ಸ್ವಲ್ಪ ಓದಿಕೊಂಡು ನಾನು ಮನೆಯಲ್ಲಿ ಫ್ರೀ ಇದ್ದೇನೆ ಎಂದು ತಿಳಿದು ಪವಿತ್ರಾ ನನಗೂ ಆಗಾಗ ಏನಾದರೂ ಸಹಾಯ ಮಾಡಿಕೊಡಲು ಕೇಳುತ್ತಿದ್ದರು. ಒಂದೆರಡು ವಿಷಯ ತಿಳಿಸಿ ಅದರ ಬಗ್ಗೆ ಪುಟ್ಟ ನೋಟ್ಸ್ ಬರೆದು ಕೊಡಲು ಕೇಳುತ್ತಿದ್ದರು. ಎರಡು ಮೂರು ಬಾರಿ ಅವರ ಕೆಲಸ ಮಾಡಿಕೊಟ್ಟಿದ್ದೆ. ’ಸ್ವೀಟೀ..’ ಅಂತ ನಾಟಕೀಯವಾದ ಹಗ್ ಕೊಟ್ಟಿದ್ದರು. ಕೆಲಸ ಪ್ರತೀ ಬಾರಿಯೂ ಹೆಚ್ಚಾಗುತ್ತಿದ್ದುದನ್ನು ನೋಡಿ ’ನಾನು ಆಗುವುದಿಲ್ಲ ಮನೇಲಿ ಸ್ವಲ್ಪ ಕೆಲಸ ಇದೆ’ ಎಂದು ಹೇಳಿ ತಪ್ಪಿಸಿಕೊಂಡಾಗ...’ಅವಳನ್ನು ನಾನು ನೈಸ್ ಗರ್ಲ್ ಎಂದುಕೊಂಡಿದ್ದೆ. ತುಂಬಾ ಮೀನ್ ಇದ್ದಾಳೆ, ನನ್ನ ಕಂಡರೆ ಅವಳಿಗೆ ಅಸೂಯೆ ಎನ್ನಿಸುತ್ತೆ’ ಅಂತ ನನ್ನ ಗೆಳತಿಗೇ ಒಪ್ಪಿಸಿಕೊಂಡಿದ್ದರು!

　

ಈಕೆ ತನ್ನನ್ನು ರಾಡಿಕಲ್ ಫೆಮಿನಿಸ್ಟ್ ಎಂದು ಕರೆದುಕೊಳ್ಳುತ್ತಿದ್ದರು. ಆದರೆ ತನ್ನ ಹೆಸರಿನ ಜೊತೆಗೊಂದು ಗಂಡಸಿನ, ಅದರಲ್ಲೂ ಯಶಸ್ವೀ ಗಂಡಸಿನ ಹೆಸರಿರಬೇಕು ಎನ್ನುವ ಆಸೆ. ಫೆಮಿಸಿಸ್ಟ್ ಆಗಿದ್ದರಿಂದಲೇ ನಾನು ಸದಾ ನನ್ನ ಗಂಡನೆಂಬುವನ ಜೊತೆಗಿರುವ ಅಗತ್ಯವಿಲ್ಲ ಎನ್ನುವ ಧೋರಣೆ. ನಿಜಕ್ಕೂ ಅಸ್ತಿತ್ವದಲ್ಲಿಲ್ಲದ ಒಂದು ಸಂಬಧವನ್ನು ಉಳಿಸಿಕೊಳ್ಳಲು, ಒಬ್ಬ ಯಶಸ್ವಿ ಗಂಡಸನ್ನು ತಮ್ಮ ಬದುಕಿನಲ್ಲಿಟ್ಟುಕೊಳ್ಳಲು ಅವರು ಮಾಡುತ್ತಿದ್ದ ಹೆಜ್ಜೆ ಹೆಜ್ಜೆಯ ಪ್ಲಾನ್ ಗಳನ್ನು ಕೇಳಿದಾಗ ನನಗೆ ಮೈ ಜುಮ್ ಎನ್ನುತ್ತಿತ್ತು. ಇವರ ಮದುವೆಗೆ ಇಬ್ಬರ ನಡುವಿನ ಪ್ರೀತಿ ಕಾರಣವೋ, ಈಕೆಯ ಒಬ್ಸೆಷನ್ ಕಾರಣವೋ, ಆ ಗಂಡನ ನಿರ್ಲಿಪ್ತತೆ ಕಾರಣವೋ, ಇಬ್ಬರಿಗೂ ಒಬ್ಬರಿಂದ ಸಿಗುತ್ತಿದ್ದ ದೀರ್ಘ ಸಮಯದ ಬ್ರೇಕ್ ಮತ್ತು ಸ್ವಾತಂತ್ರ ಕಾರಣವೋ ಅಂತ ಯೋಚಿಸಿದಾಗ ಕನ್ಫ಼್ಯೂಷನ್ ಆಗುತ್ತಿತ್ತು.

