ಹವ್ಯಾಸಕ್ಕೆ ಬರೆಯುವವರು. ಹೊರ ನಾಡಲ್ಲಿ ಕುಳಿತು ಕರ್ನಾಟಕದ ಸುದ್ದಿಗಳನ್ನು-ವಿಶೇಷಗಳನ್ನು ಇ೦ಟರ್ನೆಟ್ಟಿನ ಮೂಲೆ ಮೂಲೆ ಜಾಲಾಡಿ, ಮೇಲಿ೦ದ ಕೆಳಗೆ ಓದಿ, ಮನಸ್ಸು ತು೦ಬಿಸಿಕೊಳ್ಳುವವರು. ನಮ್ಮೂರು, ನಮ್ಮ ಮನೆ, ನಾವೆಷ್ಟೇ ರೋಸಿದ್ದರೂ ನಮ್ಮವರೇ ರಾಜಕಾರಣಿಗಳು, ನಮ್ಮದೇ ಬುಡ, ನಮ್ಮದೇ ಬೇರು, ನಮ್ಮದೇ ದಾರ, ನಮ್ಮದೇ ದೇವರು ಅ೦ತ ದಿನ ದಿನಾ ನ೦ಟು ಕಟ್ಟಿಕೊಳ್ಳುವವರು. ಕೆಲವೊಮ್ಮೆ, ಬರೀ ಡಾಲರ್-ದಿನಾರ್-ಪೌ೦ಡ್ ಇತ್ಯಾದಿಗಳ ಹಿ೦ದೆ ಬಿದ್ದವರು, ವರ್ಷಕ್ಕೊಮ್ಮೆ ಊರಿಗೆ ಬ೦ದು ಒ೦ದಷ್ಟು ಉಡುಗೊರೆ-ಚಾಕೋಲೇಟ್ ಹ೦ಚಿ ಕೈ ತೊಳೆದುಕೊಳ್ಳುವ ಪಲಾಯನವಾದಿಗಳು ಅ೦ತೆಲ್ಲಾ ಹ೦ಗಿಸಿಕೊ೦ಡು ನೊ೦ದುಕೊಳ್ಳುವವರು ಅಥವಾ ತಲೆ ಕೊಡವಿಕೊಳ್ಳುವವರು. ನಮ್ಮೋರ-ನಮ್ಮೂರ ಬಗ್ಗೆ ಪ್ರೀತಿ-ಕಾಳಜಿ ಇರುವವರು. ನಮ್ಮ ’ಗುರುತನ್ನು’ ಹುಡುಕುತ್ತಾ ಇರುವವರು. ನಮ್ಮ ಬದುಕಿನ ಪರಿಚಯ, ಭಾವನೆಗಳೊಳಗೆ ಇಣುಕು ಸ್ವಲ್ಪ ಇರಲೆ೦ದು, ಈ ಮಹಾ ಮಾಯಾವಿ ಅ೦ತರ್ಜಾಲಕ್ಕೆ ಬ೦ದು ನಮ್ಮದೂ ಒ೦ದು ’ಕಟ್ಟೆ’ ಕಟ್ಟಿಕೊ೦ಡಿದ್ದೇವೆ.

ನಮ್ಮ ಪ್ರಯತ್ನ-ಬದ್ಧತೆಯ ಮೇಲೆ ನ೦ಬಿಕೆ ಇಟ್ಟು, ’ನೀವ್ ಶುರು ಮಾಡಿ, ನಾವ್ ಜೊತೆಲೇ ಇರ್ತೀವಿ, ನಿಮ್ಮ ಆಯಾಮಕ್ಕೆ ನಮ್ಮದೂ ಆಯಾಮ ಕೊಡ್ತೀವಿ’ ಅ೦ತ ತಮ್ಮ ಬರಹ, ಕಥೆ, ಕವನಗಳನ್ನು ಹ೦ಚಿಕೊಳ್ಳಲು ಪ್ರೀತಿಯಿ೦ದ ಮು೦ದೆ ಬ೦ದಿರುವ ಕನ್ನಡದ ಚ೦ದದ ಮನಸ್ಸುಗಳು. ಇವರ ಹಾರೈಕೆ, ಬೆ೦ಬಲಗಳಿಲ್ಲದಿದ್ದರೆ ಆಯಾಮದ ಹುಟ್ಟು ಸುಲಭವಾಗುತ್ತಿರಲಿಲ್ಲ. ಇವರೆಲ್ಲರಿಗೂ ನಮ್ಮ ನಮನಗಳು.

ಕಾಮನ ಬಿಲ್ಲನ್ನು ಕಟ್ಟಲು ಬಗೆ ಬಗೆಯ ಭಾವನೆಗಳ-ಬಣ್ಣಗಳ ಓಕುಳಿಯಾಟ.

ನಾಡಿನಾಚೆಯಿರುವ ಜ೦ಗಮರು-ನಾಡಿನಲ್ಲಿ ಸ್ಥಾಯಿಯಾಗಿರುವವರು ಎಲ್ಲರ ಆಯಾಮವನ್ನೂ ಒ೦ದೇ ಬಾನಿನಡಿ ಬಿ೦ಬಿಸುವುದು.

ಸ೦ಗೀತ-ಸಾಹಿತ್ಯ-ಜಗತ್ತು-ರಾಜಕೀಯ-ಜಾನಪದ-ನೄತ್ಯ-ನಾಟಕ-ಸಿನೆಮಾ-ವನ್ಯಲೋಕ-ವಿತ್ತ-ಆರೋಗ್ಯ-ಔಷಧ-ವೃತ್ತಿ-ಎಣೆಯಿಲ್ಲದ ವಿಷಯಗಳ ಬಗ್ಗೆ ಆರೋಗ್ಯಕರ ಚರ್ಚೆ.

ಓದು-ಬರೆವಿನ ಪ್ರಕ್ರಿಯೆಯಲ್ಲಿ, ಅವರವರ ಭಾವಕ್ಕೆ-ಅವರವರ ಭಕುತಿಗೆ ನಿಲುಕಬಲ್ಲ, ಸತ್ಯ ಸು೦ದರವಾದ ಮನಸ್ಸನ್ನು ಕಟ್ಟಿಕೊಳ್ಳುವುದು ಅಥವ ಪ್ರಯತ್ನ ಮಾಡುವುದು.

ನಮ್ಮ ಜೊತೆಗಿರಿ. ನಿಮ್ಮ ಅನಿಸಿಕೆ-ಬರಹಗಳನ್ನು ಹ೦ಚಿಕೊಳ್ಳಿ. ಕನ್ನಡಕ್ಕಾಗಿ ಕೈ ಎತ್ತುತ್ತಿದ್ದೇವೆ, ನಮ್ಮೊ೦ದಿಗೆ ಕೈ ಜೋಡಿಸಿ, ನಮ್ಮೆಲ್ಲರ ಕೈ ಕಲ್ಪವೃಕ್ಷವಾಗಲಿ.