ಲಾವಿನೋ ಹಾಡು-೨

೧೯೬೬ ರಲ್ಲಿ ಪ್ರಕಟವಾದ ಉಗಾಂಡಾದ ಪ್ರಸಿದ್ಧ ಕವಿ ಒಕೋಟ್ ಪಿ ಬಿಟೆಕ್ ರ ’ಸಾಂಗ್ ಆಫ್ ಲಾವಿನೋ’ ಒಂದು ನೀಳ್ಗವಿತೆ. ಆಫ್ರಿಕಾದ ಸಂಸ್ಕೃತಿ, ಸೊಗಡು ವಸಾಹತುಶಾಹೀ ಸಂಸ್ಕೃತಿಯ ಕಾಲ್ತುಳಿತಕ್ಕೆ ಸಿಲುಕಿ ನಲುಗಿದಾಗ ಲಾವೀನೋ ಎಂಬ ಎದೆಗಾತಿ ಆಫ್ರಿಕನ್ ಮಹಿಳೆಯ ರೋಷ, ಕೋಪ, ನೋವಿನ ಸೊಲ್ಲಾಗಿ ಹೊರಬಂದ ಈ ಕವಿತೆಗಳು ಅತ್ಯಂತ ಗಾಢವಾದ ಉಪಮೆಗಳನ್ನು ಕಟ್ಟಿಕೊಡುತ್ತವೆ. ಈ ನೀಳ್ಗವಿತೆಯನ್ನು ಸಣ್ಣ ಭಾಗಗಳನ್ನಾಗಿಸಿ ಕನ್ನಡಕ್ಕೆ ಶ್ರೀ ಎಚ್. ಎಸ್. ರಾಘವೇಂದ್ರ ರಾವ್ ಅವರು ಅನುವಾದಿಸಿ ಆಯಾಮದ ಓದುಗರೊಡನೆ ಹಂಚಿಕೊಂಡಿದ್ದಾರೆ.

ಈಗ ಒಕೋಲ್ ಗೆ

ಹಳೆಯಕಾಲದ ಹುಡುಗಿಯರ ಮೇಲೆ ಪ್ರೀತಿ ಇಲ್ಲ.

ಅವನಿಗೆ ಅಪ್ ಟು ಡೇಟ್ ಹುಡುಗಿ ಬೇಕು

ಆ ಸುಂದರಿ ಹೆಸರೇ ಕ್ಲೆಮಂಟೈನ್.

ಅಪ್ ಟು ಡೇಟ್ ಕ್ಲೆಮಂಟೈನ್

ಅವಳದು ಒಂದೇ ಕನಸು

ಬಿಳಿಯಳಂತೆ ಕಂಡರೆ ಸಾಕು

ಅದೇ ವೆರಿ ವೆರಿ ಫೈನ್.

 

ಅವಳ ತುಟಿಗಳು ಕಡುಕಡು ಕೆಂಪು

ಉರಿವ ಇದ್ದಿಲ ಬೇಗೆ.

ರಕ್ತದಲ್ಲಿ ಮೂತಿ ಮುಳುಗಿಸಿದ

ಕಾಡುಬೆಕ್ಕಿನ ಹಾಗೆ.

ಅವಳ ಬಾಯೋ ತೆರೆದ ಹುಣ್ಣು,

ಪಿಶಾಚಿಯಂಥ ಹೆಣ್ಣು

 

 

ಟೀನಾ, ಟೀನಾ ಮುದ್ದು ಟೀನಾ

ಹಚ್ಚುತಾಳೆ ಬೂದೀನಾ

ಕಪ್ಪುಮುಖಕೆ ಬಿಳಿಯ ಬೂದಿ,

ಮಂಕು ಮಂಕು ವದನ.

ಮಧ್ಯರಾತ್ರಿ ಕುಣಿಯಹೊರಟ

ಮಾಟಗಾತಿಯಂತೆ

ಕಾಣುತಾಳೆ ನಮ್ಮ ಟೀನಾ

ಥೇಟುಕೋತಿಯಂತೆ.

ಮುಖಕೆ ಹೇಲುಬೂದಿ ಹಚ್ಚಿ

ಕುಣಿಯುತಾಳೆ ಟೀನಾ

ಮೈಯ್ಯ ತುಂಬ ಬೆವರು ಹನಿ

ಟೀನಾನಾ, ಇವಳು

ಬೂದೀ ಕೋಳೀನಾ??