　

ಯಾಕಪ್ಪಾ ಪವಿತ್ರಾ ಎಂಬ ವ್ಯಕ್ತಿಯ ಮೇಲೆ ಏನೇನೋ ಬರೆಯುತ್ತಿದ್ದಾಳೆ. ಬೇಲಾಗೇನೋ ಆ ಹುಡುಗಿಯ ಮೇಲೆ ದ್ವೇಷ ಇರಬಹುದು ಅಂತ ಅಂದುಕೊಳ್ಳಬೇಡಿ. ಈ ವ್ಯಕ್ತಿಗೆ ನನ್ನ ಬದುಕಿನಲ್ಲಿ ಯಾವ ಪ್ರವೇಶ ಪಾತ್ರವೂ ಇಲ್ಲ. ಆದರೆ ಈಕೆಯನ್ನು ಹೀಗೇ ಗೆಳತಿಯರ ಮುಖೇನ ನೋಡಿ, ಅವರ ವಾಕ್ಚಾತುರ್ಯವನ್ನು ಕೇಳಿ ತಿಳಿದು, ಸ್ವಲ್ಪ ಮಟ್ಟಿಗೆ ಅದರ ಸವಿ ಅನುಭವಿಸಿ, ’ಅಬ್ಬಾ!! ಎಂತಹ ವ್ಯಕ್ತಿ!! ಎನ್ನುವ ವಿಸ್ಮಯಕ್ಕೆ ಬಿದ್ದಿದ್ದೆ.

　

ಒಂದು ಕಾಲದಲ್ಲಿ ಸಾರಾ ಸಗಟಾಗಿದ್ದಂತೆ ಈಗಲೂ ಕೆಲವರು ಪುರುಷರು ಹೇಗೆ ತಮ್ಮ ಗಂಡಸುತನವನ್ನು ತಪ್ಪಾಗಿ ಅರ್ಥೈಸಿಕೊಂಡು ನಾನು ತಾವು ಮಾಡಿದ ಅತ್ಯಾಚಾರ ಅನಾಚಾರ ದಬ್ಬಾಳಿಕೆಯೆಲ್ಲಾ ಸರಿ, ಅದೇ ಲೋಕ ನೀತಿ, ಅದೇ ಪುರುಷತ್ವ ಎಂದು ಘನ ಹುಂಬನಂತಿರುತ್ತಾರೋ ಹಾಗೆ ಫೆಮಿನಿಸಂ ಎನ್ನುವುದನ್ನು ಹುಚ್ಚಾಗಿ ಅರ್ಥ ಮಾಡಿಕೊಂಡು ಬೇಕಾಬಿಟ್ಟಿ ವಿವರಣೆಗಳನ್ನು ಕೊಟ್ಟುಕೊಂಡು ಬದುಕುವ ಇಂಥಹ ರಾಡಿಕಲ್ ಫೆಮಿನಿಸ್ಟ್ ಗಳು ಡೇಂಜರಸ್ ಮಾರಾಯರೇ! ಕುಡಿಯುವುದು, ಸಿಗರೇಟು ಸೇದುವುದು, ತಾಯಿಯಾಗಲು ಇಚ್ಚಿಸದೇ ಇರುವುದು, ಮನೆಯಲ್ಲಿ ಮೂರು ಹೊತ್ತಿನ ಅಡಿಗೆ ಮಾಡಿ ಹಬ್ಬಕ್ಕೆ ಸಂಭ್ರಮ ಪಡುವ ಹೆಂಗಸರನ್ನು ಹೀಯಾಳಿಸುವುದು ಇದೇ ರಾಡಿಕಲ್ ಫೆಮಿನಿಸಮ್ ಆದರೆ ನಮ್ಮಂತವರಿಗೆ ಭಾಳಾ ಕಷ್ಟವಿದೆ ಎನ್ನಿಸುತ್ತದೆ.

