೧) ಮೊದಲು ಕೋಳಿಯನ್ನು ಸ್ವಲ್ಪ ಉಪ್ಪು ಮತ್ತು ಅರಿಸಿನ ಪುಡಿಯ ಜೊತೆ ಅರ್ಧ ಗಂಟೆ ನೆನೆಸಿಟ್ಟುಕೊಳ್ಳಿ.

೨) ಒಣಗಿದ ಚಿಲಕವರೆ ಬೇಳೆಯನ್ನು ಉಪಯೋಗಿಸುವುದಾದರೆ ಅದನ್ನು ೧೫ ನಿಮಿಷ ನೀರಿನಲ್ಲಿ ನೆನೆಸಿಟ್ಟುಕೊಳ್ಳಿ. ಆಗಷ್ಟೇ ಚಿಲುಕಿಸಿದ್ದಾದರೆ ನೆನೆಸುವುದು ಬೇಡ.

೩) ಈರುಳ್ಳಿ, ಕೊತ್ತಂಬರಿ ಸೊಪ್ಪು, ತೆಂಗಿನ ಕಾಯಿ, ಶುಂಟಿಯನ್ನು ಸಣ್ಣಗೆ ಹೆಚ್ಚಿಟ್ಟುಕೊಳ್ಳಿ.

೪) ಬಾಣಲಿಗೆ ಸ್ವಲ್ಪ ಎಣ್ಣೆ ಹಾಕಿ ಹಸಿಮೆಣಸಿನಕಾಯಿ, ಶುಂಟಿ, ಬೆಳ್ಳುಳ್ಳಿಯನ್ನು ಸ್ವಲ್ಪ ಹುರಿದುಕೊಳ್ಳಿ. ಇದಕ್ಕೆ ಈರುಳ್ಳಿಯನ್ನು ಸೇರಿಸಿ ಎರಡು ನಿಮಿಷ ಹುರಿದುಕೊಳ್ಳಿ. ಮತ್ತೆ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ, ಕಾಳು ಮೆಣಸು, ಚಕ್ಕೆ ಮತ್ತು ಲವಂಗವನ್ನೂ ಹಾಕಿ ಹುರಿದುಕೊಳ್ಳಿ.

೫) ಹುರಿದುಕೊಂಡ ಸಾಮಾನೆಲ್ಲವನ್ನೂ ಮಿಕ್ಸಿಗೆ ಹಾಕಿ ರುಬ್ಬಿಕೊಳ್ಳಿ. ಇದಕ್ಕೆ ಟೋಮ್ಯಾಟೋ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ.

೬) ನೆನೆಸಿದ ಕೋಳಿಯನ್ನು ತೊಳೆದುಕೊಂಡು, ನೀರು ಬಸಿದುಕೊಳ್ಳಿ.

೭) ಮಸಾಲೆಯನ್ನು ಹುರಿದ ಪಾತ್ರೆಗೆ ೨ ಚಮಚ ಎಣ್ಣೆ ಹಾಕಿ ಅದು ಬಿಸಿಯಾದ ಮೇಲೆ, ತೊಳೆದಿಟ್ಟುಕೊಂಡ ಕೋಳಿ ಹಾಕಿ ಎರಡು ನಿಮಿಷ ಹುರಿಯಿರಿ.

೮) ಪ್ರೆಶರ್ ಕುಕ್ಕರ್ ನಲ್ಲಿ ಈ ಹುರಿದ ಕೋಳಿ, ರುಬ್ಬಿಟ್ಟುಕೊಂಡ ಮಸಾಲೆ ಮತ್ತು ಚಿಲಕವರೆ/ಚಿತಕವರೆ ಸೇರಿಸಿ ಚನ್ನಾಗಿ ಬೆರೆಸಿ, ಸ್ವಲ್ಪ ನೀರು ಸೇರಿಸಿ, ಎರಡು ವಿಷಲ್ ಬರುವವರೆಗೂ ಬೇಯಿಸಿ.

೯) ಈಗ ಚಿಕನ್ ಚಿಲಕವರೆ ಚಾಪ್ಸ್ ರೆಡಿ. ಇದನ್ನು ಮುದ್ದೆ, ಚಪಾತಿ, ಅನ್ನದ ಜೊತೆ ಸವಿದರೆ ತುಂಬಾ ರುಚಿಯಾಗಿರುತ್ತದೆ.