  • ಬೆಂದ ತಕ್ಷಣ ಒಲೆ ಆರಿಸಿ ಇದನ್ನು ತಣ್ಣಗಾಗಲು ಬಿಡಿ.
  • ಮಾಡಿಟ್ಟ ಚಪಾತಿ ಹಿಟ್ಟನ್ನು ಚಪಾತಿಯನ್ನು ಲಟ್ಟಿಸುವುದಕ್ಕಿಂತ ಮೂರು ಪಟ್ಟು ದಪ್ಪಗೆ ಮತ್ತು ಅಗಲವಾಗಿ ವೃತ್ತಾಕಾರಕ್ಕೆ ಒತ್ತಿಟ್ಟುಕೊಳ್ಳಿ.
  • ತವೆಯನ್ನು ಒಲೆಯ ಮೇಲೆ ಬಿಸಿಗಿಟ್ಟು, ಈ ಚಪಾತಿಯನ್ನು ಎರಡೂ ಬದಿ ೨-೩ ನಿಮಿಷ ಬೇಯಿಸಿಕೊಳ್ಳಿ (ತುಂಬಾ ಬೇಯಿಸುವ ಅಗತ್ಯವಿಲ್ಲ).
  • ಈಗ ಬೇಕಿಂಗ್ ಅವನ್ ಅನ್ನು ೪೪೦ ಡಿಗ್ರಿ ಉಷ್ಣತೆಗೆ ಪ್ರಿಹೀಟ್ ಮಾಡಲು ಆನ್ ಮಾಡಿ.
  • ಪೀಜ಼್ಜಾ ಬೇಸ್ ತಯಾರಾಗುವ ಹೊತ್ತಿಗೆ ಸಾಸ್ ತಣ್ಣಗಾಗಿರುತ್ತದೆ.
  • ಬೇಸ್ ಅನ್ನು ಪೀಜ಼್ಜಾ ಕಲ್ಲು (ಅಂಗಡಿಗಳಲ್ಲಿ ಸಿಗುವ ಬಳಪದ ಕಲ್ಲಿನ ಪೀಜ಼್ಜಾ ಸ್ಟೋನ್) ಅಥವಾ ಬೇಕಿಂಗ್ ಪ್ಯಾನ್ (ಬೇಕಿಂಗ್ ಪ್ಯಾನ್ ಮೇಳಿಡುವ ಮುನ್ನ ಒಂದು ಪಾರ್ಚ್ಮೆಂಟ್ ಪೇಪರ್ ಬಳಸಿ) ಮೇಲಿಟ್ಟು
  • ಈ ಬೇಸ್ ನ ಮೇಲೆ ಕಾಲು ಚಮಚ ಎಣ್ಣೆ ಸವರಿಕೊಳ್ಳಿ.
  • ಇದರ ಮೇಲೆ ಒಂದು ಪದರ ಈಗಷ್ಟೆ ಮನೆಯಲ್ಲಿ ತಯಾರಿಸಿದ ಟೊಮ್ಯಾಟೋ ಸಾಸ್ ಅನ್ನು ಹರಡಿಕೊಳ್ಳಿ.
  • ಇದರ ಮೇಲೆ ಸ್ವಲ್ಪ ಚೀಸ್ ತುರಿಯನ್ನು ಉದುರಿಸಿ.
  • ನಂತರ ಹೆಚ್ಚಿಟ್ಟುಕೊಂಡ ತರಕಾರಿಗಳನ್ನು ಉದುರಿಸಿ, ಬೇಸ್ ನ ಎಲ್ಲ ಭಾಗಕ್ಕೂ ಸಮನಾಗಿ ಹರಡಿ.
  • ಇವುಗಳ ಮೇಲೆ ಮತ್ತಷ್ಟು ಚೀಸ್ ತುರಿಯನ್ನು ಉದುರಿಸಿಕೊಳ್ಳಿ.
  • ಎಲ್ಲವನ್ನೂ ಹರಡಿಯಾದ ಮೇಲೆ ಪೀಜ಼್ಜಾ ಕಲ್ಲನ್ನು ಅಥವಾ ಬೇಖಿಂಗ್ ಪ್ಯಾನ್ ಅನ್ನು ಅವನ್ ನ ಮಧ್ಯ ಭಾಗಕ್ಕೆ ಜೋಪಾನವಾಗಿಡಿ.
  • ಅವನ್ ಉಷ್ಣತೆಯನ್ನು ಈಗ ೪೦೦ ಡಿಗ್ರಿ ಗೆ ಕಡಿಮೆ ಮಾಡಿ. ೮-೧೦ ನಿಮಿಷ ಬೇಯಲು ಬಿಡಿ.
  • ಬೇಸ್ ಅನ್ನು ತೆಳುವಾಗಿ ಮಾಡಿದ್ದರೆ ೬-೭ ನಿಮಿಷಕ್ಕೇ ತೆಗೆದುಬಿಡಿ. (ಬೇಸ್ ಅನ್ನು ತೆಳು ಮಾಡಿಕೊಂದಷ್ಟೂ ತರಕಾರಿಗಳನ್ನು ಸಣ್ಣಗೆ ಹೆಚ್ಚಿಕೊಳ್ಳಬೇಕು. ಆಗ ಬೇಸ್ ಬೇಯುವಷ್ಟರಲ್ಲಿ ತರಕಾರಿಗಳೂ ಬೆಂದಿರುತ್ತವೆ) ಪೀಜ಼್ಜಾ ಬೇಸ್ ಅನ್ನು ಮನೆಯಲ್ಲೇ ಮಾಡಿಕೊಂಡಿರುವುದರಿಂದ ಪೀಜ಼್ಜಾ ಬೇಯಲು ಹೆಚ್ಚು ಸಮಯ ತಾಕುವುದಿಲ್ಲ.
  •  
    ವಿ.ಸೂ: ಒಟ್ಟಿಗೇ ೨-೩ ಪೀಜ಼್ಜಾ ಬೇಸ್ ಗಳನ್ನು ಒಟ್ಟಿಗೆ ಮಾಡಿಟ್ಟುಕೊಂಡರೆ ಶ್ರಮ ಮತ್ತು ಸಮಯದ ಉಳಿತಾಯ ಆಗುತ್ತದೆ. ವಾರದಲ್ಲಿ ೨-೩ ಬಾರಿ ನಿಮಗಿಷ್ಟದ ತರಕಾರಿಗಳನ್ನು ಬಳಸಿ ಧಿಡೀರ್ ಪೀಜ಼್ಜಾ ಮಾಡಿಕೊಳ್ಳಬಹುದು. ಹಾಗೆ ಪಿಜ್ಜಾ ಗೆ ನಿಮಗಿಷ್ಟವಾದ ಹಲವಾರು ತರಕಾರಿಗಳ ಕಾಂಬಿನೇಶನ್ ಅನ್ನು ಬಳಸಬಹುದು.

 





 
 
 
 
 
Copyright © 2011 Neemgrove Media
All Rights Reserved