 

 

ನಾನೊಮ್ಮೆ ಪ್ರಶಾಂತನನ್ನು ಅವರಿದ್ದ ಸಮಯದಲ್ಲಿ ನನ್ನ ಗೆಳತಿಯ ಮನೆಗೆ ಬರಲು ಹೇಳಿದೆ. ಆತ ಆಫೀಸ್ನಿಂದ ನೇರವಾಗಿ ಅಲ್ಲಿಗೇ ಬಂದ. ಅವರಿಗೆ ಪ್ರಶಾಂತನನ್ನು ಪರಿಚಯಿಸಿದೆ. ಮೊದಲ ಹತ್ತು ನಿಮಿಷ ಅವರಿಗೆ ಬರುವ ಎಲ್ಲಾ ಸ್ಮಾರ್ಟ್ ವಿಷಯಗಳನ್ನೂ ಮಾತನಾಡಿ ಅವನನ್ನು ಇಂಪ್ರೆಸ್ ಮಾಡಿದರು. ನಾನು ಈಗಾಗಲೇ ಆ ಮಾತುಗಳನ್ನು ಸುಮಾರು ಸಾರಿ ಕೇಳಿದ್ದರಿಂದ ಸುಮ್ಮನೆ ಕೇಳಿಸಿಕೊಳ್ಳುತ್ತಿದ್ದೆ. ಮನೆ ಕಡೆ ಹೊರಟಾಗ ಈಕೆ ನಿನಗೆ ಏನನ್ನಿಸುತ್ತಾರೆ? ಅವರು ತಮ್ಮನ್ನು ನಮಗೆ ತೋರಿಸಿಕೊಳ್ಳುತ್ತಿರುವ ರೂಪ ನಿಜವೋ ಅಥವಾ ನನಗೆ ಅನ್ನಿಸುತ್ತಿರುವುದು ನಿಜವೋ?’ ಅಂತ ಸುಮ್ಮನೆ ಅವನ ಅಭಿಪ್ರಾಯ ಕೇಳಿದ್ದೆ. ’ಕಮಾನ್! ಶಿ ಇಸ್ ಸೋ ಫೇಕ್. ನಿನಗೂ ಅದು ಗೊತ್ತು. ನೀನು ಅವರ ಮಾತಿನ ಎಂಟರ್ಟೇನ್ಮೆಮ್ಟ್ ಪಡೆಯಲು ಮಾತ್ರ ಹೋಗ್ತಿ’ ಎಂದುಬಿಟ್ಟ.

