ಕೈಲಾಸ ಎಂದಾಕ್ಷಣ ನೆನಪಾಗುವುದೇ ಆತ

ಮೂಲ: ಹರೀಶ್ ಕಪಾಡಿಯಾ, ಜರ್ನಿ ಆಫ್ ಹಿಮಾಲಯನ್ ವ್ಯಾಲೀಸ್

ಭಾವಾನುವಾದ: ಶ್ಯಾಮ್ ಸುಂದರ್

ಚಿತ್ರಗಳು: ಅಂತರ್ಜಾಲ

ಹಿಂದೂಗಳಲ್ಲಿ ಕೈಲಾಸ ಎಂದ ತಕ್ಷಣ ಮನದಲ್ಲಿ ಮೂಡಿ ಬರುವುದು ಭಕ್ತಿ ಮತ್ತು ಪವಿತ್ರ ಭಾವನೆ. ಕೈಲಾಸದಲ್ಲಿ ಪರಮೇಶ್ವರ ಪಾರ್ವತಿಯೊಂದಿಗೆ ವಾಸಿಸುತಿದ್ದ ಎಂದು ಪುರಾಣಗಳು ಹೇಳುತ್ತವೆ. ಈಶ್ವರನ ಕೈಲಾಸ ಅದೆಷ್ಟು ದೊಡ್ಡದಿದೆಯೋ ಗೊತ್ತಿಲ್ಲ, ಆದರೆ ನಿಮಗೆ ಗೊತ್ತ, ಭಾರತಕ್ಕೆ ಸೇರುವ ಹಿಮಾಲಯ ಶ್ರೇಣಿಯಲ್ಲಿ ಹಲವಾರು ಕೈಲಾಸಗಳಿವೆ. ಉಳಿದ ಇನ್ನೊಂದು ಕೈಲಾಸ-ಮಾನಸಸರೋವರ ಟಿಬೆಟ್ ಗೆ ಹಂಚಿ ಹೋಗಿದೆ. ಹಿಮಾಚಲ ಪ್ರದೇಶದ ಕಿನ್ನೋರ್ ಜಿಲ್ಲೆಯಲ್ಲಿ "ಕಿನ್ನೋರ್ ಕೈಲಾಶ್’, ಚಂಬಾ ಜಿಲ್ಲೆಯಲ್ಲಿ ’ಮಣಿಮಹೇಶ್ ಕೈಲಾಶ್/ಚಂಬಾ ಕೈಲಾಶ್’ ಮತ್ತು ಉತ್ತರ ಖಂಡದ ’ಆದಿಕೈಲಾಶ್’ ಮತ್ತು ಯಮುನೋತ್ರಿಯ ಹತ್ತಿರವಿರುವ ’ಶ್ರೀ ಕೈಲಾಶ್’. ಈ ಪ್ರತಿಯೊಂದು ಪರ್ವತಕ್ಕೂ ಅದರದೇ ಆದ ಪೌರಾಣಿಕ ಕಥೆಗಳಿವೆ. ಎಲ್ಲ ಕೈಲಾಶದಲ್ಲೂ ಈಶ್ವರ ವಿವಿಧ ರೂಪದಲ್ಲಿ ವಾಸಿಸುತ್ತಾನೆ.