　

ಮಳೆಗಾಲ ಮುಗಿಯುವ ಟೈಮ್...ಒಮ್ಮೆ ಪವಿತ್ರಾ ತುಂಬಾ ಖುಷಿಯ ಮೂಡಿನಲ್ಲಿದ್ದರು. ’ಮುಂದಿನವಾರ ನನ್ನ ಗಂಡ ಬರ್ತಾನೆ, ನೀವೆಲ್ಲರೂ ನಮ್ಮನೇಗೆ ಟೀಗೆ ಬರಬೇಕು’ ಎಂದು ಆಮಂತ್ರಿಸಿದರು. ಅವರ ಹೈ ಪೊರ್ಫೈಲ್ ಗಂಡನನ್ನು ನೋಡುವ ಕೆಟ್ಟ ಕುತೂಹಲ ನಮಗೆ. ಹೋಗೇ ಹೋದ್ವಿ. ಕುಷಲೋಪರಿಗಳಾದವು. ಪವಿತ್ರಾರ ಬಾಯಿಂದ ಮಾತ್ರ ಅವರ ಬಗ್ಗೆ ಕೇಳಿದ್ದೆವಾದ್ದರಿಂದ ಯಾವ ಸೀಮೆಯ ವ್ಯಕ್ತಿ ಇವರು ಎಂಬ ಕುತೂಹಲವಿತ್ತು ನೋಡಿ...ಆ ವ್ಯಕ್ತಿ ಸ್ವಲ್ಪ ಸಂಕೋಚದ ಸ್ವಭಾವದವರು, ಸರಳ ಮನುಷ್ಯ ಎನಿಸಿದರು. ಯಾವುದೇ ಬಿಗುವಿಲ್ಲದೆ ಮಾತಾಡಿದರು. ನಾವು ಮಾತಾಡುವಾಗ ಕುಳಿತು ಕೇಳಿದರು. ಪವಿತ್ರಾರ ಸಾಮಾನ್ಯ ನಡವಳಿಕೆ ಹೇಗಿರುತ್ತಿತ್ತೋ ಅದರ ಪೂರಾ ವಿರುದ್ಧದಂತಿದ್ದರು.

 

 

ಪವಿತ್ರಾ ನಮ್ಮೆಲ್ಲರನ್ನೂ ಕೂರಿಸಿಕೊಂಡು ಅನಾಮತ್ತಾಗಿ ಏನೋ ವಿಷಯ ತೆಗೆದುಕೊಂಡು ಸಾಫ್ಟ್ ವೇರ್ ಉದ್ಯಮಗಳನ್ನು ಬೈಯ್ಯುಲು ಶುರು ಮಾಡಿದರು. ಈ ಸಂಭಾಷಣೆ ಎಲ್ಲಿಂದ ಶುರ್ವಾಯಿತು ಎಂದು ನಮಗೂ ಅರ್ಥವಾಗಲಿಲ್ಲ. ಅವರು ಅಸಂಬದ್ಧ ಅದೇನೊ ’ಇಂಟಲೆಕ್ಚುಅಲ್’ ಮಾತುಗಳನ್ನು ಆಡುವಾಗ ಆತ ಬಹಳ ಇರುಸುಮುರುಸಿನಲ್ಲಿದ್ದಂತೆ ಕಾಣುತ್ತಿದ್ದರು. ತನ್ನ ಅಭಿಪ್ರಾಯ ಹೇಳುವ ಸಮಯ ಬಂದಾಗ ’ನನಗೆ ಹಾಗೆ ಅನ್ನಿಸುವುದಿಲ್ಲ. ನೀನು ಹೇಳುವುದು ಯಾವುದರಲ್ಲಿಯೂ ಹುರುಳಿಲ್ಲ’ ಎಂದು ಸಮಾಧಾನವಾಗಿ ತಮಗನ್ನಿಸಿದ್ದು ತಿಳಿಸಿ ಕೂತರು. ಅಷ್ಟೇ. ಆ ನಂತರ ನಡೆದಿದ್ದು ನನಗೂ ಇನ್ನೂ ಅರ್ಥ ಆಗಿಲ್ಲ. ನಮ್ಮೆದುರಿಗೆ ಅವರ ಗಂಡ ಅವರನ್ನು ಟೀಕೆ ಮಾಡಿದ್ದಕ್ಕೋ, ಅದೇನಾಯಿತೋ...ಪವಿತ್ರಾ ಸಡನ್ನಾಗಿ ರೂಮಿಗೆ ಹೊಕ್ಕು ಧಡಾರ್ ಎಂದು ಬಾಗಿಲು ಹಾಕಿಕೊಂಡು ಬಿಟ್ಟರು. ಆಗಷ್ಟೇ ಬಂದು ಪರಿಚಯ ಮಾಡಿಕೊಂಡು ನಾಲ್ಕು ಮಾತಾಡಿ ಅಲ್ಲಿ ಕುಳಿತಿದ್ದ ನಮಗೆ ಏನೂ ಅರ್ಥವಾಗಲಿಲ್ಲ. ಅವರ ಗಂಡನಿಗೆ ಮುಜುಗರ. ಆತನೂ ಎದ್ದು ಹೋಗಿ ರೂಮಿನ ಬಾಗಿಲು ಹಾಕಿಕೊಂಡರು. ಇಬ್ಬರೂ ಸುಮಾರು ಹೊತ್ತು ಹೊರಬರಲಿಲ್ಲ. ಇದೇನಪ್ಪಾ ಈ ಥರ ಆಯ್ತು ಅಂತ ನಾನು ನನ್ನ ಗೆಳತಿ ಮುಖ ಮುಖ ನೋಡಿಕೊಂಡರೆ ನಮ್ಮ ಗಂಡದಿರಿಗೆ ಇದ್ಯಾವ ನಾಟಕಕ್ಕೆ ಬಂದ್ವಿ ಎಂಬ ಇರಿಟೇಷನ್. ಎಲ್ಲರೂ ಎದುರಿಗೆ ಕಂಡ ಮ್ಯಾಗಜೀನುಗಳನ್ನು ಮುಖಕ್ಕೆ ಹಿಡಿದು ಕುಳಿತುಕೊಂಡೆವು.

　

ಸ್ವಲ್ಪ ಹೊತ್ತಿನಲ್ಲಿ ಹೊರ ಬಂದ ಪವಿತ್ರಾ ’ಸಾರಿ ಗೈಸ್ ನನಗೆ ಸಡನ್ ಆಗಿ ತಲೆ ನೋವು ಶುರು ಆಗಿಬಿಟ್ಟಿತ್ತು...ನಿಮಗೆ ಇಲ್ಲಿ ಕೂತು ಬೋರ್ ಆಗಲಿಲ್ಲ ಅನ್ನಿಸುತ್ತೆ’ ಅಂದರು. ಆಕೆಯ ಕಣ್ಣೆಲ್ಲಾ ಕೆಂಪಾಗಿತ್ತು. ಅವರ ಗಂಡ ಬರಲೋ ಬೇಡವೋ ಎಂದು ಮುಖ ಚಿಕ್ಕದು ಮಾಡಿಕೊಂಡು ಹೊರಗೆ ಬಂದರು. ಆಕೆ ತಂದು ಬಡಪಾಯಿ ಟೀ ಅನ್ನು ನಾವು ಒಂದೇ ಗುಟುಕಿಗೆ ಕುಡಿದು ’ವಾಪಸ್ ಹೋಗ್ತಾ ಸ್ವಲ್ಪ ಮನೆಗೆ ಹಾಲು ತರಕಾರಿ ಕೊಳ್ಳೋದಿದೆ’ ಎಂದು ಬಾಯಿಗೆ ಬಂದ ಸುಳ್ಳು ಹೇಳಿ ಅಲ್ಲಿಂದ ಹೊರಟೆವು. ನಮ್ಮಿಂದ ಗಂಡ ಹೆಂಡತಿ ಮನಸ್ತಾಪ ಮಾಡಿಕೊಂಡರಲ್ಲಪ್ಪಾ ಅಂತ ನಾನು ನನ್ನ ಗೆಳತಿ ಬೇಜಾರು ಮಾಡಿಕೊಂಡು ಕಾರಿನಲ್ಲಿ ಸಪ್ಪಗೆ ಕುಳಿತಿದ್ದರೆ ನಮ್ಮ ಗಂಡಂದಿರು ಯಾವುದೋ ಕಾಮಿಡಿ ಶೋ ನೋಡಿ ಬಂದಂತೆ..’ವಾಟ್ ಅ ಕ್ರೇಜಿ ವುಮನ್!’ ಅಂತ ನಗಾಡಿಕೊಳ್ಳುತ್ತಿದ್ದರು.