ನಾನು, ಧೀರಜ್, ಅಕ್ಷಯ್ ಮತ್ತು ಸುನಿಲ್ ನಿಗದಿತ ವೇಳೆಯಂತೆ ವಿಮಾನದಲ್ಲಿ ಶಿಮ್ಲಾ ತಲುಪಿ ಅಲ್ಲಿಂದ "ಚಂಬಾ" ಜಿಲ್ಲೆಯಯಲ್ಲಿ ಬಂದಿಳಿದೆವು. ಚಂಬಾದಲ್ಲಿ ಒಂದು ದಿನ ಕಳೆದ ಮೇಲೆ ನಮ್ಮ ಪ್ಲಾನ್ ನಂತೆ "ಬ್ರಹಮೋರ್" ಎಂಬ ಸ್ಥಳವನ್ನು ತಲುಪಿದಾಗ ಬೆಳಿಗ್ಗೆ ೯ ಗಂಟೆ. ನಾವು ಅಂದುಕೊಂಡಂತೆ "ಮಣಿಮಹೇಶ ಸರೋವರ" ಮತ್ತು "ಮಣಿಮಹೇಶ್ ಕೈಲಾಶ್" ಅನ್ನು ನೋಡಲು ಚಾರಣ ಮಾಡಿ ೬೦ ಕಿ.ಮೀ ಗಳನ್ನು ಪರಿಕ್ರಮಿಸಬೇಕಿತ್ತು. ಅಲ್ಲಿದ್ದ ಅಂಗಡಿಯ ಪಾನ್ವಾಲ ನಮ್ಮನ್ನು ನೋಡಿ "ಸಾಬ್ ಯಾರೂ ಮಣಿಮಹೇಶ್ ಕೈಲಾಶ್ ಪರ್ವತವನ್ನು ಹತ್ತಲಿಕ್ಕೆ ಸಾದ್ಯವಿಲ್ಲ. ಹಾಗೇನಾದರೂ ಹತ್ತಲು ಪ್ರಯತ್ನಿಸಿದರೆ ಅವರು ಶಿವನ ಅವಕೃಪೆಗೆ ಒಳಗಾಗುತ್ತಾರೆ. ನೀವು ಸರೋವರವನ್ನು ನೋಡಲಷ್ಟೇ ಸಾಧ್ಯ" ಎಂದು ಹೇಳಿದ. ಆತ ಅಲ್ಲಿ ಚಾಲ್ತಿಯಲ್ಲಿರುವ ಪೌರಾಣಿಕ ಕಥೆಯನ್ನೂ ಹೇಳಿದ. ನಾವು ಸ್ಥಳೀಯ ಗೈಡ್ ರಾಜೇಂದ್ರ ಸಿಂಗ್ ಎಂಬಾತನನ್ನು ಕರೆದುಕೊಂಡು ಸರೋವರದ ದರ್ಶನಕ್ಕೆ. ಅಷ್ಟು ದೂರದಿಂದಲೆ ನಮಗೆ "ಮಣಿಮಹೇಶ್ ಸರೋವರದ" ದರ್ಶನವಾಯಿತು. ದಾರಿಯಲ್ಲಿ ಸಿಕ್ಕ "ಬ್ರಹಮೋರ್ ಕೈಲಾಶ್" ದೇವಸ್ತಾನ ನಿರ್ಜನವಾಗಿತ್ತು. ಇಲ್ಲಿ ಆಗಸ್ಟ್ ತಿಂಗಳಿನ ಜಾತ್ರೆಯ ಸಮಯದಲ್ಲಿ ಮಾತ್ರ ಸಾವಿರಾರು ಯಾತ್ರಿಕರಿರುತ್ತಾರೆ. ಆಗ ಎಲ್ಲ ಕಡೆಯಿಂದಲೂ ಬಸ್ ಗಳ ಸೌಕರ್ಯವನ್ನು ಹಿಮಾಚಲ ಸರ್ಕಾರ ಕಲ್ಪಿಸಿಕೊಡುತ್ತದಂತೆ.

ಕುಗಟಿ ಎಂಬಲ್ಲಿಂದ "ಚಂಬಾ ಪಾಸ್" ನಲ್ಲಿ ಒಂದು ದಿನ ಕ್ಯಾಂಪ್ ಮಾಡಿ ದಿನ ಕಳೆದೆವು. ಮೇ ತಿಂಗಳಾದ್ದರಿಂದ ಉಳಿದುಕೊಳ್ಳುವಾಗ ಪುಣ್ಯಕ್ಕೆ ಹವಾಮಾನದ ವೈಪರೀತ್ಯ ಅಡ್ಡ ಬರಲಿಲ್ಲ (ನಮ್ಮ ಪಾಲಿಗೆ ಪರಮೇಶ್ವರನಿದ್ದನಲ್ಲ!). ಮರುದಿನ ದಿನ ಬೆಳಿಗ್ಗೆ ನಾವು ಕರೆತಂದಿದ್ದ ಗೈಡ್ "ಸಾಬ್ ಇನ್ನು ಇಲ್ಲಿ ಉಳಿಯಲು ಸಾಧ್ಯವಿಲ್ಲ ಬನ್ನಿ" ಎಂದು ಹೊರಡಿಸಿದ. ಅಲ್ಲಿಂದ ದೂರದಿಂದಲೇ ಮತ್ತೊಮ್ಮೆ ಪರ್ವತದ ದರ್ಶನ ಪಡೆದು ೧೫ ಕಿ.ಮೀ ಕ್ರಮಿಸಿದ ಮೇಲೆ "ಮಣಿಮಹೇಶ್" ಸರೋವರದ ಹತ್ತಿರಕ್ಕೆ ಬಂದೆವು. ಅಲ್ಲಿ ದೇವಸ್ಥಾನಲ್ಲಿದ್ದ ಪರಮೇಶ್ವರನಿಗೆ ನಮಸ್ಕರಿಸಿ ಬೀಳ್ಕೊಂಡೆವು. ಸಂಜೆಯಾಗುವಷ್ಟರಲ್ಲಿ ಹದಸರ್ ತಲುಪಬೇಕಾಗಿತ್ತು. ಹದಸರ್ ನಲ್ಲಿ ಉಳಿದು ನಾಲ್ಕು ದಿನಗಳ ಕ್ಯಾಂಪಿಂಗ್ ಮುಗಿಸಿ ಮರುದಿನ ಬೆಳಿಗ್ಗೆ ಬೆಂಗಳೂರಿನ ಕಡೆಗೆ ಪ್ರಯಾಣ ಬೆಳೆಸಿದೆವು.