　

ಮರುದಿನ ನಾನು ವಾಕ್ ಮಾಡಲು ಹೊರಟಾಗ ನನ್ನ ಗೆಳತಿ ಅವಳ ಮನೆ ಮುಂದೆ ಕಾಯುತ್ತಿದ್ದಳು. ನಾನು ಕಂಡ ತಕ್ಷಣ ’ನಿನಗೊಂದು ವಿಷಯ ಹೇಳಬೇಕು’ ಇದು ಏನೋ ಬಹಳ ವಿಶೇಷ ಸುದ್ದಿ ಎಂದು ಅವಳ ಕಣ್ಣುಗಳನ್ನು ನೋಡಿಯೇ ಊಹಿಸಬಹುದಿತ್ತು. ’ಪವಿತ್ರಾ ಫೋನ್ ಮಾಡಿದ್ದರು ಕಣೇ. ಎಲ್ಲಾ ಚನ್ನಾಗಿ ನಡೆಯುತ್ತಿತ್ತಂತೆ. ನಾನು ಮತ್ತು ನೀನು ನೆನ್ನೆ ಅವರ ಗಂಡನಿಗೆ ಕಣ್ಣು ಹಾಕಿದ್ದೆವಂತೆ...ವೆ ಆರ್ ಜೆಲಸ್ ಅಂತೆ. ಅವರಿಗೆ ತುಂಬಾ ನೋವಾಗಿದೆಯಂತೆ. ದೂರ ಇದ್ದೇ ಫ್ರೆಂಡ್ಸ್ ಆಗಿರೋಣ..ಲೆಟ್ಸ್ ನಾಟ್ ಮೀಟ್’ ಅಂದಿದ್ದಾರೆ ಎಂದಳು. ನನಗೆ ಎಲ್ಲಿತ್ತೋ ತಡೆಯಲಾಗಲಿಲ್ಲ. ಇಬ್ಬರೂ ಅಕ್ಕಪಕ್ಕದ ಬಿಲ್ಡಿಂಗ್ಗಳಿಗೆ ಕೇಳಿಸುವಷ್ಟು, ಕಣ್ಣಲ್ಲಿ ನೀರು ಬಂದು, ಪಕ್ಕೆ ನೋವಾಗುವವರೆಗೂ ನಕ್ಕೆವು. ’ವಾಕ್ ಬೇಡ ಕಣೇ ಈ ಎಕ್ಸರ್ಸೈಸೇ ಸಾಕು’ ಅಂತ ಸುಧಾರಿಸಿಕೊಂಡು ಮನೆಗೆ ಬಂದೆವು.

 

　

ರಾತ್ರಿಯೆಲ್ಲಾ ಪವಿತ್ರಾರದ್ದೇ ಯೋಚನೆ. ಮನೆಯಲ್ಲಿ ಕೂತು ಗಂಡಂದಿರಿಗೆ ಬೇಸಿ ಹಾಕುವ ’ಗೂಷ್ಲುಗಳಾದ’ ನಾವು ರಾಡಿಕಲ್ ಫೆಮಿನಿಸ್ಟ್ ಪವಿತ್ರಾರಿಗೆ ಎಲ್ಲಿಲ್ಲದ ಇನ್ಸೆಕ್ಯುರಿಟಿ ಹುಟ್ಟಿಸಿದ್ದೆವು. ಸಿಕ್ಕ ೨೦ ನಿಮಿಷದಲ್ಲಿ ಅವರ ಗಂಡನಿಗೇ ಕಣ್ಣೂ ಹಾಕಿದ್ದೆವು! ಅವರ ಅತ್ತಿಗೆಯಂದಿರು, ಬಂಧು ಮಿತ್ರರೆಲ್ಲಾ ಯಾಕೆ ಪವಿತ್ರಾರ ಬಾಯಲ್ಲಿ ’ಬಿಚಸ್’ ಆಗಿದ್ದರು ಅರ್ಥವಾಯಿತು. ಎಂಥ ಮ್ಯಾನಿಪ್ಯುಲೇಟಿವ್ ಹುಡುಗಿ ಎನ್ನಿಸಿದರು. ಅವರಿಂದ ಇವರಿಗೆ, ಇವರಿಂದ ಅವರಿಗೆ ತಂದಿಟ್ಟು, ಆ ಭಿನ್ನಾಭಿಪ್ರಾಯ ಅಥವಾ ಅಪಾರ್ಥಗಳ ಹೊಗೆಯಲ್ಲಿ ತಾನು ಒಳ್ಳೆಯವಳಾಗಿ ಹಿತೈಷಿಯಂತಾಗಿ ತನ್ನ ಬೇಳೆ ಬೇಯಿಸಿಕೊಂಡು ಸಾಮ್ರಾಜ್ಯ ಮಾಡುವ ಇಂಥ ಗಂಡಸರು/ಹೆಂಗಸರು ತುಂಬಾ ಅಪಾಯಕಾರಿ. ಇಂಥವರೊಬ್ಬರು ನಮ್ಮ ಹತ್ತಿರದ ಬಂಧು ಮಿತ್ರರಲ್ಲಿ ಇದ್ದುಬಿಟ್ಟರೆ ಇಡೀ ಬದುಕು ನಮ್ಮನ್ನು ನಾವು ’ತಪ್ಪು ಮಾಡಿಲ್ಲ, ಹಾಗೆ ಹೇಳಿಲ್ಲ’ ಎಂದು ಪ್ರೂವ್ ಮಾಡಿಕೊಳ್ಳುವುದರಲ್ಲೇ ಕಳೆದುಹೋಗಬಹುದೇನೋ...

 

　

ಪವಿತ್ರಾರ ರೀತಿಯದ್ದು ಸಾವಿರದಲ್ಲಿ ಒಂದು ಲಾಂಗ್ ಡಿಸ್ಟನ್ಸ್ ಕೇಸ್ ಆಗಿರಬಹುದು. ಆದರೂ ಇಂಥ ಅಸ್ಥಿರತೆ, ಸ್ವಾರ್ಥ, ಭಯ, ಅನುಮಾನ, ಆತಂಕಗಳನ್ನಿಟ್ಟುಕೊಂಡು, ಎಲ್ಲರನ್ನೂ ಎಲ್ಲವನ್ನೂ ಕೆಟ್ಟವರನ್ನಾಗಿ ಮಾಡಿ ದೂರ ಮಾಡಿಕೊಂಡು, ಪ್ರೀತಿ ಇದೆಯೋ ಇಲ್ಲವೋ ಎಂಬುದನ್ನೂ ಪ್ರಶ್ನಿಸಿಕೊಳ್ಳದೆ, ಪ್ರೀತಿ ಅಂದರೆ ಏನು? ಕನ್ವೀನಿಯನ್ಸಾ ಅಥವಾ ಒಬ್ಬರು ಇನ್ನೊಬ್ಬರನ್ನು ಸುಲಿಗೆ ಮಾಡುವುದಾ ಎಂದೂ ಯೋಚಿಸದೆ, ಸಾವಿರಾರು ಮೈಲುಗಳಂತರದ ಸಂಬಂಧವನ್ನು ಅಥವಾ ಸಂಬಂಧವೆನ್ನುವ ಪರಸ್ಪರ ಬಂಧನವನ್ನು ಮುಂದುವರಿಸುವ ಮನಸ್ಸುಗಳನ್ನು ಹೇಗೆ ಅರ್ಥ ಮಾಡಿಕೊಳ್ಳಬಹುದು?